(გურია ნიუსი, ლანჩხუთი) _ ჩვენი მკითხველი კარგად არის ინფორმირებული, რომ ქალაქ ლანჩხუთში დაბინძურებულმა წყალმა ბოტკინის გავრცელება გამოიწვია. მართალია, თავიდან ონკანის წყალს “ააცილეს” ინფექციის გავრცელება, მაგრამ მოგვიანებით, დაავადების ეროვნული ცენტრისა და ადგილობრივი ჯანგანის ერთობლივი ჯგუფის მიერ დადგინდა, რომ “ბოტკინის აფეთქება” წყალში ფეკალური მასების შერევამ გამოიწვია. ახლა კი სწორედ ამ “სუფთა წყალზე” ფასები გაიზარდა.
ლანჩხუთის მოსახლეობა შეშფოთებულია წყლის გადასახადის გაძვირებით. თუ აქამდე ისინი ერთ სულზე 35 თეთრს იხდიდნენ, სექტემბრიდან 1,80 ლარს გადაიხდიან: _ მარტო წყლის გადასახადს ხომ არ ვიხდით? შუქის ფული, ნაგვის გატანის გადასახადი, აქეთ გაზი… წყლის ფასი 7-წევრიანი ოჯახისთვის 14 ლარამდე ადის. მრიცხველი მაინც დაგვიდგან და მოხმარებული წყლის მიხედვით გადაგვახდევინონ საფასური. სულ არ მინდა მაგათი წყალი, გააუქმონ _ ჭის წყალს მოვიხმარ. ვიფიქრე, ვედროებით წყლის თრაქვა არ მოგვიწევდა, მარა ვინ რას შეგარჩენს?! _ ამბობენ ლანჩხუთელები.
ბევრ მათგანს პრობლემები ექმნება იმის გამო, რომ ოჯახებში “მკვდარი სულები” აწერიათ. მოსახლეობა ფიქრობს, რომ საარჩევნო სიების გაბერვის გამო, მათ ოჯახებში “ზედმეტი” ადამიანია ჩაწერილი: _ მე კიდევ არა მიშავს, შვილები “ჩამიწერეს”. მეზობლებს ისეთი ადამიანები ჰყავთ ჩაწერილი, ან შორეული ნათესავები არიან, ან მეზობლები, ანაც უბრალოდ ნაცნობები, _ ამბობს ერთ-ერთი ლანჩხუთელი. ასეთ გაურკვევლობასა და ზედმეტად გადახდის “პატივში” არა ერთი აბონენტია.
შპს “საქართველოს გაერთიანებული წყალმომარაგების კომპანიაში” ადასტურებენ, რომ წყლის გადასახადი მართლაც გაიზარდა და 1 სექტემბრიდან ტარიფი 1,79 ლარი იქნება. ფასის ზრდა, თურმე, იმას გამოუწვევია, რომ მოსახლეობის ორ მესამედზე მეტს 24-საათიანი გრაფიკით მიეწოდება წყალი. სხვა რაიონებში ტარიფი 1,79 ყოფილა და ლანჩხუთმა “რა დააშავაო!” კომპანიაში ფიქრობენ, რომ გამრიცხველიანება მომდევნო წლიდან დაიწყება.
მოკლედ, ამიერიდან ლანჩხუთელებს წყლის გადასახადი 400%-ით გაეზარდათ: _ ვინც ჩვენი წყლის ფასი ხუთჯერ გაზარდა, იმას უნდა ასვა ის მძღ…იანი წყალი, ამასწინათ, ლამის მთელ ქალაქი რომ დაწამლა, _ ამბობენ აქაურები და “წყლის რევოლუციით” იმუქრებიან.
მხოლოდ წყლის გადასახადი არ არის ლანჩხუთის მოსახლეობის განაწყენების მიზეზი _ მათ გულისწყრომას ბუნებრივი გაზის მრიცხველების შეცვლაც იწვევს _ ვისაც ბოლო პერიოდში არ აქვს ბუნებრივი აირი შეყვანილი სახლში, მათ მრიცხველების შეცვლა მოთხოვეს, რაც მოსახლეობას 150 ლარზე მეტი უჯდება. ხალხი იძულებულია, ჯარიმისა და გაზის გათიშვის შიშით, ეს თანხა გადაიხადოს. ქალაქისა და მიმდებარე სოფლების სრულმა გაზიფიცირებამ ჩაილურის, უფრო ზუსტად, ფეკალურმასებშერეული წყალი დალია. მართალია, ქალაქში გაყვანილია მაგისტრალები, თუმცა, მოსახლეობის დიდი ნაწილი, მაღალი ტარიფების გამო, ვერ ახერხებს სახლებში ბუნებრივი აირის შეყვანას. მეტიც, ჩვენი წყაროს ინფორმაციით, ჯერ კიდევ 3 წლის წინ, ქალაქში ბუნებრივი აირის ალის ანთების ვინ იცის მერამდენე პრეზენტაციაზე, ორ ოჯახში საპიაროდ შეყვანილი აირის მომსახურების საზღაური ხელისუფლებას შემსრულებელი კომპანიისთვის დღემდე არ გადაუხდია.
ასევე მოსახლეობის გულისწყრომას იწვევს ის ფაქტი, რომ აგვისტოდან ახალი გადასახადი დაუწესდათ _ ნაგვის გატანის ხარჯები აქამდე მხოლოდ რამდენიმე ქუჩის მოსახლეობას ჰქონდა, ისინიც სიმბოლურ 1 ლარს იხდიდნენ. ახლა კი გადასახადს ყველას თხოვენ და მისი ოდენობა 2,5 ლარია. გურულების განსაკუთრებული აღშფოთების მიზეზი აღნიშნულ თანხაზე საბანკო საკომისიო დანამატი _ 1 ლარი აღმოჩნდა. ამის შესახებ “გურია ნიუსი” უკვე წერდა. დასუფთავების სამსახურს ხელშეკრულება “პრივატბანკთან” აქვს გაფორმებული და წინასწარ გამოცხადებული 20 თეთრის ნაცვლად, ლანჩხუთელებს 1-ლარიანი საკომისიო მოთხოვეს. “პრივატბანკში” გვითხრეს, რომ საკომისიო 40 თეთრი გახლდათ, თუმცა, ამ საკითხის გარკვევას საკმაოდ დიდი დრო დასჭირდა. დასუფთავების სამსახურში ამბობდნენ, რომ თანხა 20 თეთრამდე ჩამოიყვანეს, თუმცა, კვირეების მანძილზე ბანკში მაინც 1 ლარს ითხოვდნენ. ჩვენ არაერთხელ დავუკავშირდით “ტაოპრივატბანკს” და როგორც დასუფთავების სამსახურში გვითხრეს, პრობლემა მოგვარებულია და მომსახურების საკომისიო 20 თეთრი გახდა.
