ოზურგეთის მუნიციპალიტეტის სოფელ ციხისფერდის (გურიანთის თემი) მოსახლეობამ 23 ივნისს საპროტესტო აქცია გამართა და ოზურგეთი-ურეკის ცენტრალური გზის ის მონაკვეთი გადაკეტა, რომელსაც აღნიშნული სოფელი ესაზღვრება.
ციხისფერდელთა პროტესტი სასმელი წყლის და გზის რეაბილიტაციის პრობლემას ეხებოდა.
“ვითხოვთ გზას და წყალს! დავიღალეთ!” _ ასეთი ბანერი ჰქონდათ გამოტანილი აქციის მონაწილეებს.
მალე ადგილზე მივიდა ოზურგეთის პოლიცია და გზა გახსნა, აქციის მონაწილეებს კი მოუწოდეს, პროტესტი გზის იქეთ, “ნაძვების ჩრდილქვეშ” გამოეხატათ.
“1987 წლის შემდეგ წყალს და გზას ვითხოვთ. ერთი წყაროა აგერ და მთელი დღე რიგში უნდა იდგე, რომ ხუთი ლიტრი წყალი აიღო. ყველა მთავრობა გვპირდება. კოტე შარაშენიძეც შეგვპირდა. ჰოდა, რომ ვირბინეთ მაგისთვის, გაგვიკეთოს ახლა და კიდევ ვირბენთ, მივალთ და მადლობასაც ვეტყვით. თუ არადა, კიდევ გადავკეტავთ გზას! ვიხრჩობით უწყლოდ”, _ ერთმანეთს არ აცლიდნენ საყვედურების თქმას ნაზი რატიანი, ნონა ჭეიშვილი, შუქრი მუჯირი და სხვები, რომლებიც ამავდროულად აღნიშნავდნენ, რომ ეს აქცია არ იყო პოლიტიკური ხასიათის და კონკრეტულ თარიღს ითხოვდნენ, ეთქვა მუნიციპალიტეტის მერს, როდის დაიწყებოდა ინფრასტრუქტურული პროექტების გახორციელება.
ინგა ტრაპაიძე, ციხისფერდის მკვიდრი: “იცით, რა დღეში ვართ? მე დავიმალები შიგ, იმხელა ორმოებია გზებზე. ბავშვები უწყლოდ მყავს, ჰიგიენა… რომელი ერთი ვთქვათ?! წყალგაყვანილობის სისტემის მოწესრიგებას, დიდი ხანია, გვპირდებიან, თუმცა, სულ მოტყუებული ვართ. სასწრაფოდ გვინდა მართალი პასუხი. მეტად თავს არავის მოვატყუებინებთ!”
აქციის მონაწილეებთან ოზურგეთის მუნიციპალიტეტის მერი, კოტე შარაშენიძე მივიდა. მას აქციის რამდენიმე მონაწილემ კატეგორიულად მოთხოვა, დაესახელებინა ზუსტი თარიღი, როდის დაიწყებოდა გზისა და წყლის პრობლემის მოგვარება.
“გასაგებია, რომ გზა და წყალი გინდათ. ეს მე ვიცი და არაა დიდი ხანი, რაც თქვენს ადმინისტრაციულ ერთეულში ვიყავი. გვქონდა შეხვედრა და გადავწყვიტეთ, რომ სექტემბრის დასაწყისიდან ვიწყებთ პრობლემის მოგვარებას. რომ არ მოვსულიყავი, არ ვიცნობდე პრობლემას, ახლახან რომ არ შევთანხმებულიყავით, კი, ბატონო! რა მოხდა ახლა? დაგვიანდა ციხისფერდის გზის გაკეთება, მაგრამ არ გავაკეთებთო, ხომ არ გეუბნებათ ვინმე? გავაკეთებ მე ამას! მე კი არა, მთავრობა გააკეთებს, უფრო სწორად! მე შუამავალი ვარ ამ საქმეში. 30 ივნისს ტენდერში გამოვლინდება გამარჯვებული კომპანია, რომელიც წყლის პრობლემას მიხედავს. ისე ვერ ვიზამთ, რომ ჯერ ასფალტი დავაგოთ და მერე წყალგაყვანილობის გამო გადავთხაროთ”, _ უთხრა შარაშენიძემ აქციის მონაწილეებს.
“ჩვენ გვინდა ზუსტი პასუხი, როდის დაიწყებთ დანაპირების შესრულებას. სექტემბერში დაიწყება? კი, ბატონო, მოვიცდით ამ ორ თვესაც, მაგრამ კიდევ არ მოგვატყუოთ”, _ ბრაზობდნენ ლაშა ჭელიძე, შუქრი და ირაკლი მუჯირები.
“არავინ გატყუებთ. უცებ არ კეთდება ყველაფერი. დაგვიანდა, მაგრამ ტყუილად ხომ არ ვართ? რიგში არ დამდგარხართ? ერთ წელში ხომ ვერ გაკეთდება ყველა სოფლის გზა და წყალი? ხვარბეთში რომ არ გაგვეკეთებინა, ისინი იტყოდნენ, სხვაგან გააკეთა და ჩვენ დაგვტოვაო. გპირდებით, გავაკეთებ!” _ კვლავ გაუმეორა შარაშენიძემ აქციის მონაწილეებს.
ამასობაში აქციაზე ოზურგეთის საკრებულოს დამოუკიდებელი დეპუტატი მაია ზოიძე მოვიდა”
“ჩემი ხალხი ხართ და რომ არ ვთქვა, არ შემიძლია! კი გამაკვირვეთ… რა მოხდა? ერთი კვირის წინ კოტე შარაშენიძე მოვიდა ადმინისტრაციულ ერთეულში. მოსახლეობის წარმომადგენლები, გამგებელთან ერთად იყვნენ ადგილზე. საუბარი შედგა სწორედ ამ პრობლემების მოგვარებაზე. გადაწყვეტილია, რომ ტენდერი 30 ივნისს შედგება და გამარჯვებული კომპანია დაიწყებს წყლის ქსელზე მუშაობას. მერე კი გზის რეაბილიტაცია დაიწყება. როგორ გავიგო, ყოველივე ამის შემდეგ დღევანდელი აქცია? გამოდის, რომ რადგან კეთდება, ამიტომ გამოხატავთ პროტესტს? რა ქვია ამას?! რა ხდება?!” _ გულისწყრომა ვერ დამალა მაია ზოიძემ.
“ისევ მოგვატყუებთ და ამიტომ გზას კიდევ გადავკეტავთ”, _ თქვეს აქციის მონაწილეებმა.
“თუ ყოფილა ოდესმე, თუნდაც ერთი სატელეფონო ზარისთვის არ მეპასუხოს და თითოეული თქვენგანის პრობლემას ადგილზე არ გავცნობოდე? აქ ვარ და პირდაპირ მითხარით. გეუბნებით, ეს პრობლემებიც მოგვარდება”, _ მიმართა აქციის მონაწილეებს მერის წარმომადგენელმა სოფელში გია ფასიეშვილმა.
“ბატონო კოტე, იმიტომ გედექით გვერდში არჩევნებზე, იმიტომ ვირბინეთ, რომ ეს გზა და წყალი გაგეკეთებინათ. ამიტომ დაზუსტებით გვითხარით ახლა, როდის დაიწყებთ ჩვენი პრობლემის მოგვარებას?” _ მიმართა ადგილობრივმა მცხოვრებმა, სოსო კვაჭაძემ მერს.
“მე კი არ მედექი, საკუთარ თავს და სოფელს ედექი. გიმეორებთ, სექტემბერში დავიწყებთ! 2 ივლისს კი, მომდევნო თვის დასაწყისში, თქვენთან ვარ, შევიკრიბოთ კიდევ ერთხელ. მე ბოდიშს გიხდით ჩემი ემოციისთვის, მაგრამ მართალი ვარ _ არ მიმიტოვებიხართ. ახლახან ვიყავი სოფელში სწორედ აღნიშნულ საკითხებზე სასაუბროდ”, _ უთხრა მათ შარაშენიძემ.
აქცია საბოლოოდ დაიშალა შეთანხმების საფუძველზე, რომ ივლისის დასაწყისში სოფლის მცხოვრებლები და მუნიციპალიტეტის მერი, ასევე, წყალმომარაგების კომპანიის წარმომადგენლები და სხვა პასუხისმგებელი პირები გურიანთაში შეხვდებიან და საბოლოოდ გაირკვევა, როდის დაიწყება, პირველ რიგში, წყლის პრობლემის მოგვარების საკითხი, რასაც შემდეგ გზის რეაბილიტაციაც მოჰყვება.
