ჯერჯერობით, უცნობია, დატოვებენ თუ არა თანამდებობებს რაიონული სამმართველოების უფროსები. სავარაუდოდ, ახალი პოლიცმაისტერი წინამორბედის კადრებს შეცვლის.
გურულ სახელისუფლებო კულუარებში ჯაფარიძის შეცვლის რამდენიმე ვერსია სახელდება. “გიგა კაცურად მოიქცა, შს მინისტრის სახელზე განცხადება დაწერა, რომელიც, თურმე, მერაბიშვილმა არ დააკმაყოფილა _ შენ ახლობლის დანაშაულზე პასუხს არ აგებო,” _ ეს ინფორმაცია ჯერ კიდევ ათიოდ დღის წინ მოგვაწოდეს. იმავე წყაროს ახალი ცნობით, “გიგას მაინც ხსნიან _ იგი ან “ლანჩხუთელობას” შეეწირა, ან კუდ-თან დავას, ანაც “დიდ პოლიტიკას”.
ყველაზე რეალურად მიიჩნევენ ვერსიას, რომ ჯაფარიძე “დიდი პოლიტიკის” მსხვერპლია _ ბოლოდროინდელი მოვლენების შემდეგ, რაც გურიაში დაჭერების მორიგი სერია გაიხსნა და “პოლიტდომხალში” გავლენათა გადანაწილების პროცესი დაიწყო, ყველა ცდილობს, ისეთ თანამდებობაზე, როგორიც გურიის პოლიცმაისტერის პოსტია, გავლენის გასაძლიერებლად საკუთარი კანდიდატურა “მოიყვანოს”.
გარდა ამისა, გურიის ყოფილ მთავარ პოლიცმაისტერს ხისტ ჩინოსნად ახასიათებენ. გიგა ჯაფარიძის ხისტი, შეიძლება ითქვას, უხეშობაში გადასული პოლიტიკა განსაკუთრებით მედიასთან ურთიერთობაში გამოჩნდა _ მან “გურია ნიუსის” ჟურნალისტებს ჯერ ვიდეოკადრების გადაღება აუკრძალა, შემდეგ კი მასალები წაუშალა, რის გამოც პოლიცმაისტერის ქმედება არასამთავრობო ორგანიზაციებისა და იურისტების განხილვის საგანი გახდა. ეს საქმე უცხო ქვეყნების საელჩოებამდეც მივიდა და შესაძლოა, გარკვეული როლი მისი გურული კარიერის დასრულებაში ამანაც შეიტანა.
ერთ-ერთი ვერსიით, ჯაფარიძის ოჯახის ახლობელი ფინანსური დარღვევების გამო დააკავეს და პოლიცმაისტერმა განცხადებაც სწორედ მაშინ დაწერა, მაგრამ ვანო მერაბიშვილმა არ დააკმაყოფილა _ ახლობლის დანაშაულზე პასუხს არ აგებო. მეორე ინფორმაციით, პოლიცმაისტერის არასრულწლოვანი ახლობელი წვრილმან ხულიგნობაშია მხილებული, თუმცა მისი მონაწილეობა ჩაიფარცხაო.
აქვე, ჩვენ მიერ გახმაურებულ ფაქტის შესახებ შეგახსენებთ: რამდენიმე დღის წინ, ქალაქ ლანჩხუთის ცენტრში ადგილი ჰქონდა ვანდალურ ქმედებებს _ დილით ადრე, ცენტრალურ სკვერში მდებარე საბავშვო ატრაქციონები დაამტვრიეს, ნამტვრევები იქვე ახლოს ღელეში ჩაყარეს, პარკში მდებარე სცენის ირგვლივ განათებები დაამტვრიეს, ჩამოხსნეს უმწეოთა სასადილოს აბრა, დააზიანეს ნოე ჟორდანიას ბიუსტი, გამგეობასთან დაამტვრიეს განათებები. სამწუხაროდ, დამნაშავეებისთვის ხელის შეშლა ვერავინ მოახერხა და მათი დაკავება მოგვიანებით მოხდა _ ისინი 15 წლის მოზარდები აღმოჩნდნენ. ერთ-ერთი მათგანს ჯაფარიძესთან აკავშირებენ, თუმცა, არც ის არის გამორიცხული, აწ უკვე ყოფილი პოლიცმაისტერის წინააღმდეგ “ჭორების მანქანა” მუშაობდეს.
ასევე, ჩვენმა გაზეთმა გაავრცელა ინფორმაცია, რომ დაახლოებით ერთი თვის წინ, ოზურგეთში კუდ-ის თანამშრომლებმა ნარკოტიკების, როგორც მომხმარებლები, ასევე, გამსაღებლები აიყვანეს. დაკავებულმა ნარკოტიკის შემოტანა თურქეთ-საქართველოს გამშვები პუნქტის გავლით მოახერხა და მის რეალიზაციას ოზურგეთის ქუჩებში, დღისით-მზისით აწარმოებდა. ამბობენ იმასაც, რომ ქუჩაში ნარკოტიკული საშუალებების თავისუფლად გაყიდვის სხვა ფაქტებიც დაფიქსირდა, კონკრეტულად, თეატრის მიმდებარე ტერიტორიაზე, თუმცა, სამართალდამცავებს ნარკორეალიზატორები დღემდე არ დაუკავებიათ. წყაროს ინფორმაციით, სწორედ ნარკოტიკების რეალიზაციასთან და დამნაშავეთა ვერდადგენასთან დაკავშირებულ საქმეს შეეწირა ჯაფარიძის სავარძელი.
თუმცა, წყარო ამბობს, რომ სამხარეო პოლიციის უფროსსა და კონსტიტუციური უსაფრთხოების დეპარტამენტის აჭარა-გურიის სამხარეო სამმართველოს მაღალჩინოსნებს შორის დაპირისპირებაა და არ არის გამორიცხული, ესეც გახდა პოლიცმაისტერის გათავისუფლების მიზეზი.
ზემოთ აღნიშნული ვერსიებიდან გამომდინარე, ყველაზე რეალურია, რომ ჯაფარიძე გურიაში “დიდ თანამდებობას” “დიდი პოლიტიკის” გამო ემშვიდობება. ეს ბოლო პერიოდში პირველი შემთხვევა არ არის, რაც გურიის პოლიცმაისტერს “პოლიტიკურად” ათავისუფლებენ _ გასულ წელს, ბახმაროს გახმაურებული სკანდალის გამო, თანამდებობები ჯაფარიძის წინამორბედმა _ შოთა ჭანუყვაძემ, სხვა მაღალჩინოსან სამართალდამცველებთან ერთად დატოვა. მალე მათ სამივე მუნიციპალიტეტის მთავარი პოლიცმაისტერები და რეგიონის ყველა პროკურორი მიაყოლეს. ზემონახსენები ჭანუყვაძე გურიის გუბერნატორ ვალერი ჩიტაიშვილის თანასოფლელი იყო და მის კადრად მიიჩნეოდა. არ არის გამორიცხული, რომ პოლიცმაისტერად ახალი კადრის მოყვანა გუბერნატორს თავისი გავლენების გასაძლიერებლად სურდეს, თუმცა ამ შემთხვევაში მისი ინტერესი შს მინისტრისას უნდა დაემთხვეს, თორემ, ვანო მერაბიშვილი და ზურაბ ადეიშვილი აღმასრულებელ ხელისუფლებასთან “კარგად მოჭუკჭუკე” თანამშრომლებს რომ ვერ იტანენ, გურიის მაგალითზე არაერთხელ გამოჩნდა _ მაღალჩინოსანი სამართალდამცველების გათავისუფლებას (გარდა ჯაფარიძის შემთხვევისა) მუდამ ასწრებდა კულუარული ხმები ამა თუ იმ მაღალაჩინოსნის აღმასრულებელი ხელისუფლების ასევე მაღალჩინოსნებთან “ჩაბრატების” შესახებ, რის გამოც მერაბიშვილი-ადეიშვილის უწყებებში მუდამ წუხდნენ და ბრაზობდნენ _ მაგათ ჩვენი ხალხის გადაბირება როგორ გაბედესო!
