გასულ კვირაში ოზურგეთის მუნიციპალიტეტის საკრებულოს ორი სხდომა ჩატარდა. აქედან, პირველ სხდომაზე საუბარი 2021 წლის ბიუჯეტის შესახებ იყო _ ოზურგეთის მუნიციპალიტეტის მერიის საბიუჯეტო განყოფილების უფროსის პავლე ჭყონიას თქმით, პანდემიიდან გამომდინარე ბიუჯეტის პროექტში მცირედი შესწორება შევიდა.
“ჩვენი ბიუჯეტი 2021 წელს 25 104 000 ლარი იქნება. ოზურგეთის მუნიციპალიტეტის 2020 წლის ბიუჯეტის პროექტით შემოსულობები განსაზღვრულია 25 104,0 ათასი ლარით.
ბიუჯეტის შემოსავლებში დამატებული ღირებულების გადასახადის სახით განსაზღვრულია შემოვიდეს 14 818,6 ათასი ლარი.
ბიუჯეტის შემოსავლებში გათვლილია, რომ ქონების გადასახადი შემოვიდეს 7 000,0 ათასი ლარის ფარგლებში.
ადგილობრივი მოსაკრებლები და გადასახდელები გაანგარიშებულია 2 640,0 ათას ლარზე, მათ შორის: დასახლებული ტერიტორიის დასუფთავებისთვის მოსაკრებელი _ 250,4 ათასი ლარი; შერეული და სხვა არაკლასიფიცირებული შემოსავლები _ 300,0 ათასი ლარი; ბუნებრივი რესურსებით სარგებლობისთვის _ 600,0 ათასი ლარი; ჯარიმები, სანქციები და საურავები _ 1 200,0 ათასი ლარი; მშენებლობის ნებართვისთვის _ 150,0 ათასი ლარი; სათამაშო ბიზნესის მოსაკრებელი _ 120,0 ათასი ლარი; არასაბაზრო წესით გაყიდული საქონელი და მომსახურება _20,0 ათ. ლარი.
არაფინანსური აქტივების კლებაში 250.0 ათასი ლარია გათვალისწინებული, აქედან: მიწის გაყიდვიდან _ 345.0 ათასი ლარი. ძირითადი აქტივების კლება _ 50.0 ათასი ლარი;
პროექტით გათვალისწინებულია ცენტრალური ბიუჯეტიდან მიზნობრივი დანიშნულების ტრანსფერის გამოყოფა (დელეგირებული უფლებამოსილების გასახორციელებლად) – 250,0 ათასი ლარი”, _ აღნიშნა პავლე ჭყონიამ.
მისივე თქმით, ადმინისტრაციული ხარჯები, როგორც წინა წელს, 2021 წელსაც იგივე რაოდენობის რჩება:
“მუნიციპალიტეტის წარმომადგენლობითი და აღმასრულებელი ორგანოების შენახვაზე დაიხარჯება 5 313,7 ათასი ლარი, მათ შორის: წარმომადგენლობითი ორგანოების შენახვაზე _ 1 150,0 ათასი ლარი, კერძოდ: შრომის ანაზღაურება _ 808,4 ათასი ლარი, ხოლო საქონელი და მომსახურება _ 202,8 ათასი ლარი, სხვა ხარჯები _ 118,8 ათასი ლარი, არაფინანსური აქტივების ზრდა _ 20.0 ათასი ლარი.
აღმასრულებელი ორგანოების შენახვაზე დაიხარჯება 3 440,0 ათასი ლარი, კერძოდ: შრომის ანაზღაურების მუხლში 2 629,0 ათასი ლარი, ხოლო საქონელი და მომსახურების მუხლში _ 761,0 ათასი ლარი, არაფინანსური აქტივების ზრდა _ 50,0 ათასი ლარი.
სარეზერვო ფონდი განსაზღვრულია 350,0 ათასი ლარით; წინა წლებში წარმოქმნილი ვალდებულებების დაფარვა და სასამართლოს გადაწყვეტილებების აღსრულების ფინანსური უზრუნველყოფა – 230,7 ათასი ლარი;, თავდაცვის ღონისძიებებზე – სამხედრო აღრიცხვისა და გაწვევის სამსახურის შენახვაზე დაიხარჯება 143,0 ათასი ლარი. დასუფთავება და ნარჩენების გატანა _ 2 900,0 ათასი ლარი”.
პავლე ჭყონიას თქმით, 2021 წლის იანვრიდან, ოზურგეთში სკოლამდელი აღზრდის დაწესებულების 800-ზე მეტ თანამშრომელს ხელფასი 50 ლარით გაეზრდება. მისივე თქმით, ხელფასების მომატება არ არის განსაზღვრული ა(ა)იპ “ოზურგეთის მუნიციპალიტეტის სკოლამდელი აღზრდის ცენტრის” თანამშრომლებისთვის:
“ეს 50-ლარიანი მატება მოხდება ბაღის თანამშრომლებზე. 800-ზე მეტ თანამშრომელს მოემატება ხელფასი”, _ თქვა ჭყონიამ.
როგორც საკრებულოს სხდომაზე ითქვა, ხელფასების მომატება ფრაქცია “ქართული ოცნების” რეკომენდაცია იყო და ეს რეკომენდაცია მერიამ გაითვალისწინა.
ოზურგეთის მუნიციპალიტეტის საკრებულოს წევრმა, ვასილ ჩიგოგიძემ საკრებულოს სხდომაზე იკითხა, დაიფარება თუ არა ოზურგეთის ალექსანდრე წუწუნავას სახელობის დრამატული თეატრის კომუნალური ხარჯები, როგორც ეს მიმდინარე წელს მოხდა.
მისი თქმით, კომუნალური ხარჯები 200 000 ათას ლარს შეადგენს და ამის დაფარვა თეატრის ბიუჯეტიდან ვერ მოხერხდება.
სხდომაზე ოზურგეთის მუნიციპალიტეტის მერიის საბიუჯეტო-საფინანსო სამსახურის უფროსმა გია მამაკაიშვილმა აღნიშნა, რომ როგორც წინა წელს, ისევე, მომავალ წელს აღნიშნული ხარჯებისთვის 5 000 ლარი იქნება გამოყოფილი.
“პანდემიის დროს თანხის მატება ამ კუთხით ვერ მოხდება. ამ ეტაპზე ეს შემიძლია ვთქვა. ვნახოთ, მომავალში, რა იქნება”, _ თქვა მამაკაიშვილმა.
ოზურგეთის მუნიციპალიტეტის საკრებულოს წევრი მაია ზოიძე სხდომაზე ახალი ინიციატივით გამოვიდა _ მან ოზურგეთის მუნიციპალიტეტის მერიის წარმომადგენლებს ჰკითხა, რამდენად შესაძლებელია ადგილობრივი ბიუჯეტიდან სოციალურად დაუცველი სტუდენტების სწავლის საფასურის ნაწილობრივ დაფინანსება:
“აქ არ არის სრულ დაფარვაზე საუბარი _ ერთჯერადი თანხა რომ დაწესდეს ან 500 ლარი, ან 400 ლარი. ვფიქრობ, რომ ამ კუთხით დახმარება სჭირდებათ სტუდენტებს”, _ თქვა მაია ზოიძემ.
ოზურგეთის მუნიციპალიტეტის მერიის საფინანსო-საბიუჯეტო სამსახურის უფროსის, გია მამაკაიშვილის თქმით, ამ ეტაპზე ამ კუთხით აღმასრულებელი ხელისუფლება არ მუშაობს:
“ოზურგეთის მუნიციპალიტეტის საკრებულოს მიერ წარმოდგენელი პროექტით ხდება 100%-იანი გრანტის მფლობელები ოზურგეთელი სტუდენტებისთვის ერთჯერადი თანხის გადაცემა. ამ ეტაპზე ვერ მოხერხდება ამ ინიციატივის შესრულება”, _ თქვა გია მამაკაიშვილმა.
სივრცით-ტერიტორიული დაგეგმარების და ინფრასტრუქტურის კომისიის თავმჯდომარემ ლავრენტი ბიგვავამ იკითხა, გააკეთა თუ არა ოზურგეთის მუნიციპალიტეტის მერიამ შენიშვნების რეესტრი 2021 ბიუჯეტის პროექტზე:
“მე სრულად დოკუმენტაცია არ მინახავს. მინდა, გია მამაკაიშვილს და პავლე ჭყონიას ვკითხო _ ახლავს თუ არა ბიუჯეტის ახლად წარმოდგენილ კორექტირებული პროექტის ვარიანტს შენიშვნების რეესტრი, რომელზედაც თქვენ პასუხი გექნებათ გაცემული, გაითვალისწინეთ თუ არ გაითვალისწინეთ საკრებულოდან მოცემული შენიშვნები?”
მამაკაიშვილმა ბიგვავას უპასუხა, რომ შენიშვნების რეესტრი აუცილებლად გაეგზავნება საკრებულოს.
“ეს აუცილებელია. ჯერ არ ვიცით, რა არის გათვალისწინებული და აქედან გამომდინარე, ახალი წინადადების წამოყენებას აზრი არ აქვს. ეს პროცესი უნდა იყოს მართვადი და ყველა ეტაპი უნდა გავიაროთ ისე, როგორც არის დადგენილი. მსგავსი ქმედება უშლის ხელს საერთო საქმეს, ამიტომ დროულად უნდა მოხდეს ამ რეესტრის წარმოდგენა. ასეთი მიდგომით ჩვენ შორს ვერ წავალთ. რაზეც იყო შენიშვნები, იმაზე თუ არ გვაქვს პასუხები, ახალ შენიშვნებზე როგორ უნდა ვისაუბროთ?! იმედს ვიტოვებ, რომ ორ-სამ დღეში შენიშვნების რეესტრი საკრებულოს გადმოეგზავნება”, _ აღნიშნა საკრებულოს სხდომაზე ლავრენტი ბიგვავამ.
გია მამაკაიშვილის თქმით, შენიშვნების რეესტრი საკრებულოს აუცილებლად გადაეგზავნება.
თანასწორობის საბჭოს თავმჯდომარის ლელა საჯაიას თქმით, მათ მიერ წარდგენილ ხუთი საკითხიდან მხოლოდ ერთი საკითხის გათვალისწინება მოახერხა ოზურგეთის მუნიციპალიტეტის მერიამ.
2021 წელს მოხდება ოზურგეთის მუნიციპალიტეტის გენდერული თანასწორობის სტრატეგიის შემუშავება.
“გურია ნიუსი” დაინტერესდა თუ რომელი საკითხები ვერ დააფინანსა ოზურგეთის მუნიციპალიტეტის მერიამ.
როგორც “გურია ნიუსს” განუმარტეს, ეს საკითხებია: ქალაქ ოზურგეთში მუნიციპალიტეტის ადმინისტრაციული შენობის ადაპტირება/ლიფტი, საპირფარეშო; სახელმწიფო ზრუნვის პროგრამებიდან გასული ახალგაზრდების მხარდაჭერა ეკონომიკური გაძლიერების მიმართულებით; ფსიქიური პრობლემების მქონე პირთა ოჯახის წევრების ფსიქო-სოციალური რეაბილიტაცია; ფსიქოლოგის მომსახურება და ადაპტირებული საზოგადოებრივი საპირფარეშოს გახსნა ქალაქის ტერიტორიაზე შშმ პირებისა და ბავშვთა მოვლის სერვისის გათვალისწინებით.
ოზურგეთის მუნიციპალიტეტის საკრებულოს მეორე სხდომაზე, რომელიც გასული კვირის პარასკევს გაიმართა, მხოლოდ ერთი საკითხი განიხილეს.
ოზურგეთის მუნიციპალიტეტის მერიის საბიუჯეტო განყოფილების უფროსმა პავლე ჭყონიამ სხდომაზე ოზურგეთის მუნიციპალიტეტის 2020 წლის დამტკიცებულ ბიუჯეტში ცვლილებებისა და დამატებების შეტანის შესახებ ისაუბრა.
მისი თქმით, 2020 წლის ბიუჯეტი 525 205 ათასი ლარით გაიზარდა, რომელიც, უმეტესად, მოხმარდება სხვადასხვა პროექტის გახორციელებას.
ჭყონიასვე ინფორმაციით, ბიუჯეტი 100 000 ლარით გაიზარდა შემოსავლების და გადასახდელების ნაწილში:
“ეს არის გრანტი. გაეროს განვითარების პროგრამის პროექტის პირველი ნაწილისთვის მოხდა 100 000 ლარის ჩარიცხვა, რომელიც დაბა გომისმთის ურბანული განვითარების გეგმისა და შესაბამისი დოკუმენტების შემუშავებისთვის დაიხარჯება”.
ოზურგეთის მუნიციპალიტეტის მერიიდან წარმოდგენილ დამტკიცებულ ბიუჯეტში შესული ცვლილებები საკრებულოს წევრებმა ერთხმად მიიღეს.
ოზურგეთის მუნიციპალიტეტის საკრებულოს წევრი ვასილ ჩიგოგიძე გამოვიდა ინიციატივით, რომ ოზურგეთის ალექსანდრე წუწუნავას სახელობის დრამატული თეატრის წინ მდებარე მოედანს ოფიციალურად დაერქვას “თეატრალური მოედანი”, რომელიც საზოგადოებისთვისაც ასეა ცნობილი:
“ამ საკითხის დაყენება ჩემგან არ შეიძლება. ეს საკითხი ან ოზურგეთის მუნიციპალიტეტის მერიამ ან კიდევ საკრებულოს რომელიმე კომისიამ უნდა შემოიტანოს. კარგი იქნება, თუ ეს საკითხი გადაწყდება პანდემიის დასრულებისთანავე.
ღმერთით და უფლის ძალით, 2021 წელს ჩვენ გავხსნით თეატრის შენობას. სამწუხაროა, რომ ახალგარემონტებული თეატრის შენობა არ გაქვთ ნანახი. მიუხედავად პანდემიისაა, ჩვენ უკვე მეშვიდე პრემიერას ვიბარებთ. როდესაც არ იქნება შეზღუდვები და გვექნება სპექტაკლებზე ადამიანების მოწვევის უფლება, შვიდივე სპექტაკლს ვაჩვენებთ. ყოველ კვირას წარვუდგენთ ახალ სპექტაკლს საზოგადოებას”, _ თქვა სხდომაზე ვასილ ჩიგოგიძემ.
საკრებულოს წევრი ლევან კილაძე დაინტერესდა, იგეგმება თუ არა მზრუნველობას მოკლებულთათვის ან სოციალურად დაუცველებისთვის საახალწლოდ ან საშობაოდ საჩუქრების დარიგება:
“გარე განათებისთვის გამოცხადებული იყო ტენდერი, შემდეგ ოზურგეთის მუნიციპალიტეტის მერის ინიციატივით მოხდა ამ ტენდერის შეჩერება, რადგან მოგეხსენებათ, გამოცხადებულია შეზღუდვები პანდემიის გამო. მოკლედ, იქნება ძველი განათება და ის თანხა მოხმარდება საჩუქრებს. დაახლოებით, 20 000 ათას ლარზეა საუბარი და კონკრეტული ინფორმაციისთვის იქნებ მარინა ჯაფარიძეს ვკითხოთ, რადგან მან იცის ზუსტად, რა კატეგორიას გადაეცემა საჩუქრები”, _ უპასუხა პავლე ჭყონიამ ლევან კილაძეს.
დამოუკიდებელმა დეპუტატმა ლევან მგელაძემ ისაუბრა ქალაქ ოზურგეთში, ექადიაზე ფერადი ლითონების ქარხნის მშენებლობაზე და ასევე, სოფელ ვაკიჯვარში ჰიდროელექტროსადგურის მშენებლობის შესახებ.
მგელაძის თქმით, სოფელ ვაკიჯვარში გარემოს ზემოქმედების შეფასების სხდომა 24 დეკემბერს იგეგმება ონლაინ რეჟიმში, რაც მოსახლეობისთვის მიუღებელია:
“ამ სხდომას ვერ დაესწრება მოსახლეობა. შესაძლებელია, დაესწროს ერთი ან ორი ადამიანი. აქედან გამომდინარე, ამ საკითხის შესწავლა დროულად დაევალოს რომელიმე კომისიას და დაეგზავნოს შესაბამის უწყებებს წერილები, რადგან მოხდეს გზშ-ს განხილვები ონლაინ. ამ განხილვებში აუცილებლად უნდა ჩაერთოს ხალხი”, _ თქვა ლევან მგელაძემ.
ლელა საჯაიას თქმით, უნდა შეიქმნას სპეციალური სამუშაო ჯგუფი, რომელიც მოამზადებს წერილებს და ასევე, განახორციელებს მონიტორინგს:
“მძიმე ეკოლოგიურ გარემოში გვიწევს ცხოვრება და აქედან გამომდინარე, მსგავსი პროექტები დიდ ყურადღებას საჭიროებს”, _ აღნიშნა ლელა საჯაიამ.
ოზურგეთში ფერადი ლითონების ქარხნის მშენებლობის გამო, გარემოს ზემოქმედების შეფასების წარდგენა დაგეგმილია 2021 წლის 28 იანვარს. ადგილობრივი უფლებადამცველები და მოსახლეობა აქაც წინააღმდეგია გზშ-ს განხილვა ონლაინ რეჟიმში მოხდეს.
ოზურგეთის მუნიციპალიტეტის საკრებულოს თავმჯდომარე მზად არის, რომ შეიქმნას სპეციალური სამუშაო ჯგუფი და მოხდეს სხდომაზე წამოჭრილი საკითხების სიღრმისეული შესწავლა.
