ქართულ პროდუქციას, რუსეთის ბაზარზე, შესაძლოა, ისევ პრობლემები შეექმნას. კონკრეტულად რა სახის, ჯერ ამაზე არავინ საუბრობს, თუმცა ექსპერტები ვარაუდობენ, რომ საბაჟო გადასახადი გაიზრდება, რაც თავის მხრივ პროდუქციის ფასებს გაზრდის.
იმაზე, რომ ქართულ პროდუქციას რუსეთის ბაზარზე პრობლემები ელის, რუსეთის პრემიერ-მინისტრმა ისაუბრა.
დიმიტრი მედვედევის თქმით, თუ საქართველოს და უკრაინის პარლამენტები ისევე მოახდენენ ასოცირების შეთანხმების რატიფიცირებას, როგორც ეს მოლდოვამ გააკეთა, რუსეთი დამცავ ზომებს მიიღებს.
"ბუნებრივია, თუ ისევე გზით განვითარდება მოვლენები უკრაინასა და საქართველოში, იქნება მსგავსი ზომები, რა თქმა უნდა, ამ ქვეყნებთან სავაჭრო ურთიერთობებში შესაბამისი ანალოგიური ზომები იქნება მიღებული".
მედვედევის ამ განცხადების პარალელურად, საგარეო საქმეთა მინისტრი მაია ფანჯიკიძე ამბობს, რომ საქართველოსა და რუსეთს შორის ორმხრივი ტექნიკური ხასიათის შეხვედრა შედგება, სადაც ის ახალი პირობები განიხილება, რომელშიც შესაძლოა ვაჭრობისა და ეკონომიკის განვითარება მოგვიწიოს.
"ორივე ქვეყნის ინტერესშია სავაჭრო, ეკონომიკური ურთიერთობების შენარჩუნება და განვითარება. შესაბამისად, ამ შეხვედრაზე გამონახული იქნება გზები, როგორ შეიძლება, მიუხედავად იმისა, რომ ჩვენ სხვა სავაჭრო სივრცეს ვუერთდებით, იგივე პირობებით დარჩეს სავაჭრო ეკონომიკური ურთიერთობები რუსეთთან", – აღნიშნა ფანჯიკიძემ.
ოპტიმისტურად არიან განწყობილები ქართველი ექსპერტებიც, რომლებიც მიიჩნევენ, რომ მედვედევის ეს პირობა უფრო "განცხადება განცხადებისთვისაა" და ასე რომც არ იყოს, რუსეთის მხრიდან დაწესებული შეზღუდვები ქართულ ეკონომიკაზე მნიშვნელოვნად არ აისახება.
მედვედევის განცხადებას, რომ რუსული მხარე ასოცირების შეთახნების რატიფიცირების შემთხვევაში რუსეთი "სავაჭრო ურთიერთობებში შესაბამისი ანალოგიური ზომებს" მიიღებს, ექსპერტი ეკონომიურ საკითხებში, ირაკლი ლექვინაძე, სათუოს უწოდებს.
"არამგონია რუსეთი ამაზე წავიდეს, რადგან ეფექტი ნაკლები ექნება, მაგრამ თუ მაინც მოხდება ამ მხრივ რაიმე, ალბათ ეს უფრო ემბარგოს მოიაზრებს. თუმცა ეფექტი არ ექნება, რადგან ეს ქართულ ეკონომიკას მნიშვნელოვნად არ დააზარალებს, რუსეთის მიმართ ნეგატივს კი გაზრდის", _ ამბობს "გურია ნიუსთან" საუბრისას ლექვინაძე.
თითქმის იგივენაირი დამოკიდებულება აქვს მედვედევის განცხადებაზე, ანალიტიკოს დემურ გიორხელიძეს. მისი თქმით ეს სრულიად ბუნებრივი და მოსალოდნელი იყო.
"ცხადია ვაჭრობის რეჟიმი შეიცვლება, ანუ ის რაც იყო ესენგეს სივრცეში – ქვეყნებს შორის შეღავათიანი ვაჭრობის რეჟიმი, აღარ იქნება."
აქ უნდა გავიხსენოთ გასული წლის შემთხვევა, როცა უკრაინის პრეზიდენტმა ქვეყნის არჩევანი საჯაროდ გაახმაურა. ვიქტორ იანუკოვიჩმა ღიად განაცხადა, რომ კიევმა ევროინტეგრაციის კურსი აირჩია და დასძინა, რომ ევროპის თავისუფალი ვაჭრობის ზონაში შესვლა, რუსეთთან სავაჭრო კავშირის შეწყვეტის მიზეზი არ გახდებოდა. თუმცა, მიმდინარე წელს რუსეთმა უკრაინულ რძის ნაწარმზე ემბარგო დააწესა და მიზეზად რუსეთისთვის მიუღებელი სტანდარტები დაასახელა.
სწორედ ამ მაგალითს ეყრდნობა რუსეთის პრემიერის განცხადების შეფასებისას პოლიტოლოგი სოსო ცინცაძე.
"ეს განცხადება არაა მოულოდნელი. აქ იმ ზომებზეა საუბარი, რაც უკვე დაიწყო უკრაინის მიმართ. ეს იქნება საბაჟო ახალი თამაშის წესები და ჩვენს პროდუქტზე ისევ ემბარგოს დაწესება რაღაც ხელოვნური მიზეზებით. მეწარმეებისთვის, ვისაც იმედი ჰქონდა, რომ ყოველ წელს ექსპორტის ოდენობა გაიზრდებოდა, მათთვის ეს, რა თქმა უნდა, რთული იქნება, რადგან რუსეთის ბაზრის ჩანაცვლებას ევროპული ბაზრით, დიდი დრო სჭირდება. ამის გამოცდილებაც გვაქვს."
