"გურია ნიუსის" წყაროს ინფორმაციით, 17 ივლისს ღამის 3 საათზე ურეკში, რესტორან "მიშელის" წინ, ურეკის პოლიციის უფროსს ლევან ცაავასა და ოზურგეთის მუნიციპალიტეტის გამგეობის ზედამხედველობის სამსახურის უფროს გელა ჭანუყვაძის შორის, ჩხუბი მომხდარა.
აღნიშნული პიროვნებები, ჩვენი წყაროს ინფორმაციით, ნასვამ მდგომარეობაში იყვნენ. მათ შორის ხმამაღალი საუბარი, შემდეგ სიტყვიერ შეურაცხყოფასა და ფიზიკურ დაპირისპირებაში გადაიზარდა.
ჩვენ არსებული ინფორმაცია გადავამოწმეთ.
რესტორანის მეპატრონე ჯუმბერ ყაზაიშვილი ამბობს, რომ აღნიშნული ფაქტის თვითმხილველი არ არის, თუმცა ეს პიროვნებები რესტორანში საქეიფოდ მისული ნამდვილად დაინახა.
"მე რესტორანი მაქვს გაქირავებული, ამიტომ რა მოხდა არ ვიცი, გავედი ღამით, 1-ის ნახევარზე აქედან. საღამოს 7 საათზე ზევით ასულები დავინახე ნამდვილად, მერე რა მოხდა ეს არ ვიცი, რა ჰქონდათ საჩხუბარი რა ვერ გაიყვეს?",_ გვითხრა ყაზაიშვილმა.
ურეკის პოლიციის უფროსმა, ლევან ცაავამ ჩვენს სატელეფონო ზარებს უპასუხა, შეკითხვას მოუსმინა – ადასტურებდა თუ არა ინფორმაციას მასსა და ზედამხედველობის სამსახურის უფროსს შორის ფიზიკურ დაპისრისპირებაზე, თუმცა ამის შემდეგ ტელეფონი გათიშა და მიუხედავად რამდენიმე მცდელობისა, ჩვენს სატელეფონო ზარებს აღარ უპასუხა.
ლევან ცაავა, რამდენიმე თვეა რაც ურეკის პოლიციის უფროსად დაინიშნა. ის გურიის პოლიციის მაღალჩინონების კადრია.
ოზურგეთის მუნიციპალიტეტის გამგეობის ზედამხედველობის უფროსმა, გელა ჭანუყვაძემ, "გურია ნიუსთან" დაადასტურა ინფორმაცია, იმის შესახებ, რომ ის 16 ივლისს გვიან ღამით და 17 ივლისს დილით ადრე, ნამდვილად იმყოფებოდა ურეკში, რესტორან "მიშელში", სადაც, მისივე თქმით, სკოლის დამთავრებიდან 30 წლისთავს აღნიშნავდნენ, თუმცა პოლიციის უფროსთან ფიზიკურ დაპირისპირებას კატეგორიულად უარყოფს.
_მსგავსი რამ არ მომხდარა, რესტორანში ვიყავი ნამდვილად, გამოშვება მქონდა, სკოლის დამთავრებიდან 30 წელი ავღნიშნეთ.
_ბატონო გელა ჩვენ გვყავს მოწმეები, თვითმხილველები…
_ ასეთი თემა არ ყოფილა.
ჩვენ დავუკავშირდით შსს ოზურგეთის რაიონული სამმართველოს უფროსს გიორგი გაფრინდაშვილს, რომელმაც აღნიშნული ინფორმაცია კატეგორიულად უარყო.
"ეს არის აბსოლუტური სიცრუე, რადგან პოლიციის უფროსები არ ჩხუბობენ, პასუხი გაგეცით ამომწურავად", _ გვითხრა გაფრინდაშვილმა.
"გურია ნიუსი" დაუკავშირდა შსს-ს პრესსამსახურს, რომელმაც აღნიშნულ ფაქტთან დაკავშირებით ასეთი კომენტარი გააკეთა:
