20 ივნისის საქმეზე ძალოვანი უწყების კიდევ ერთ თანამშრომელს მოსამართლემ 10 ათას ლარიანი გირაო შეუფარდა.
სპეცრაზმელმა ბრალი ნაწილობრივ აღიარა. შსს-ს განსაკუთრებულ დავალებათა დეპარტამენტის თანამშრომლის ადვოკატმა მოსამართლეს გირაოს გამოყენების შუამდგომლობით მიმართა.
პროკურატურამ კი პატიმრობა მოითხოვა იმ მოტივით, რომ ბრალდებულის მხრიდან მოწმეებზე ზემოქმედების საფრთხე არსებობს. პროკურორი განმარტავს, რომ ბრალდებულის დანაშაულს აქციის მონაწილეების და შსს-ს თანამშრომლის ჩვენებები და მედიით გავრცელებული ჩანაწერები ადასტურებს. თუმცა მოსამართლე არსენ კალატოზიშვილმა პროკურატურის შუამდგომლობა სრულად არ დააკმაყოფილა.
„საქმე გვაქვს იარაღის გამოყენებით სამსახურებრივი უფლებამოსილების გადამეტების ფაქტთან. მის მიერ დანაშაულის ჩადენა გამოიხატა იმაში, რომ საპოლიციო ღონისძიების მიმდინარეობისას ახლო მანძილიდან დამიზნებით რეზინის ტყვია ფეხში ესროლა ორ ქალბატონს. ეს მოხდა ისეთ ვითარებაში, როცა ამ სახის და ინტენსივობის სპეციალური საშუალების გამოყენების წინაპირობა და აუცილებლობა არ არსებობდა. შედეგად ორმა ქალბატონმა მიიღო ჯანმრთელობის მნიშვნელოვანი დაზიანება. ბრალდების მხარის პოზიციაა რომ ბრალდებულის სათანადო ქცევას უზრუნველყოფს მისთვის აღკვეთის ღონისძიების სახით პატიმრობის გამოყენება“, – განაცხადა გიორგი მუჯირმა.
შეგახსენებთ, რომ 20 ივნისს საღამოს პარლამენტთან მშვიდობიანი აქციის შემდეგ, მომიტინგეების ნაწილმა შენობაში შეჭრა შტურმით სცადა. სპეცრაზმმა აქციის დაშლა დაიწყო და რამდენჯერმე გამოიყენა ცრემლმდენი გაზი, წყლის ჭავლი და რეზინის ტყვიები. შედეგად საავადმყოფოში გადაიყვანეს 240 ადამიანი, მათგან 80 სამართალდამცველი, 4 ადამიანს თვალი დაუზიანდა, ერთმა მოქალაქემ და ერთმა სამართალდამცველმა კი დაკარგა.
რუსთაველის გამზირზე აქცია მას შემდეგ დაიგეგმა, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა.
