ოზურგეთში, ბოლო ორი თვის განმავლობაში, მუნიციპალიტეტის გამგეობის მიერ, უძრავ ქონებებზე და მიწის ნაკვეთებზე აუქციონები დაჩქარებული ტემპით ჩატარდა.
გასასხვისებელი ქონების ფასი, საკმაოდ დაბალი იყო. თუმცა, აუქციონებში, ძირითადად ორი კონკურენტი იღებდა მონაწილეობას.
ერთ-ერთი ნაკვეთი, მოქმედი გამგებლის სიძემ (შვილის ქმარმა) ლაშა ლომაძემ შეიძინა, კვადრატული სულ რაღაც 12 ლარად და 70 თეთრად.
ოფიციალური დოკუმენტების მონაცემებით: გ. ეპისკოპოსის ქუჩაზე მდებარე უძრავი ქონება შენობა-ნაგებობა განაშენიანების ფართის 603 კვ.მ და მასზე დამაგრებული 1335 კვ.მ არასასოფლო-სამურნეო დანიშნულების მიწის ნაკვეთი ზ. დამენიას ქუჩაზე #21 -ში მცხოვრებმა ლაშა ლომაძეზე 16 989 ლარად გასხვისდა.
ოფიციალური დოკუმენტების საფუძველზე, 2014 წლის 17 ივნისს, ოზურგეთის მუნიციპალიტეტის გამგეობის მიერ გამართულ აუქციონში მონაწილეობა მიიღო ნ. ნიკოლაძის ქუჩაზე # 23 -ში მცხოვრებმა, სანდრო სანიკიძემ, რომელმაც ნიკოლაძის ქ. # 5ში მდებარე 1175 კვ.მ. არასასოფლო სამეურნეო მიწის ნაკვეთი შეიძინა 8096 ლარად. როგორც ირკვევა, მან კვადრატული 6 ლარად და 80 თეთრად იყიდა.
ჟღენტის ქუჩაზე მდებარე 400 კვ.მ. არასასოფლო -სამეურნეო დანიშნულების მიწის ნაკვეთი აკაკი წერეთლის ქ. #13 _ ში მცხოვრებმა მიხეილ ხელაძემ 2590 ლარად შეიძინა.
სოფელ ნატანებში მდებარე 6358 კვ.მ არასასოფლო სამეურნეო დანიშნულების მიწის ნაკვეთზე საჯარო აუქციონში მონაწილეობა მიიღო, ქ. თბილისში ლეხ. კაჩენსკის ქ. #13 ბინა #60 -ში მცხოვრებმა ლია სამადაშვილის მინდობილმა პირმა გიგა მახარაძემ მიიღო და აღნიშნული ქონება 82 950 ლარად შეიძინა.
სოფელ დვაბზუში მდებარე 7661 კვ.მ არასასოფლო-სამეურნეო დანიშნულების მიწის ნაკვეთზე პირობიან აუციონში მონაწილეობა მიიღო შპს “კახური ტრადიციული მეღვინეობის“ წარმომადგენელმა მინდობილობით ეკატერინე გოგოლაძე,. რომელმაც აღნიშნული ქონება 25 757 ლარად.
რატომ გასხვისდა დაჩქარებული ტემპით მიწები და ტერიტორიები ოზურგეთში, იკვეთება თუ არა აუქციონში გამარჯვებულ პიროვნებებთან, გამგებლის, კოტე შარაშენიძის პირადი ინტერესები?
მუნიციპალიტეტის გამგეობის პრესსამსახურის მიერ ოფიციალურად მოწერილი პასუხი ასეთია:
"2014 წლის 17 ივნისს ოზურგეთის მუნიციპალიტეტში ჩატარებულ აუქციონში მონაწილეობა შემოსული განცხადებების საფუძველზე მსურველმა მოქალაქეებმა მიიღეს.
აუქციონის შესახებ კანონიდან გამომდინარე მასში მონაწილეობის მიღების მსურველები არანაირი კრიტერიუმით არ ირჩევა და 17 ივნისს აუქციონზე გატანილი აღნიშნული და ასევე სხვა ტერიტორიებიც სრული კანონის დაცვით იქნა გასხვისებული.
აუქციონის გამოცხადების სრული უფლება აქვს მოქმედ გამგებელს და ეს კანონდარღვევად არ ითვლება."
ქონების მართვის სამსახურის უფროსი ბახვა ჩხარტიშვილი აუქციონების შესახებ გვპასუხობს, რომ აუქციონი საჯაროა და დაინტერესებულ პირებს ჰქონდათ შესაძლებლობა მიეღოთ მონაწილეობა, მაგრამ მისივე თქმით, გ.ეპისკოპოსის ქუჩაზე მდებარე უძრავი ქონება და მიწის ნაკვეთი ერთ პიროვნებაზე, ოზურგეთში მცხოვრებ ლაშა ლომაძეზე გაიყიდა, შესაბამისად კონკურენცია არ ყოფილა. ასევე, მოხდა სხვა აუქციონებზეც, მონაწილეობას მხოლოდ ერთი პიროვნება იღებდა.
_ბატონო ბახვა, თქვენი სამსახურის და გამგეობის მიერ ბოლო პერიოდში მიწების გასხვისება კანონიერად მოხდა?
_რა თქმა უნდა.
_თქვენი აზრით, რამდენად მიზანშეწოლილი იყო არჩევნების პერიოდში, მიწების დაჩქარებული ტემპით გასხვისება?
_აუქციონი ტარდება არჩევნებამდე და არჩევნების შემდეგაც. არანაირი პრობლემა არ არის. საკრებულოს საპრივატიზაციო ნუსხაში დამტკიცებული. ამის შემდეგ ვაცხადებთ ჩვენ აუქციონს.
ოზურგეთის მუნიციპალიტეტის საკრებულოს თავმჯდომარე ავთანდილ სურგულაძე აცხადებს, რომ აუქციონებთან დაკავშირებით საქმის კურსში იყო.
_ აუქციონების ჩატარებას წინ უძღვის ძალიან შრომატევადი სამუშაოები. შემოდის გამგეობა ინიტიციატივით, ამა თუ იმ შენობა-ნაგებობებისა თუ მიწის ნაკვეთის გამოყოფის თაობაზე, ეს იგზავნება ქონების მართვის სააგენტოში, ამის შემდეგ იგზავნება გუბერნიაში, გუბერნატორთან შეთანხმებით, ხომ არ აქვს მას რაიმე საწინააღმდეგო, ამის შემდეგ მოდის ჩვენთან დასამტკიცებლად, ან კი უნდა ვუთხრათ ან არა. აბსოლუტურად ყველა შეთანხმება მუნიციპალიტეტზე ქონების გადმოცემის შესახებ ხდება გუბერნატორთან ეკონომიკის სამინისტროს მხრიდან, ამის შემდეგ დაგროვილი მასალები გადის საკრებულოს კომისიაზე, შემდეგ სხდომაზე, ამის შემდეგ ტარდება აუქციონი.
_ რამდენად მიზანშეწონილად მიგაჩნიათ არჩევნების პერიოდში, როცა ქალაქს ეყოლება ახალი მერი და მუნიციპალიტეტს ახალი გამგებელი, დაჩქარებული წესით გასხვისდეს მიწები და შენობა-ნაგებობები ქალაქის ცენტრში?
_რის საფუძველზე უნდა შევაჩეროთ აუქციონის დრო? ახლა უკვე შეჩერებულია ყველანაირი მსგავსი საკითხი, რადგან გამიჯნულია ქონება და მორატორიუმია გამოცხადებული.
იყო თუ არა გურიის გუბერნატორი საქმის კურსში, ამ ბოლო დროს ოზურგეთის მუნიციპალიტეტის გამგებლის მიერ აუქციონის წესით გასხვისებული მიწების თაობაზე, გუბერნატორი გვპასუხობს, რომ კომენტარს ვერ გააკეთებს, რადგან აღნიშნული საკითხის მოგვარება მუნიციპალიტეტის პრეროგატივაა.
