ბოლო რამდენიმე დღის გამავლობაში რუსული მასმედია ხვიჩა კვარაცხელიას თემას კვლავ აქტიურად დაუბრუნდა. ქართველ შემტევს ინგლისურ პრემიერლიგას უკავშირებენ. რუსი ჟურნალისტების მტკიცებით ზამთრის სატრანსფერო მიმოსვლის დღეებში საქართველოს ეროვნული გუნდისა და ყაზანის „რუბინის“ თავდამსხმელი სამი ბრიტანული კლუბიდან ერთ-ერთში გადავა. ეს გუნდებია – „ევერტონი“, „ვესტ ჰემი“ და „საუთჰემპტონი“.
რუსულ მედიაში დაწერეს, რომ ამ სამეულიდან „ევერტონი“ ფავორიტია. ლივერპულური კლუბის ხელმძღვანელობასთან ძალიან ახლო ურთიერთობა აქვს რუს მილიარდერ ალიშერ უსმანოვს, რომლის რეკომენდაციით „ევერტონის“ მწვრთნელად რაფაელ ბენიტესი დაინიშნა და ვარაუდობენ, რომ ხვიჩას ტრანსფერში წვლილი შეიძლება სწორედ მან შეიტანოს.
„ევერტონი“ რუსულ გუნდს ოფიციალურად ჯერ არ დაკავშირებია, სამაგიეროდ კონტაქტზე გამოვიდა „ვესტ ჰემი“.
„ლონდონური გუნდი ახლოსაა ყაზანის „რუბინის“ ახალგაზრდა თავდამსხმელი ხვიჩა კვარაცხელიასთან კონტრაქტის გაფორმებასთან. ტრანსფერის ღირებულება 13 მილიონი ფუნტია.“ – ეს ინფორმაცია გუშინ გამოცემამ „Football Insider247“ გაავრცელა. წყარომ “Football Insider”-ს განუცხადა, რომ „ვესტ ჰემში“ დაინტერესდნენ, რა შეიძლება გაკეთდეს მომავალ თვეში კვარაცხელიას მიმართულებით. „რუბინმა“ მასში 13 მილიონი ფუნტი მოითხოვა.
როგორ იქნებოდა რომ რუსულ მედიას ხვიჩა კვარაცხელია და მისი შესაძლო ტრანსფერი მორიგი ქილიკის საგნად არ ექცია. გუშინ გამოცემამ „Championat.com“ კვარაცხელიას ინგლისში სავარაუდო გადაბარგების შესახებ რუსი გულშემატკივრების კომენტარები გამოაქვეყნა.
„დაიწყო კიდევ ერთი ზღაპარი, ამჯერად წინასაახალწლო. ხვიჩას მამიკო, რამდენი გადაიხადე, რომ ეს დაეწერათ?“
„ევერტონმა“, „ვესტ ჰემმა“ და „საუთჰემპტონმა“ იციან საერთოდ ამის შესახებ?“
„უფასოდ აიყვანდნენ, მაგრამ მასში 20 მილიონს არ გადაიხდიან“
„ისევ და ისევ ზღაპრები, ის ქუთაისის „ტორპედოს“ დონისაა“
„რატომღაც, როგორც კი სატრანსფერო ფანჯარა ახლოვდება, ყველა ტოპ კლუბს მაშინვე ხვიჩა ახსენდება…“
„ანუ რისი თქმა გინდათ, რომ „მილანი“, „ტოტენჰემი“ და „ბარსელონა“ მისით უკვე აღარ არიან დაინტერესებულები?“
ალბათ კომენტარი ზედმეტია. კარგი იქნება თუ ხვიჩა რუსულ ფეხბურთსა და გარემოს მალე მოსცილდება, წინააღმდეგ შემთხვევაში კარიერას მარად პერსპექტიული ფეხბურთელის იარლიყით დაასრულებს. ანალოგიური მოსაზრება ეხება ბელგიურ „გენტში“ მოასპარეზე გიორგი ჩაკვეტაძესაც, რომელსაც საუკეთესო დროება არ უდგას. ის მხოლოდ ეპიზოდურად თამაშობს ბელგიურ კლუბში და ცხადია, ასეთი მდგომარეობა მას არ აკმაყოფილებს – არც მას და არც მის გულშემატკივრებს.
მას ტრავმის შემდეგ ნდობა სჭირდება, ოღონდ ამ ნდობას ვერ გრძნობს ბელგიური „გენტის“ მთავარი მწვრთნელის, ჰეინ ვანჰეზებრუკისგან.
გამოსავალი ერთია: ჩაკვეტაძემ იანვარში უნდა დატოვოს „გენტი“ და გადავიდეს ისეთ კლუბში, სადაც მეტი ნდობა და სათამაშო პრაქტიკა ექნება.
აი, ყაზახური მედიის ცნობით კი, თბილისის „დინამოს“ თავდამსხმელი ზორან მარუშიჩი ახლოსაა ყაზახეთში გადასვლასთან. მისი აგენტი ერთბაშად რამდენიმე იქაურ კლუბთან აწარმოებს მოლაპარაკებას.
ასახელებენ ამ კლუბებსაც – „თურანი“, „ატირაუ“, „აქტობე“ და „შახტიორი“. მარუშიჩი ახლახან დასრულებულ სეზონში 16 გოლით საქართველოს ჩემპიონატის საუკეთესო ბომბარდირი გახდა.
გუშინ ცნობილი გახდა რომ „აფრიკის ეროვნებათა თასის“ გათამაშება, შესაძლოა, ზამთრიდან შემოდგომისთვის გადაიტანონ. დაძაბული კოვიდგარემოს გარდა ერთ-ერთი მიზეზი ევროპული გუნდების უკმაყოფილობაა.
„ახლა ევროპული კლუბები უკმაყოფილო არიან, რომ „აფრიკის ეროვნებათა თასზე“ ფეხბურთელების გაშვება მოუწევთ. მიგვაჩნია, რომ ეს ტურნირი შეიძლება დიდი საერთაშორისო ფანჯრის ნაწილი გახდეს და არა იანვარ-თებერვალში, არამედ შემოდგომით ჩატარდეს.“ – განუცხადა გამოცემას „Goal.com“ ფიფა-ს პრეზიდენტმა ჯანი ინფანტინომ.
ამჟამინდელი განრიგით, ტურნირი 9 იანვრიდან 6 თებერვლის ჩათვლით უნდა გაიმართოს კამერუნში.
ინგლისის „პრემიერლიგის“ კლუბებში COVID-19-ზე ბოლო ერთი კვირის განმავლობაში ჩატარებულმა ტესტირებებმა 90 ახალი დადებითი შემთხვევა დააფიქსირა. ამის შესახებ გუშინ „პრემიერლიგის“ ოფიციალურმა ვებგვერდმა დაწერა.
ირკვევა რომ 13-19 დეკემბერს კლუბებში სარეკორდო რაოდენობის – 12 345 ტესტი ჩატარდა, საიდანაც დადებითი 90 ახალი შემთხვევა დაფიქსირდა. ეს მონაცემი კი აბსოლუტური ანტირეკორდია პანდემიის დაწყების დღიდან.
მანამდე გავრცელდა ინფორმაცია, რომ ინგლისის „პრემიერლიგა“ არ აპირებს მატჩების კალენდარში ცვლილებების შეტენას, მიუხედავად იმისა, რომ რამდენიმე გუნდში კორონავირუსის ინფექცია გავრცელდა.
[sexy_author_bio]
