(თავისუფალი სიტყვა) _ დღეს, თბილისის სააპელაციო სასამართლოს სისხლის სამართლის საქმეთა პალატა, 1995 წელს დაბადებული ე.ჯ.-ს საქმის განხილვას იწყებს.
წინასწარი გამოძიებისა და პირველი ინსტანციის სასამართლოს მიერ მიჩნეული გარემოებების თანახმად, მას ბრალად ედება მეუღლის, კახაბერ ვალიშვილის განზრახ მკვლელობა, რისთვისაც სასამართლომ მაქსიმალური სასჯელი -15 წლის ვადით თავისუფლების აღკვეთა მიუსაჯა. არასრულწლოვანების გამო, სს კოდექსის 88-ე მუხლის მე-3 ნაწილის საფუძველზე, ე.ჯ.-ს სასჯელი1/3-ით შეუმცირდა და სასჯელის სახით 10 წლით თავისუფლების აღკვეთა განესაზღვრა. დანაშაულის ჩადენის მომენტში, მსჯავრდებული 15 წლის იყო. მისი მეუღლე, შსს სავალდებულო სამხედრო სამსახურის თანამშრომელი, კახაბერ ვალიშვილი – 20 წლის.
საბრალდებო დასკვნის მიხედვით, გასული წლის 4 სექტემბრიდან, ე.ჯ. არარეგისტრირებულ ქორწინებაში იმყოფებოდა კახაბერ ვალიშვილთან. თანაცხოვრების პერიოდში, რომელიც შეუღლებიდან დაახლოებით ერთ თვეს გრძელდებოდა, ხშირად ხდებოდა მათ შორის კონფლიქტური სიტუაციები.
“2010 წლის 29 სექტემბერს, დაახლოებით 11 საათზე, ასეთი კამათის დროს, რომელსაც წინ უძღოდა კახაბერ ვალიშვილის მიერ – მეუღლის ე.ჯ-ს მისამართით გამოთქმული უკმაყოფილება, ქმარზე განაწყენებულმა ე.ჯ.-მ ჩაალაგა ტანსაცმელი და გადაწყვიტა მშობლების სახლში დაბრუნება, რისი საშუალებაც ქმარმა არ მისცა. მათი კამათი გადაიზარდა სიტყვიერ და ფიზიკურ შეურაცხყოფაში, რა დროსაც ქმარზე განაწყენებულმა ე.ჯ.-მ, შურისძიების მოტივით, მეუღლის განზრახ მოკვლის მიზნით, სამზარეულოს დანით, კ. ვალიშვილს გულმკერდის მარცხენა არეში მიაყენა ჭრილობა, რის შედეგადაც კ. ვალიშვილი ადგილზე გარდაიცვალა,”-წერია საბრალდებო დასკვნაში.
მსჯავრდებულის მხარე მიიჩნევს, რომ აღნიშნული განაჩენი უკანონო და არაობიექტურია, ის შეუსაბამოა საქმეში არსებულ მტკიცებულებებთან.
როგორც მსჯავრდებული საკუთარ ჩვენებებში აცხადებს, რომ ის მხოლოდ თავს იცავდა, წინააღმდეგ შემთხვევაში მეუღლე მას მოკლავდა. ე.ჯ.-ს ინტერესების დამცველი, ადვოკატი თამაზ ქოქოშვილი მიიჩნევს, რომ ეს იყო რეალური, ვინაიდან, ამ უკანასკნელს დანა ჰქონდა მიბჯენილი ე.ჯ-ს მუცელზე და ამ საფრთხის თავიდან ასაცილებლად თვითონაც განახორციელა საპასუხო ქმედება. ადვოკატის განმარტებით, ექსპერტიზის დასკვნა ადასტურებს, კახაბერ ვალიშვილის მიერ მასზე განხორციელებული ფიზიკური ძალადობის შედეგად მიღებული სხვადასხვა დაზიანებებს.
ადვოკატის მტკიცებით, კახა ვალიშვილმა, განაწყენებულმა იმით, რომ მისი მეუღლე აპირებდა სახლიდან წასვლას, წინასწარი შეცნობით, მას სიცოცხლისა და ჯანმრთელობისათვის საშიში ძალადობით აღუკვეთა თავისუფლება, კერძოდ, გასაღებით ჩაუკეტა კარები, დახურა ფანჯრები, რითაც საშუალება მოუსპო საშველად მოეხმო სხვა პირებისათვის. ამის შემდეგ სველი პირსახოცით დაუწყო ცემა, რათა ცემის კვალი არ დატყობოდა და განსაკუთრებული სისასტიკით განიზრახა ე.ჯ.-ს სიცოცხლის მოსპობა. ადვოკატის მტკიცებით, ე.ჯ. აუცილებელი მოგერიების ფარგლებში მოქმედებდა.
არასრულწლოვანი მსჯავრდებულის ინტერესების დასაცავად “ახალგაზრდა იურისტთა ასოციაციის” ადვოკატი, გაგი მოსიაშვილი ჩაერთო.
