გასულ კვირას, ქალაქ ოზურგეთში დემოკრატიული ჩართულობის ცენტრში NDI-ის ორგანიზებით და ხელშეწყობით, 2019 წლის ბიუჯეტის პროექტის განხილვა მოეწყო.
ოზურგეთის მუნიციპალიტეტის მერმა კონსტანტინე შარაშენიძემ, ოზურგეთის მუნიციპალიტეტის მერიის საფინანსო-საბიუჯეტო სამსახურის უფროსმა გია მამაკაიშვილმა, ოზურგეთის მუნიციპალიტეტის საკრებულოს თავმჯდომარემ დავით დარჩიამ და ოზურგეთის მუნიციპალიტეტის საკრებულოს თავმჯდომარის მოადგილემ გიორგი ღურჯუმელიძემ მოკლედ ისაუბრეს წლის მთავარი დოკუმენტის შესახებ.
როგორც კონსტანტინე შარაშენიძემ აღნიშნა, მისი ხელმძღვანელობის დროს მსგავსი შეხვედრა პირველად ტარდება.
მიუხედავად იმისა, რომ შეხვედრა საჯარო იყო, ბიუჯეტის პროექტის განხილვაზე მხოლოდ ერთი ან ორი თუ იყო ისეთი დამსწრე, რომელიც არ იყო საჯარო სამსახურების, მედიის, ან არასამთავრობო ორგანიზაციის წარმომადგენელი.
ოზურგეთის მერის განცხადებით, მომავალი წლის ბიუჯეტიდან თანხების ძირითადი ნაწილი მიმართული იქნება ინფრასტრუქტურულ პროექტებზე, სკოლამდელი და ზოგადი განათლების ხელშეწყობაზე, სოციალურ პროექტებზე, სპორტული და გასართობი მოედნების მშენებლობაზე.
“2019 წლის ბიუჯეტის პროექტში არ არის მოცემული გასახორციელებელი პროექტების აღწერილობითი ნაწილი, შუალედური და საბოლოო შედეგები და მათი გაზომვის ინდიკატორები. საბიუჯეტო წლის ბიუჯეტში უნდა აისახოს 2019 წლის გასახორციელებელი პროექტების აღწერილობითი ნაწილი შუალედური ან საბოლოო შედეგები და ინდიკატორები”, _ თქვა შეხვედრის დროს ოზურგეთის მუნიციპალიტეტის საკრებულოს თავმჯდომარის მოადგილემ გიორგი ღურჯუმელიძემ.
მანვე შეხვედრაზე ისაუბრა იმ რეკომენდაციების შესახებ, რომელიც გაუგზავნა საკრებულოს კომისიის და ფრაქციების წარმომადგენლებმა ოზურგეთის მუნიციპალიტეტის მერიას.
“ბიუჯეტის პროექტში გამოყოფილი ახალი ქვეპროგრამის _ “სოფლის მხარდამჭერი პროგრამების” დაფინანსებაზე წარმოდგენილი ბიუჯეტის პროექტი აღნიშნულ ქვეპროგრამასთან მიმართებაში არ იძლევა შესაძლებლობას, ცალკეული ადმინისტრაციული ერთეულებისთვის განსაზღვრული დაფინანსების ოდენობის შესახებ.
მუნიციპალიტეტისთვის დღემდე გადაუჭრელ პრობლემად რჩება შშმ პირთა ინტეგრაციის საკითხი. სამწუხაროდ, არამცთუ მუნიციპალიტეტის ინფრასტრუქტურა, ოზურგეთის მუნიციპალიტეტის ადმინისტრაციული შენობაც კი არ არის ადაპტირებული და შშმ პირებზე მორგებული. მიზანშეწონილია, 2019 წლის ბიუჯეტში ოზურგეთის მუნიციპალიტეტის ადმინისტრაციულ შენობაში შშმ პირთათვის ადაპტირებული გარემოს შექმნა;
ბიუჯეტში არ არის გათვალისწინებული არც ერთი ახალი საბავშვო ბაღის მშენებლობა, იმ ფონზე, როცა აღსაზრდელთა კონტიგენტის სიდიდის გამო, საბავშვო ბაღების ჯგუფები გადატვირთულია. კომისია მოითხოვს, 2019 წლის ბიუჯეტის პრიორიტეტების დოკუმენტში აისახოს აღნიშნული პრობლემა.
ასევე, გათვალისწინებულ უნდა იქნას სკოლამდელ დაწესებულებებში დასაქმებული პერსონალის ხელფასის ზრდა, მინიმუმ, 50 ლარის ოდენობით.
მიუხედავად მუნიციპალიტეტის ტერიტორიის დასუფთავების საქმეში მიღწეული ერთგვარი წარმატებისა, კვლავ შეინიშნება აღნიშნული მიმართულებით გარკვეული ხარვეზები. არასაკმარისია დღევანდელ რეალობასთან ადაპტირებული სანაგვე ურნების რაოდენობა”, _ თქვა გიორგი ღურჯუმელიძემ.
შეხვედრაზე, ასევე, ცნობილი გახდა, რომ სოფლის განვითარების მხარდაჭერის პროგრამის გახორციელება 2019 წლისთვის იგეგმება.
“გურია ნიუსი” დაინტერესდა, ჩატარდა თუ არა სოფლის კრებები, რაზეც გია მამაკაიშვილმა გვიპასუხა:
“სოფლის განვითარების პროგრამა ადგილობრივი ბიუჯეტიდან დაფინანსდება, ასევე, დამატებით 500 000 ათასი ლარი წამოვა ცენტრალური ბიუჯეტიდან. ოზურგეთის მუნიციპალიტეტის მერი იმყოფებოდა ფინანსთა სამინისტროში და ეს პროექტები 2019 წელს გახორციელდება. ოფიციალურად სოფლებში დაიგზავნა მიმართვა, რომელსაც ჰქონდა თანდართული ცხრილი, თანხებიც თანაბრად გადანაწილდა. ასევე, ჩატარებულია სოფლებში კრებები. შეივსო ანკეტები, რომლის შევსებაში მოსახლეობა იყო ჩართული და მათ ჩაწერეს იმ პრობლემების შესახებ, რომელიც მომავალ წელს უნდა გადაიჭრას”, _ გვითხრა მამაკაიშვილმა.
“გურია ნიუსი” დაინტერესდა, თუ რატომ არ ჩატარდა “შემოქმედობა” მაშინ, როცა ჩატარდა სხვა სოფლის დღესასწაულები _ “ასკანობა” და “ექვთიმეობა”; ასევე, როდისთვის იგეგმება ვარლამ სიმონიშვილის ეთნოგრაფიული მუზეუმის გახსნა (მკითხველს შევახსენებთ, რომ შენობა უკვე ერთ წელზე მეტია აშენებულია):
“მე კონკრეტული პასუხის გაცემა არ შემიძლია, რატომ არ ჩატარდა “შემოქმედობა”, როდესაც ჩატარდა “ასკანობა” და “ექვთიმეობა”, მაგრამ ღონისძიებები, რომელიც წელს არ ჩატარდა, გაისად აუცილებლად ჩატარდება”, _ გვიპასუხა გია მამაკაიშვილმა.
კონსტანტინე შარაშენიძემ მხოლოდ მუზეუმის გახსნის შესახებ გვიპასუხა:
“მუზეუმის გახსნა იგეგმება. წელს მანდ იმართება კალანდობა და ასევე, პარალელურად მოხდება მუზეუმის გახსნა”.
შეხვედრაზე არასამთავრობო ორგანიზაციის _ “ჩვენი შვილების” თავმჯდომარემ ნინო ჭელიძემ აღნიშნა, რომ ოზურგეთის მუნიციპალიტეტის მერიას ორი პროექტი წარუდგინა:
“პირველი პროექტი ეხებოდა ეპილეფსიის დიაგნოზის მქონე პირებისთვის წამლების ყიდვას. მეორე არის პამპერსების პროექტი, რომელიც ითვალისწინებს პამპერსების გადაცემას იმ ადამიანებისთვის, ვისაც ჭირდება, ზოგადად, შშმ პირებს”, _ თქვა ნინო ჭელიძემ.
გია მამაკაიშვილის ინფორმაციით, 10 დეკემბრამდე უნდა მოხდეს რეკომენდაციების გათვალისწინება და ზუსტად მაშინ გახდება ცნობილი, რა მომავალი უწერია “ჩვენი შვილების” მიერ წარდგენილ პროექტს.
