"სომხეთის პრეზიდენტის ვიზიტის დროს, რკინიგზის თემა საერთოდ არ გაჟღერებულა. აქედან გამომდინარე, იგი არ არის აქტუალური. მისი განხილვა 9 ივლისს, პრაღაში, არ მოხდება", _ ამის შესახებ დღეს, საქართველოს საგარეო საქმეთა მინისტრმა, მაია ფანჯიკიძემ, "ღია მმართველობის" ფარგლებში, ქართველ ჟურნალისტებთან ისაუბრა.
მინისტრმა ქვეყანაში ბოლო პერიოდში საგარეო პოლიტიკის კუთხით მიმდინარე მოვლენები შეაფასა და ჟურნალისტების კითხვებს უპასუხა.
"გურია ნიუსის" კითხვაზე, ზურაბ აბაშიძისა და გრიგორი კარასინის შეხვედრის, დროს ხომ არ დადგება სომხეთ-რუსეთის დამაკავშირებელი რკინიგზის ამოქმედების საკითხი და რა კონკრეტული წინადადებები იქნება განხილული შეხვედრაზე? – ფანჯიკიძემ გვიპასუხა, რომ ეს თემა აქტუალური არ არის, ამიტომ აბაშიძე-კარასინის შეხვედრაზე ამაზე საუბარი არ იქნება.
შეგახსენებთ, რომ 9 ივლისს პრაღაში, რუსეთის ფედერაციასთან ურთიერთობის საკითხებში, საქართველოს პრემიერ–მინისტრის სპეციალური წარმომადგენელი, ზურაბ აბაშიძე რუსეთის ფედერაციის საგარეო საქმეთა მინისტრის მოადგილე გრიგორი კარასინს შეხვდება. ამ შეხვედრამდე რამდენიმე კვირით ადრე, საქართველოში ვიზიტით იმყოფებოდა სომხეთის პრეზიდენტი სერჟ სარგსიანი. საუბრობენ იმაზე, რომ ამ ვიზიტის დროს საუბარი შედგა ქართული კორიდორის გავლით სომხეთ-რუსეთის დამაკავშირებელი რკინიგზის ამოქმედებაზე.
"თემები, რომელზეც ბატონი ზურაბ აბაშიძე ისაუბრებს ბატონ კარასინთან არის დაახლოებით იგივე. 16 აპრილის შემდეგ, ჩვენ გვაქვს განსხვავებული დინამიკა. მაგალითად, უკვე გაიხსნა ბაზარი ქართული ხილისა და ბოსტნეულისთვის. რასაკვირველია, ამ მიმართულებით იქნება ლაპარაკი. ასევე საუბარი იქნება სატრანსპორტო მიმოსვლაზე, რომელიც საჰაერო მიმოსვლას გულისხმობს. ასოცირების ხელშეკრულების ხელმოწერის შემდეგ, საქართველოს, არ აქვს სურვილი რუსეთთთან სავაჭრო-ეკონიმიკური ურთიერთობების მხრივ რამე სახის ცვლილება იყოს. სწორედ ექსპერტებთან შეხვედრა, რომელიც ორი დღით ადრე ჩატარდება, განიხილავს ამ საკითხებს. მოგეხსენებათ, საქართველოს დსთ-ს ქვეყნებთან აქვს თავისუფალი ვაჭრობა და ჩვენ არ ვართ ამ რეჟიმის შეცვლით დაინტერესებული. ასევე ლაპარაკი იქნება რუსეთის მხრიდან ვიზების გამარტივებაზე. ძირეულ და განსაკუთრებულ ცვლილებებს ამ ფორმტაში არ უნდა ველოდოთ. მაგრამ, ძალიან კარგია, რომ ამას წინ უძღვის ექსპერტთა შეხვედრა, რომელზეც ტექნიკური საკითხები განიხილება", _ აცხადებს ფანჯიკიძე.
რა კონცეფცია აქვს საგარეო საქმეთა სამინისტროს აფხაზეთისა და ოსეთის დე-ფაქტო ხელისუფლებასთან დაკავშირებით და როგორ აპირებთ დე-ფაქტო ხელისუფლებასთან მუშაობას? – ამ საკითხზე ფანჯიკიძე აცხადებს, რომ "საქართველოს საგარეო საქმეთა სამინისტრო, საქართველოს შემადგენელ ნაწილებთან არ მუშაობს".
"ეს არის შიდა პოლიტიკის საქმე. არსებობს, შერიგებისა და სამოქალაქო თანასწორობის სამინისტრო, პაატა ზაქარეიშვილი, რომელიც ამ მიმართულებით მუშაობს. აფხაზეთთან მიმართებაში პრემიერმა მკაფიო განმარტება გააკეთა, როგორც ბრიუსელიდან, ასევე თბილისიდან, რომ ასოცირების ხელშეკრულება არის ხელშეკრულება, რომელიც ევროკავშირმა დადო მთელ საქართველოსთან აფხაზეთისა და სამხრეთ ოსეთის ჩათვლით. შესაბამისად აფხაზ და ოს მოქალაქეებს ისევე შეუძლიათ ისარგებლონ ყველა სიკეთით, როგორც საქართველოს სხვა მოქალაქებს. ამისთვის საჭიროა მათი ნება და მეტი არაფერი. რაც იმას ნიშნავს, რომ ჩვენ ამ მიმართულებით მუშაობას გავაგრძელებთ.
ჩვენ გვაქვს კომუნიკაციის სტრატეგია, რომლის შემადგენელი ნაწილია, საზოგადოებისთვის ხელმისაწვდომი გავხადოთ ყველა ინფორმაცია, რასაც გვაძლევს ასოცირების ხელშეკრულება. ყველა ის სიკეთე ღმა და ყოვლის მომცველი თავისუფალი სავაჭრო სივრცის გათვალისწინებით. რადგან, ის არის ამ ხელშეკრულები პარქტიკული ნაწილი და შესაბამისად დავარწმუნოთ ჩვენი თანამოქალაქეები ოკუპირებულ ტერიტორიებზე, რომ მათთვისაც ხელმისაწვდომია ყველაფერი, რაც მოაქვს ასოცირებას საქართველოს დანარჩენი მოქალაქეებისთვის", _ აღნიშნა ფანჯიკიძემ შეხვედრისას.
