"ქართული დასის" ლიდერი ჯონდი ბაღათურია, გუშინ, რუსთავში, მერობის ყოფილი კანდიდატების მიერ გაკეთებულ განცხადებას (რუსთავის მერობის ყოფილმა კანდიდატებმა და ,,ნაცმოძრაობიდან" რუსთავის მერობის კანდიდატმა, მამუკა ჩიქოვანმა სიმბოლურად ურთიერთთანამშრომლობის ხელშეკრულებას მოაწერეს ხელი) გამოეხმაურა და განაცხადა:
"რუსთავის ჩვენი მერობის კანდიდატმა მიიღო არასწორი გადაწყვეტილება, რამაც მნიშვნელოვანი უხერხულობა შეუქმნა კოალიციას. მინდა გითხრათ, რომ ის არ არის კოალიციაში შემავალი არც ერთი პარტიის წევრი, თუმცა ამ საქციელის გამო კობა ძლიერიშვილი აუცილებლად იქნება გარიცხული კოალიციიდან. აქვე მინდა საჯაროდ განვაცხადო, რომ ნებისმიერი წევრი, რომელიც მეორე ტურში მხარს დაუჭერს "ქართულ ოცნებას", ან "ნაციონალურ მოძრაობას" გარიცხული იქნება არა მარტო კოალიციიდან, არამედ იმ პარტიიდანაც, რომლის რიგებითაც გახდა კოალიციის წევრი. ეს არის კოალიციის პოლიტსაბჭოს ერთობლივი გადაწყვეტილება და ჩვენ ვიაქტიურებთ მხოლოდ იმ რაიონებში, სადაც ჩვენი წარმომადგენელია მეორე ტურში გასული, ასეთია: მარტვილი, ახმეტა, თიანეთი და ტყიბული. თუ სხვა რაიონში რომელიმე ოპოზიციური პარტია მოინდომებს ჩვენთან თანამშრომლობას, მის კანდიდატს დავუჭერთ მხარს."
ჯონდი ბაღათურია გამოეხმაურა ზაქარია ქუცნაშვილის მიერ გაკეთებულ განცხადებასაც.
"ქუცნაშვილის განცხადება პირველი არ არის, უკვე რიგ-რიგობით კოალიცია "ქართული ოცნების" წევრები გამოდიან და ათასგვარ სიბინძურეს ავრცელებენ საზოგადოებაში. ქუცნაშვილის რანგი არ ქმნიდა აუცილებლობას, რომ გვეპასუხა მის აბსურდულ განცხადებაზე, მაგრამ რადგან ზაქარიამ ვერ მოისვენა და აგრძელებს საზოგადოების დეზინფორმირებას და ჩვენი კოალიციის ცილისწამებას, ამიტომ მივიღეთ გადაწყვეტილება, რომ შესაბამისი რანგის პირები საჯაროდ გასცემენ პასუხს და საკმაოდ დიდ უხერხულობაში ჩავარდება დეპუტატი".
დასის ლიდერის თქმით, "ქართული ოცნების" ძირითადი ხერხემალი იყო "ნაციონალური მოძრაობის" წევრი და მხარდამჭერი, რომლებიც ზოგი გამოაგდეს მოძრაობიდან, ზოგს შესაბამისი ამბიცია არ დაუკმაყოფილეს და აქედან გამომდინარე, "ქართული ოცნება" არ არის ის პოლიტიკური ძალა, რომელმაც რაიმე ბრალი უნდა დასდოს კოალიცია "ბურჯანაძე-ერთიან ოპოზიციას".
"მე გადავამოწმე და რამდენიმე ოლქში მართლაც აღმოვაჩინე ისეთი ადამიანები, რომლებიც წარსულში მართლაც იყვნენ "ნაციონალური მოძრაობის" წევრები, აქედან ზოგი უბრალოდ მუშაობდა ჩვენზე, არ იყრიდა კენჭს, ზოგი იყრიდა კიდეც კენჭს, მაგრამ რაიმე მძიმე დანაშაული არ აქვს ჩადენილი, თუმცა ჩემი პირადი აზრია, რომ მათაც უნდა აიღონ ამ დანაშაულებრივი რეჟიმის პასუხისმგებლობა. მე პირადად ვცდილობ ჩემი პარტია გავმიჯნო ასეთი ადამიანებიდან, მაგრამ ქართულ პოლიტიკაში ჩემს და შალვა ნათელაშვილის გარდა ვერ ნახავთ პოლიტიკოსს, რომელიც არ იშვა "მოქალაქეთა კავშირიდან“ და „ნაციონალური მოძრაობიდან". ასე რომ, ქუცნაშვილის განცხადება ლოგიკას მოკლებულია".
ჯონდი ბაღათურიას თქმით, ქუცნაშვილის ეს "გაწიწმატებაც" იმის მაჩვენებელია, რომ კოალიცია "ქართულ ოცნებას" უჭირს. მისივე თქმით, "ქართული ოცნება" ნამდვილად თანამშრომლობს "ნაციონალურ მოძრაობასთან", მეტიც, ისინი არიან გარიგებულნი და უგულავას დაკავებაც "ამ გარიგებული საარჩევნო კამპანიის ნაწილია".
