ასტროლოგების თქმით, პლანეტები ადამიანების ცხოვრებაზე უმნიშვნელოვანეს გავლენას ახდენენ და როცა ისინი რეტროგრადულ მოძრაობას იწყებენ, გარკვეული სფეროები ფერხდება და განვითარებაში ხელი გვეშლება. 2023 წლის ზაფხულში რამდენიმე პლანეტა რეტროგრადულ მოძრაობას იწყებს და ძალიან მნიშვნელოვანია წინასწარ იმის განსაზღვრა, თუ რასთან უნდა ვიყოთ ყურადღებით:
2023 წლის 20 ივლისიდან პლანეტა ვენერა რეტროგრადულ მოძრაობას იწყებს:
პლანეტა ვენერა მიმართულებას წელიწად-ნახევარში ერთხელ იცვლის. ვენერა პასუხისმგებელია სილამაზეზე, სტილზე, გემოვნებასა და შემოქმედებითობაზე. ასევე, მას ,,სიყვარულის პლანეტას“ უწოდებენ და მნიშვნელოვან გავლენას ახდენს პირად ურთიერთობებზე. სწორედ ამიტომ, როდესაც ის რეტროგრადულ მოძრაობას იწყებს, ცხოვრების აღნიშნული სფეროები ფერხდება და გარკვეული პრობლემები იქმნება.
სილამაზის, იმიჯის, გარეგნობის ცვლილებების თვალსაზრისითაც იმპულსურ გადაწყვეტილებებს ნუ მიიღებთ. შესაძლოა, რეტროგრადული ვენერას დასრულების შემდეგ შედეგით უკმაყოფილო დარჩეთ და გადაწყვეტილება ინანოთ. იყავით ფრთხილად. როგორც აღინიშნა, გაგიჩნდებათ რადიკალური გადაწყვეტილებების მიღების სურვილი, თუმცა ჯობს, ყველა გადაწყვეტილების წინ კარგად დაფიქრდეთ. აღსანიშნავია, რომ ვენერა რეტროგრადულ მოძრაობას 2023 წლის 6 სექტემბრამდე გააგრძელებს.
ლანეტა ურანი 2023 წლის 29 აგვისტოდან რეტროგრადულ მოძრაობას იწყებს:
პლანეტა ურანი 2023 წლის 29 აგვისტოდან რეტროგრადულ მოძრაობას იწყებს და 2024 წლის 26 იანვარს დაასრულებს. პლანეტა ურანი ცვლილებებზეა პასუხისმგებელი და მოგიწევთ, საკუთარ შინაგან შიშებს, დაბრკოლებებს კარგად ჩაუღრმავდეთ და დაფიქრდეთ, რა გიშლით ხელს წარმატებაში. ეს პერიოდი, შესაძლოა, მნიშვნელოვანი აღმოჩენების დრო გახდეს და კარგი გაკვეთილიც მიიღოთ. ზუსტად განსაზღვროთ ის ცვლილებები, რომლებიც გსურთ, რომ თქვენს ცხოვრებაში გამოიწვიოთ.
პლანეტა იუპიტერი 2023 წლის 31 აგვისტოდან რეტროგრადულ მოძრაობას იწყებს:
პლანეტა იუპიტერი 2023 წლის 31 აგვისტოდან რეტროგრადულ მოძრაობას იწყებს და 2024 წლის 4 იანვრამდე გააგრძელებს. იუპიტერი პასუხისმგებელია სულიერ და მატერიალურ სიმდიდრეზე, სტატუსსა და ავტორიტეტზე. ეს არის პლანეტა, რომელსაც შეუძლია, ჩვენი შესაძლებლობები გააფართოვოს და, როგორც წესი, მისი რეტროგრადული პერიოდი ახალი ფასეულობების და ცხოვრების შესახებ შეხედულებების დანერგვის დრო ხდება. ეს გავლენა განსაკუთრებით საზოგადოებაზე იგრძნობა და არა მაინცდამაინც ინდივიდზე. ჩვეულებრივ, ასეთ პერიოდებში ჩნდება და ინერგება ახალი იდეალები და ახალი წესები, რომლებსაც პროგრესისაკენ მივყავართ. თუმცა, ფინანსურ სექტორთან დაკავშირებით ფრთხილად უნდა ვიყოთ და გარკვეული დანაზოგი გავაკეთოთ.
პლანეტა მერკური 2023 წლის 22 აგვისტოდან რეტროგრადულ მოძრაობას იწყებს:
პლანეტა მერკური 2023 წლის 22 აგვისტოდან რეტროგრადულ მოძრაობას იწყებს და 16 სექტემბრამდე გააგრძელებს. ასტროლოგიაში მერკური ტვინის ანატომიაზე, ადამიანის მეტყველებისა და აზროვნების თავისებურებებზეა პასუხისმგებელი. მერკური ასევე მოგზაურობასა და ვაჭრობას აკონტროლებს. მაშინ, როდესაც აღნიშნული პლანეტა ადამიანზე სათანადო გავლენას ვერ ახდენს, როგორც წესი, მას კომუნიკაცია ურთულდება, აზრების ჩამოყალიბება უჭირს და ვერც დიალოგში შედის მარტივად.
ასტროლოგები გირჩევენ, რომ ვიდრე პლანეტები რეტროგრადულ მოძრაობას დაიწყებენ და ცხოვრების იმ სფეროებს შეაფერხებენ, რომლებზეც პასუხისმგებელნი არიან, დაწყებული საქმეები დაასრულოთ. რეტროგრადული მერკურის პერიოდში, ასევე შეგიძლიათ, დრო თვითშემეცნებას, ახალი ცოდნისა და უნარების აღმოჩენას დაუთმოთ.
