საქართველოს პარლამენტში, ევროკავშირთან ასოცირების ხელშეკრულების რატიფიცირების საკითხის განხილვა დაიწყო.
მთავარი მომხსენებლი, საქართველოს საგარეო საქმეთა მინისტრი, მაია ფანჯიკიძეა. ფანჯიკიძემ 15 წუთიან გამოსვლაში, დოკუმენტში არსებულ ხვადასხვა სახის ვალდებულებებზე, მოვალეობებსა და ღირებულებაზე ისაუბრა.
მინისტრმა კიდევ ერთხელ განმარტა, თუ რას ნიშნავს ევროკავშირთან ასოცირების ხელშეკრულება და რა სარგებელს მოუტანს ის ქვეყანას.
ფანჯიკიძემ, ევროკავშირს მშვიდობის პროექტი უწოდა და გერმანელი კანცლერის სიტყვები გაიხსენა. მან ასევე, ამ დღის ისტორიულობაზე გაამახვილა ყურადღება.
"ევროპის ერთიანობა იყო მხოლოდ რამდენიმე ადამიანის ოცნება, მოგვიანებით ის მრავალი ადამიანის იმედად იქცა, დღეს კი ის ყველა ჩვენთაგანისთვის აუცილებლობას წარმოადგენს.
ჩემთვის დიდი პატივია, რომ დღეს თქვენთან ერთად ვხდები კიდევ ერთი ისტორიული მოვლენის მონაწილე. ამით ქართველის ხალხის ერთსულოვანი ნების აღსრულება დაიწყება. ამ მიზნით რატიფიკაციისთვის წარმოგიდგენთ ასოცირების შეთანხმებას, რომელსაც 2014 წლის 27 ივნისს მოვაწერეთ ხელი.
ევროპის ერთიანობა აუცილებელია ჩვენი უსაფრთხოებისთვის, ჩვენი თავისუფლებისთვის, როგორც საერთაშორისო მოაზროვნე საზოგადოების არსებობისთვის. ევროკავშირი მშვიდობის პროექტად არის წოდებული. დღეს ევროკავშირი არის მშვიდობის, სტაბილურობის და კეთილდღეობის სივრცე", _ განაცხადა საგარეო საქმეთა მინისტრმა მაია ფანჯიკიძემ.
