“ძველს ჯობია, მაგრამ გვეყოფა?”

სექტემბრიდან, რეგიონში მცხოვრები პენსიონერები 20 ლარით გაზრდილ 100-ლარიან პენსიას მიიღებენ. საქართველოს პრეზიდენტმა პენსიის მოსალოდნელი გაზრდის შესახებ განცხადება ჯერ კიდევ მარტში გააკეთა და საზოგადოებას პენსიის 100 ლარამდე მომატებას სექტემბრისთვის შეჰპირდა. რამდენიმე თვის წინ კი, იმედი გამოთქვა, რომ მომავალი წლისთვის დანაპირების შესრულებას შეძლებს და მინიმალური საპენსიო თანხა 100 დოლარს მიაღწევს.

“გურია ნიუსი” პენსიის გაზრდასთან დაკავშირებით პენსიონერების აზრით დაინტერესდა და სხვადასხვა ასაკის 20 პენსიონერი გამოკითხა. გამოკითხულთა უმრავლესობა პენსიის გაზრდას დადებით მოვლენად მიიჩნევს, თუმცა, თითქმის ყველა აღნიშნავს, რომ ეს რაღაც ხრიკის მსგავსია და არავითარ დანამატს არ აქვს აზრი, რადგან ფასები გამუდმებით იზრდება. გამოკითხულთა მეორე ნაწილი მიიჩნევს, რომ მოთმინება უნდა გამოვიჩინოთ და იმას დავჯერდეთ, რაც გვაქვს. აქვე უნდა აღინიშნოს, რომ ბევრი ადამიანი იკავებს თავს კომენტარისგან და კიდევ უფრო მეტი ერიდება რაიმე სახის კრიტიკის თუ უკმაყოფილების გამოხატვას.

“20 ლარი ერთი დღის სადილს ძლივს ყოფნის. ერთი დღის ულუფა დაგვიმატეს! 40 ლარის წამალი მჭირდება კვირაში და 20 ლარს ჰქვია მომატება?!” _ გვითხრა, ცოტა არ იყოს, გაბრაზებულმა 67 წლის ციალა ხარგელიამ.

“6 თვეა, ქმარი ჩავარდნილი მყავს, მისთვის ვარ ქუჩაში გამოსული, მას ვახარჯავ პენსიასაც, მეტი არაფერში მყოფნის,” _ გამოეხმაურა ციალა ხარგელიას იქვე მყოფი ასაკოვანი ქალბატონი.

“რაც დადებითი იქნება, მისასალმებელია. მართალია საკმარისი არ არის, მაგრამ სამი ამდენი რომ იყოს, ჩვენ მაინც არ გვეყოფა,” _ გვითხრა პენსიონერმა მამაკაცმა.

“პატარა საქართველო თავის მწირ ბიუჯეტში უნდა ჩაეტიოს. სამყოფი ფული არასოდეს არ იქნება, ჩვენ უნდა ვიმყოფინოთ,” _ გამოთქვა თავისი მოკრძალებული კმაყოფილება მოხუცმა ქალბატონმა.

პენსიონერების აზრით, 20 ლარი მდგომარეობას ვერ შეცვლის, ვინაიდან ფასები იზრდება:

“ნამეტანი კაია, მარა, რათ გინდა, თუ ფასები პენსიის პროპორციულად გაიზარდა? რომ არაა საკმარისი, იმიზა ვდგავარ ქუჩაში, თუ არა, რა მინდა 80 წლის კაცს აქ,” _ გვითხრა მამაკაცმა, რომელიც ძველი ბაზრის მიმდებარე ტერიტორიაზე ავტომობილების მოძრაობას აწესრიგებს.

“პენსიის მომატება სისულელეა და ყველა, ვინც პენსიის ზრდას მოითხოვს, არის დარახუნებული (სტილი დაცულია). პენსია და ფული არის ქაღალდი, რომელიც კუჭს ვერ აკმაყოფილებს, მას საკვები სჭირდება. ჯობს, ფასების დაწევა მოვითხოვოთ,” _ მიმართა საზოგადოებას პენსიონერმა დავით დათიაშვილმა.

“აზრის კი ვარ კარგის, მაგრამ აზრი არ ყოფნის საქმეს,” – გვითხრა ჩვენმა ბოლო რესპონდენტმა და იმედი გამოთქვა, რომ მომავალში გაზრდილი პენსიის გემოს შეიგრძნობენ და ყოველდღიური მოხმარების პროდუქტზე ფასები დაიწევს.