ჩოხატაურის მუნიციპალიტეტის სოფელ ჩაისუბანში მცხოვრები შოთა ბოლქვაძისა და “ენერგო პრო-ჯორჯიას” კონფლიქტი, დღეს უკვე სამ წელს ითვლის და სასამართლო დავის არაერთ შემთხვევას მოიცავს.
საქმე ის გახლავთ, რომ “ენერგო-პრო ჯორჯია” შოთა ბოლქვაძეს 175 ლარის ოდენობით დავალიანებას ედავება. აღნიშნული დავალიანება 2008 წლის 13 ივნისს 159 ლარს შეადგენდა, სწორედ ამ დღეს გაუთიშა ენერგო კომპანიამ მომხმარებელს ელექტროენერგიის მიწოდება. 2009 წლისთვის კი, აბონენტის დავალიანება 175 ლარამდე გაიზარდა.
2010 წლის 27 აგვისტოს, ჩოხატაურის მაგისტრატმა სასამართლომ მოსარჩელე სს “ენერგო-პრო -ჯორჯიას” გამამართლებელი გადაწყვეტილება დაუსწრებლად მიიღო. ამ გადაწყვეტილების თანახმად, მოპასუხე შოთა ბოლქვაძეს ზემოხსენებული დავალიანების (175 ლარი და 08 თეთრი) ანაზღაურება და სახელმწიფო ბაჟის (50 ლარი ) გადახდა დაეკისრა. აღსანიშნავია, რომ ბოლქვაძე სოციალურად დაუცველთა ბაზაშია რეგისტრირებული და ამ კატეგორიის მოქალაქეები სახელმწიფო ბაჟის გადახდისაგან, 2010 წლის 6 ივლისიდან, თავისუფლდება.
შემდგომი სასამართლო, განაჩენის გასაჩივრებისა და შოთა ბოლქვაძის მიერ შესაგებლის წარდგენის საფუძველზე, ამავე წლის 15 ოქტომბერს შედგა. ამ პროცესზე გააუქმეს პირველი დაუსწრებელი გადაწყვეტილება და ენერგო კომპანიის წარმომადგენელ ადვოკატს დაევალა შოთა ბოლქვაძის მიერ დასახელებული მოწმეების შემდგომ სასამართლო პროცესზე წარმოდგენა; თუმცა, ადვოკატს სასამართლოს დავალება არ შეუსრულებია და 5 ნოემბერს გამართულმა მესამე სასამართლო სხდომამ კვლავ მოწმეების გარეშე ჩაიარა.
“ვფიქრობ და ვერ გამიგია, რაში დასჭირდა მოსამართლეს პირველი გადაწყვეტილების გაუქმება, თუ ისევ იგივე უნდა მომხდარიყო?! ჩემი აზრით, ეს იყო თვალთმაქცობა და პირობა ენერგო კომპანიისადმი, რომ ხალხის გაძარცვის შემთხვევაშიც კი, სასამართლო მას დაიცავდა,” _ ამბობს “გურია ნიუსთან” საუბრისას შოთა ბოლქვაძე.
“ენერგო-პრო ჯორჯიას” მიერ წარმოდგენილი მასალებიდან ჩანს, რომ 2007 წელს, შოთა ბოლქვაძეს მხოლოდ ორი თვის გადასახადი აქვს დაფარული, რასაც ბოლქვაძე უარყოფს და ამბობს, რომ ის პირნათლად იხდიდა გახარჯული ელექტროენერგიის საფასურს. ნათქვამის დასადასტურებლად კი, ოზურგეთის რაიონული პროკურატურის დადგენილება და მისთვის აღმრიცხველის, ოლეგ უნგიაძის მიერ მიცემული ჩვენება მოჰყავს. პროკურატურისთვის მიცემულ ჩვენებაში ოლეგ უნგიაძე განმარტავს, რომ შოთა ბოლქვაძისგან, ისევე როგორც სოფლის თითოეული მცხოვრებისგან აკრეფილი თანხა ყოველთვიურად შეჰქონდა “ენერგო პრო ჯორჯიას” ფილიალში და შესაბამისად, უბრუნებდა მათ გადახდის დამადასტურებელ ქვითრებს. ამასთანავე აღნიშნავს, რომ შოთა ბოლქვაძე მძიმე ეკონომიკური ვითარების გამო იხდიდა მხოლოდ მის პირად მრიცხველზე ნაჩვენები კილოვატის ღირებულებას.
ოზურგეთის რაიონულმა პროკურატურამ, მოწმის სახით, ჩოხატაურის ფილიალში ტექნიკოს-ელექტრიკოსი გიორგი კალანდაძეც დაკითხა. მოწმის ჩვენების თანახმად, სოფელ ჩაისუბანში მცხოვრებ შოთა ბოლქვაძეს, 2007 წლის სექტემბერში ერიცხებოდა დავალიანება 37 ლარისა და 32 თეთრის ოდენობით, მაშინ როცა მის მიერ გადახდილი იქნა მხოლოდ 2 ლარი და 35 თეთრი. მრავალჯერადი გაფრთხილების შემდეგ, აბონენტის დავალიანებამ 157 ლარი და 70 თეთრი შეადგინა.
სს “ენერგო- პრო ჯორჯიას” დასავლეთ საქართველოს რეგიონალური ფილიალის 2010 წლის 22 და 26 იანვრის წერილებით და აბონენტის პირადი ბარათის ამონაწერით ირკვევა, რომ აბონენტს ელექტროენერგია 2009 წლის დეკემბერში, წინასაახალწლოდ მიეწოდა, რის გამოც, მის დავალიანებას დაემატა 16 ლარი და 88 თეთრი. აღნიშნულ თანხას დაემატა ორჯერ მიერთების გადასახადი 0,50 ლარის ოდენობით (სულ 1 ლარი) და დავალიანებამ საბოლოოდ შეადგინა 175 ლარი და 58 თეთრი. შოთა ბოლქვაძის პირად ბარათზე გადახდა მხოლოდ ორჯერ არის დაფიქსირებული _ 2007 წლის 23 აგვისტოს, 7,36 ლარი და 2007 წლის 27 სექტემბერს _ 2,35 ლარი. წერილების ანალიზი პასუხს სცემს აბონენტის კითხვას, თუ საიდან დაემატა თანხა გათიშულ მრიცხველს და 2008 წლის დავალიანებას რატომ დაერიცხა 18 ლარი.
სიღარიბის ზღვარს ქვემოთ მყოფი შოთა ბოლქვაძე ამბობს, რომ მისი ოჯახი ყოველთვის ზოგავდა ელექტროენერგიას და მათ გადასახადს, თითქმის, არასოდეს გადაუჭარბებია 2 ლარისთვის. ამიტომაც არ იხდიდა პირადი მრიცხველისა და საერთო მრიცხველის ჩვენებების შედარების შედეგად ნაჩვენები სხვაობის დანამატს.
შოთა ბოლქვაძის საჩივრებმა არაერთი სასამართლო მოიარა, თუმცა განაჩენი ყოველთვის ერთი და იგივეა. სასამართლოს გადაწყვეტილებით, მას ენერგო კომპანიის დავალიანების ანაზღაურება ეკისრება.
2010 წლის 9 თებერვალს, ჩოხატაურის მუნიციპალიტეტის გამგებელმა მამუკა დოლიძემ შოთა ბოლქვაძეს დავალიანების გადახდაში დახმარება შესთავაზა, თუმცა მისგან უარი მიიღო.
“ასეთ დახმარებას ხომ აზრი არ აქვს, ავტოკალმით შეიარაღებული ბანდიტები სამ თვეში ისევ მოიტანენ 80-100 ლარის დავალიანების ქვითარს, პრობლემა კი კვლავ პრობლემად დარჩება. თანაც, ეს ხომ პრინციპულად მიუღებელია?! ბატონო მიხეილ, თქვენ მიერ ახლიდან აშენებულ, ქურდებისგან გაწმენდილ და განათებულ, მოძლიერებულ სახელმწიფოში ჩემი ქოხი მაინც ჩაბნელებულია”, _ წერს შოთა ბოლქვაძე საქართველოს საქართველოს პრეზიდენტს ღია წერილში.
