ოზურგეთის საავადმყოფოს ყოფილ შენობაში, თვითმმართველობის არჩევნებამდე, მუნიციპალიტეტის რამდენიმე სოფლის მცხოვრებნი შეიჭრნენ და ყოფილი საავადმყოფოს პალატები საცხოვრებელ ოთახებად აქციეს.
თუმცა,"გურია ნიუსის" მიერ მოპოვებული ინფორმაციით, არჩევნების მეორე ტურის ჩატარების შემდეგ, ამ ხალხის შენობიდან გამოყვანა იგეგმება.
ასევე გავრცელდა ინფორმაცია, რომ ოზურგეთის მერობის ერთ-ერთმა კანდიდატმა შოთა გოგიბერიძემ საავადმყოფოს შენობაში მცხოვრებ მოსახლეობას უთხრა, მისი კონკურენტის, ბეგლარ სიორიძის არჩევის შემთხვევაში, მათ შენობას აუცილებლად დაატოვებინებენ.
“გურია ნიუსი” ამ საკითხთან დაკავშირებით ბეგლარ სიორიძეს ესაუბრა, რომელიც აცხადებს, რომ საავადმყოფოს შენობაში მცხოვრებ ადამიანებს დახმარება სჭირდება.
"მე შევხვდი ამ ადამიანებს, ვისაუბრეთ და არცერთი სალანძღავი სიტყვა არ გამომიყენებია ჩემი კონკურენტების მისამართით. როგორც გარემოვაჭრეებს ეუბნებიან მოვა ბეგი სიორიძე და დარჩებით დახლების გარეშეო, ისე ეუბნებიან ახლა ამ ადამიანებს. ამ ხალხს აუცილებლად სჭირდება დახმარება. ესენი არიან ჩვეულებრივი ადამიანები და ჩვენ უნდა შევუქმნათ ელემენტარული საარსებო გარემო და მერე გადავწყვიტოთ სად უნდა შევასახლოთ ეს ხალხი.
ყოფილ საავადმყოფოში არ არის შუქი, წყალი, ელემენტარული პირობები არ არსებობს. მე მიმაჩნია, ამ ადამიანებს ჯერ ელემენტარული პირობები უნდა შევუქმნათ, რადგან ღირსეულად იგრძნონ თავი და შემდეგ უნდა მოხდეს მათი დაბინავება, ეს იქნება ყოფილი საავადმყოფოს შენობა თუ სხვა ადგილი", _ გვითხრა სიორიძემ.
ოზურგეთის მერობის მეორე კანდიდატი შოთა გოგიბერიძე კი აცხადებს, რომ ის მოსახლეობასთან თავის საარჩევნო პროგრამაზე საუბრობს და არა მის კონკურენტზე.
"მე ვიყავი მისული ყოფილ საავადმყოფოს შენობაში მყოფ ხალხთან და ვისაუბრეთ, თუმცა ნამდვილად არ მისაუბრია მსგავს საკითხზე, ბეგი სიორიძე საერთოდ არ ხსენებულა იმ შეხვედრაზე. სადაც კი შეხვედრას ვატარებ ყველგან ვსაუბრობ ჩემს საარჩევნო პროგრამაზე. ეს ინფორმაცია არ არის სწორი.
საავადმყოფოს ეზოში ჩატარებულ შეხვედრაზე ხალხს ვუთხარი, რომ ისინი სახელმწიფო ქონებაში უკანონოდ არიან შეჭრილი. ისიც ვუთხარი, რომ ამ ყველაფრის ლეგალიზაცია კანონის ფარგლებში უნდა მოხდეს, რისთვისაც დიდი პროცედურებია გასავლელი. პირველი ეს არის ხელისუფლების ნება, შემდეგ ამ ქონების რეალურად აღწერა. ასევე უნდა გავიგოთ ეკონომიკის სამინისტროს პოზიცია ამ საკითხთან დაკავშირებით. ამ ნიუანსებზე მქონდა ამ ხალხთან საუბარი და არა ბეგი სიორიძეზე“, _ აცხადებს გოგიბერიძე.
ამის საკითხის შესახებ “გურია ნიუსი“ ვრცელ სტატიას მოგვიანებით შემოგთავაზებთ.
