საქართველოში ტურისტული სეზონი დაიწყო. არის თუ არა საქართველოს თვითმმართველი თემები სტუმრის მისაღებად მზად, ამასთან დაკავშირებით ოფიციალური სტრუქტურები დადებითად პასუხობენ, თუმცა ინტერნეტგამოცემა "argumenti.ge"-ზე გამოქვეყნებულ ფოტოზე, რომელიც მესტიის ცენტრშია გადაღებული, ამას ნამდვილად ვერ ვიტყვით.
ფოტოზე აღბეჭდილია მესტიის ცენტრის ისტორიულ მოედანი, სადაც მოუწესრიგებელია ინფრასტრუქტურა და მიტოვებულია სამშენებლო სამუშაოები. არის ანტისანიტარია და ძროხები ჩეროს აფარებენ თავს. სურათის მიხედვით. მესტიის თვითმმართველობა ტურისტების მისაღებად მზად არ არის.
რატომ არ არის მშენებლობა დასრულებული, რამდენი თანხა დაიხარჯა მესტიის ისტორიული ცენტრის მოსაწესრიგებლად და რატომ არ არის დასუფთავებული მესტიის "პიაცა"? ამასთან დაკავშირებით "გურია ნიუსი" მესტიის თვითმმართველი გამგეობის კეთილმოწყობის სამსახურის ხელმძღვანელს, მამუკა გირგვლიანს ესაუბრა. რომელმაც, როგორც კი გაიგო რატომ ურეკავდით, გვიპასუხა: "მე არ ვმუშაობ კეთილმოწყობის სამსახურში, შემომთავაზეს. მაგრამ, უარი ვთქვი. ახლა დასუფთავების სამსახურში ვარ."
_ მითუმეტეს ბატონო მამუკა. ინტერნეტგამოცემა "argumenti.ge"-ზე გამოქვეყნდა მესტიის ცენტრში გადაღებული სურათები. სადაც ანტისანიტარიაა და ძროხები დასეირნობენ. ტურისტული სეზონისთვის არ ემზადებით?
_ ეს სურათი როდის გადაიღეს?! სხვათაშორის თქვენ, რომ მეუბნებით მიკვირს. არ ყოფილა ისეთი შემთხვევა, მესტიის ცენტრში ქუჩა არ იყოს დასუფთავებული.
_ ფაქტია, რომ ანტისანიტარიაა და ინფრასტრუქტურა მოუწესრიგებელია. რამდენი ადამიანი მუშაობს დასუფთავების სამსახურში და რა აქვთ ხელფასი?
_ 22 თანამშრომელია. იცით, ხელფასი იმის მიხედვით აქვთ, ვის რა ფართობი აქვს და რას ასუფთავებენ. ყველას რაღაც ქუჩის ნაწილი აქვს ჩაბარებული. პირველად მესმის, რომ გაუსუფთავებელია ტერიტორია. წელს, რამდენიმე ადამიანმა მითხრა მადლობა, რაც თქვენ მოხვედით სამსახურში, იმის მერე მესტიაში, დასუფთავების სამსახურის მხრივ, რაღაც დაიძრაო. იმიტომ, რომ საშინელება ხდებოდა. არ იყო ნაგვის ურნები. ნაგვის ურნებზე ტენდერი გვაქვს გამოცხადებული. რამდენიმე ნაგვის ურნა უნდა შემოგვივიდეს. არ გვყავს ნაგვის გადამზიდი მანქანა.
ახლა თბილისიდან მოვდივარ, ამ საკითხის მოსაგვარებლად ვიყავი. ტრანსპორტს გვიყიდიან. ნაგავი ზუგდიდის მიმართულებით უნდა გაზიდონ. რადგან იქ ნაგვის გადამამუშავებელი ქარხანაა.
_ რა უჯდება სახელმწიფოს მესტიისთვის ნაგვის გადამზიდი მანქანის ყიდვა?
_ არ ვიცი. ჯერ ვერ ვიტყვი. ჩვენ დაგვიკმაყოფილეს ეს მოთხოვნა. საშინელი მდგომარეობა იყო. ფაქტიურად ნაგავსაყარისათვის ადგილი არ გვაქვს. ვერ მიუთითეთ ისეთი ადგილი სადაც ნაგავსაყარი აშენდებოდა. რადგან სვანეთში ისეთი ადგილებია, ყველგან კერძო საკუთრებაა. მერე უარი გვითხრეს, რადგან აქ გადამამუშავებელი ქარხნის აშენება ძვირი ჯდებოდა. გადავწყვიტეთ, რომ ტრანსპორტი შეგვიძინონ და ზუგდიდში გადავზიდოთ ნაგავი.
.jpg_2615.jpg)
