2022 წელს შემოქმედის ეპარქიაში შობის დღესასწაულზე “ალილო” განსხვავებული სახით ჩატარდება, _ ამის შესახებ განცხადებას ოზურგეთის მუნიციპალიტეტის საკრებულოს წევრი ხათუნა ცერცვაძე ავრცელებს.
“სრულიად საქართველოს კათოლიკოს-პატრიარქის ლოცვა-კურთხევით 2000 წლიდან ქრისტეშობის დღესასწაულზე მთელ საქართველოში ტრადიციული საზეიმო მსვლელობა – “ალილო” ეწყობა.
ეს დღესასწაული წელსაც ჩატარდება ოზურგეთში თუმცა ხალხის მსვლელობის გარეშე და პანდემიის გამო დაწესებული რეგულაციების სრული დაცვით.
კერძოდ სამღვდელოება მოსახლეობას დალოცავს ,ისინი მანქანებიდან ნაკურთხი წყლის სხურებით ,კმევითა და გალობით მიულოცავს შობის ბრწყინვალე დღესასწაულს, ასევე გამობრძანებული იქნება თამარ მეფის საწინამძრვრო ჯვარი რომლიც არის შემოქმედის ეპარქიის ერთ-ერთი უდიდესი სიწმინდე რომლითაც დაილოცება მოსახლეობა.
მანქანებით მსვლელობა დაიწყება 7 იანვარს 13 საათზე ოზურგეთის საკათედრო ტაძრიდან, რომელიც დასრულდება 15 საათზე ქრისტესშობის სამადლობელი პარაკლისით.
ასევე ტრადიციისამებრ შეგროვდება საჩუქრები, ტანსაცმელი, სათამაშოები და ნუგბარი, რომელიც ბავშვთა სახლებს, მოხუცთა თავშესაფრებსა და უპოვარ ადამიანებს დაურიგდებათ.
მსურველებს შემოწირულების მოტანა შეეძლებათ 7 იანვარს, 12 საათიდან ოზურგეთის საკათედრო ტაძრის მოპირდაპირედ მდებარე ეპარქიის დარბაზში ასევე შესაძლებელი იქნება შემოწირულობის ავტომანქანებზე მოთავსებაც .
2022 წელს შობის დღესასწაული ყველამ ერთად ვიზეიმოთ, საჩუქრები და სიხარული პირველ რიგში მივუტანოთ იმ ადამიანებს, რომელთაც ყველაზე მეტად სჭირდება თანადგომა“,_ წერია განცხადებაში..
