ააიპ “ოზურგეთის დასუფთავების სამსახურის” ახალდანიშნული უფროსი, ვლადიმერ სალუქვაძე “გურია ნიუსთან” საუბარში აღნიშნავს, რომ ის სამსახურებრივი მოვალეობის შესრულებას 15 აგვისტოდან შეუდგა. რაც შეეხება ინფორმაციას, რომ აღნიშნულ აიიპ-ში მომუშავე ყველა პირმა გათავისუფლების შესახებ განცხადება დაწერა, ადასტურებს და ამ ფაქტს, სამსახურში მიმდინარე რეორგანიზაციით ხსნის.
_ მინდა, რომ ჩემი თანამშრომლები ლამაზად მოემსახურონ ოზურგეთს. მიმართული ვარ იმისთვის, რომ საქმე ვაკეთო. რაც შეეხება ჟურნალისტებთან ურთიერთობას, მივიღე გადაწყვეტილება, შევქმნა საზოგადოებასთან ურთიერთობების სამსახური, რომლის წარმომადგენელიც იქონიებს მჭიდრო კონტაქტს საზოგადოებასა და მასმედიასთან, _ გვითხრა სალუქვაძემ.
_ ბატონო ვლადიმერ, ჩვენს ხელთ არსებული ინფორმაციით, თქვენმა თანამშრომლებმა 15 სექტემბერს დაწერეს განცხადება სამსახურიდან გათავისუფლების შესახებ, რის მიზეზადაც არა ერთი ვერსია სახელდება.
_ ამის მიზეზი მხოლოდ მასშტაბური რეორგანიზაცია და სამსახურის მართვის ახლებური ხედვაა, მეტი არაფერი.
_ რამდენ თანამშრომელს დააწერინეთ განცხადება და მოხდება თუ არა ახალი თანამშრომლების კონკურსის წესით შერჩევა?
_ ადმინისტრაციის თანამშრომლებმა განცხადება საკუთარი სურვილით დაწერეს. ახალი თანამშრომელი იქნება მიღებული მისი პირადული და საქმიანი თვისებებიდან გამომდინარე. ისინი, ვისაც შესწევთ უნარი სასიკეთოდ, პროგრესულად და ახლებურად წაადგნენ ოზურგეთს.
_ ის თანამშრომლები, რომლებმაც განცხადებები დაწერეს, შესაძლებელია თუ არა ისევ დაუბრუნდნენ სამუშაოს?
_ გამორიცხული არაა, თუ მათი საქმიანი თვისებები უპასუხებს სამსახურის მოთხოვნებსა და ინტერესებს.
_ გამოცხადდება თუ არა კონკურსი?
_ ამის შესახებ ცოტა მოგვიანებით გესაუბრებით.
_ სულ რამდენი თანამშრომელი გყავთ?
_ 108, საკურორტო სეზონზე _ 134.
_ ვინ დაგნიშნათ ამ თანამდებობაზე?
_ მე აღნიშნულ სამსახურში ბატონმა ტარიელ ჟღენტმა მიმიყვანა და ქალაქის უბნის ხელმძღვანელის თანამდებობა შემომთავაზა.
_ ბატონ ტარიელსაც დაწერილი აქვს განცხადება?
_ განცხადება სამსახურიდან გათავისუფლებაზე დაწერა ყველა პასუხისმგებელმა პირმა, თუმცა მე არავისთვის არ დამიძალებია. დავაყენე საკითხი და აღნიშნულზე გადაწყვეტილება თავად მიიღეს.
ოზურგეთის მუნიციპალიტეტის საკრებულოს თავმჯდომარე, ალეკო მამეშვილი “გურია ნიუსთან” საუბარში აღნიშნავს, რომ დასუფთავების სამსახურში რეორგანიზაცია მიმდინარეობს:
_ ბატონო ალეკო, როდის და ვისი ხელწერით დაინიშნა ვოვა სალუქვაძე ოზურგეთის დასუფთავების სამსახურის უფროსად?
_ ჩემი, ოზურგეთის მუნიციპალიტეტის საკრებულოს თავმჯდომარის 15 აგვისტოს, #110 ბრძანებით, ვლადიმერ სალუქვაძე დაინიშნა მუნიციპალიტეტის ააიპ “ოზურგეთის დასუფთავების სამსახურის” უფროსად.
_ რატომ არ იყო საზოგადოება ამის შესახებ ინფორმირებული?
_ თვითმართველობის მიერ მიღებული გადაწყვეტილებების პროექტები, სამართლებრივი აქტები საჯარო და ხელმისაწვდომია. ნებისმიერ მოქალაქეს შეუძლია, მიიღოს მისთვის საინტერესო და საჭირო ინფორმაცია მოთხოვნისთანავე. ამ შემთხვევაში, არც ეს კონკრეტული დანიშვნა წარმოადგენს გამონაკლისს.
_ გაქვთ თუ არა ინფორმაცია, რატომ დააწერინეს ააიპ “ოზურგეთის დასუფთავების სამსახურის” თანამშრომლებს სამსახურიდან წასვლის შესახებ განცხადებები?
_ ამ ეტაპზე დასუფთავების სამსახურში მიმდინარეობს რეორგანიზაცია, ახალი ხელმძღვანელი საშტატო განრიგის დაზუსტებაზე მუშაობს. სტრუქტურული ცვლილებები ხელს შეუწყობს სამსახურის გამართულ მუშაობას.
ვლადიმერ სალუქვაძე 2004 წლიდან შპს “ოზურგეთგაზის” დირექტორად მუშაობდა, შემდეგ იმუშავა “ლიხაურიგაზის” დირექტორად და “ლიხაურიგაზის” მთავარი ინჟინრის თანამდებობაზე. “ლიხაურიგაზის” გაუქმების შემდეგ, ის დასუფთავების სამსახურში დასაქმდა.
