ქართველი კრიმინალური ავტორიტეტები საფეხბურთო გრანდების ფინანსებს განაგებენ _ საუბარია ყველასათვის ცნობილ ესპანურ კლუბ “ბარსელონაზე”. ამ სკანდალურ ინფორმაციას გავლენიანი ესპანური გამოცემა “მარკა” ავრცელებს. გაზეთის ცნობით, კატალონიური გუნდის მენეჯმენტში ტარიელ ონიანის მარჯვენა ხელი, წარსულში ორჯერ ნასამართლევი, ვინმე გიორგი მიქაძე მუშაობდა. კლუბის ყოფილმა პრეზიდენტმა ონიანის მოთხოვნით, მიქაძეს რამდენიმე საპასუხისმგებლო მიმართულება ჩააბარა. ფინანსურ ოპერაციებში მიქაძის მეუღლეც ფიგურირებს. აღნიშნულ ინფორმაციას ტელეკომპანია “იმედი” ავრცელებს.
როგორც ცნობილი ხდება, მიქაძე “ბარსელონას” დირექტორატში გავლენიანი ფიგურა მანამდე იყო, რაც ესპანურ გრანდს პრეზიდენტად სანდრო როსელი არ მოევლინა. ეს კი თვეების წინ მოხდა. მანამდე კატალონიელებს ხუან ლაპორტა თავკაცობდა და დიდ წარმატებებსაც მიაღწია. საინტერესოა ის ფაქტი, რომ როსელი ლაპორტას მთავარ მრჩევლად მუშაობდა და სავარაუდოდ, გიორგი მიქაძესაც იცნობდა. მიქაძე გახმაურებული სპეცოპერაცია “კრაზანას” დროს დააკავეს და მისი სახელი ტარიელ ონიანთან არის დაკავშირებული. მართალია, “მარკა” ვერ ამტკიცებს, მიქაძეს “ბარსაში” მუშაობის დროს რაიმე გადაცდომები თუ ჰქონდა, მაგრამ ფაქტია, ქართველები ისეთ სახელოვან გიგანტს აკონტროლებდნენ, თუნდაც გარკვეული დოზით, როგორიც “ბარსელონაა”.
არავინ იცის, რა მოხდა როსელის კლუბში მისვლის შემდეგ და რატომ გაუშვეს დირექტორატიდან ქართველი ცოლ-ქმარი. მხოლოდ ვარაუდების თქმა შეგვიძლია _ ადგილი აქვს გავლენათა გადანაწილებას, ახალ გადანაწილებაში კი მიქაძეები ვერ მოხვდნენ. არის თუ არა ეს ონიანის გავლენებზე “შეტევა”, ჯერ კიდევ საკითხავია. “იმედზე” გასული სიუჟეტი მის გაპოპულარებას უფრო უწყობს ხელს _ შეხედეთ, “ბარსელონასაც” კი ონიანი პატრონობსო. ხელისუფლებასაც პიარი გამოუვიდა, ჩვენგან გაძევებულ მაფიოზებს უცხოეთშიც როგორ მისდევენო.
რა თქმა უნდა, ონიანისა და მიქაძის მაფიოზობით, ხუან ლაპორტას რეპუტაციაც შეილახა. როგორი საქმეა პრეზიდენტმა კლუბში მიიყვანოს მაფიოზები? რატომღაც ტელეკომპანია “იმედს” “დაავიწყდა”, რომ ეს ის ლაპორტაა, რომელსაც მიხეილ სააკაშვილი შეხვდა! მეტიც, ქვეყნის პრეზიდენტი “ბარსას” ქომაგად მოგვევლინა, ლაპორტამ კი მას კატალონიური გრანდის მაისური გადასცა წარწერით: “სააკაშვილი”. ზუსტად იმ პერიოდში მუშაობდა “ბარსას” დირექტორატში მიქაძეც და მისი მეუღლეც! ამასთან, ძნელი წარმოსადგენია, საფეხბურთო გრანდის თავკაცს საქართველოს პრეზიდენტთან შეხვედრისთვის ბევრი ეწვალა. ეს იმ დროს ჯერ კიდევ “ევროიზოლაციაში” მყოფ საქართველოს ხელისუფლებას უფრო სჭირდებოდა.
მაშინ ამ საქმის “მოკვარახჭინება” და გიორგი ჭანტურიას “ბარსელონას” ახალგაზრდულ გუნდში გადაყვანა მინისტრ ზურაბ პოლოლიკაშვილის სახელს უკავშირდებოდა. არავინ და მათ შორის, მინისტრიც არ მალავდა, რომ ჭანტურიას ტრანსფერი “ბარსელონაში” მომუშავე ქართველი ქალბატონის დამსახურება იყო. ეს ქართველი მანანა გერგაძე გახლდათ _ “მაფიოზ გიორგი მიქაძის” მეუღლე. სწორედ ცოლ-ქმრის დამსახურება იქნებოდა საქართველოსა და “ბარსელონას” პრეზიდენტების შეხვედრაც. მაშინ, საქართველოს პრეზიდენტისთვის ლაპორტას “მხარდაჭერა” მართლაც მნიშვნელოვანი იყო. როგორც ჩანს, იმ დროს მიქაძე მაფიოზი “აღარ იყო” და “ახლა ისევ არის”. ერთი დეტალიც _ სააკაშვილი-ლაპორტას შეხვედრისას ორივე პრეზიდენტს გაფიცვებს (რა თქმა უნდა, სხვადასხვა თემაზე) უწყობდნენ და თავიანთი სავარძლები “კბილებით ეჭირათ”. ახლა წარმოიდგინეთ, ონიანის ნების გარეშე რამდენად იყო შესაძლებელი ლაპორტა-სააკაშვილის შეხვედრა?! იგივე მიქაძის საშუალებით “კანონიერ ქურდს” ხომ თავისუფლად შეეძლო, ეს შეხვედრა ჩაეშალა?!
ერთი საინტერესო დეტალიც _ რატომღაც “იმედზე” გასულ სიუჟეტში “გადაიფარა”, რომ ქართველ ცოლ-ქმართან ერთად, კლუბი ქართველმა ფეხბურთელმა, გიორგი ჭანტურიამაც დატოვა. თუმცა, მას მაფიოზად ვერ მონათლავდნენ _ ამით ხომ ის გამოვიდოდა, “ბარსელონადან” არა მხოლოდ მაფიოზები, არამედ ზოგადად ქართველები გამოუშვესო.
რაც შეეხება ჭანტურიას, იგი ჰოლანდიურ “ვიტესში” მერაბ ჟორდანიასთან გადავიდა. სავარაუდოდ, სწორედ ჟორდანია დაეხმარა მას “ბარსელონაში” მოწყობაში, თუნდაც, იგივე მიქაძესთან შუამდგომლობისას. ცნობილი ფაქტია, რომ ჟორდანია მსოფლიო ფეხბურთში გავლენიან ფიგურად იქცა. როგორც ირკვევა, საფეხბურთო სამყაროში გავლენიან ფიგურად, ოღონდ ჟორდანიასგან განსხვავებით, არასაფეხბურთო კუთხით, ტარიელ ონიანიც მიიჩნევა.
თავის დროზე, სწორედ ონიანის სახელს უკავშირებდნენ საქართველოს ფეხბურთის ფედერაციის არჩევნებში მერაბ ჟორდანიას გამარჯვებას ბადრი პატარკაციშვილის კანდიდატ დავით პეტრიაშვილზე. მაშინ ისიც ითქვა, რომ ქართველი ბიზნესმენის ოფისში საფრანგეთიდან ზარი გაისმა შემდეგი ტექსტით: _ ქართული ფეხბურთი ჩემი ინტერესია და არ მიყვარს, როცა ჩემს საქმეებში ერევიან. ამას მოჰყვა პატარკაციშვილის უკან დახევა და დღეს კი უკვე ისიც, რომ ონიანის ინტერესი მხოლოდ ქართული ფეხბურთი არ ყოფილა.
მაშინ, როცა “ბარსელონადან” ქართველ ცოლ-ქმარს უშვებენ, კატალონიურ გრანდთან ურთიერთობას მერაბ ჟორდანია ამყარებს. იმის შესახებ, რომ ჟორდანია მსოფლიო ფეხბურთის ჰოლანდიელ ლეგენდას, “ბარსელონას” რუხ კარდინალად მიჩნეულ იოჰან კრუიფს შეხვდა, ჩვენი მკითხველი უკვე არის ინფორმირებული.
