ლანჩხუთის მუნიციპალიტეტის გამგებელი ზაზა ურუშაძე გახდა _ მან თვითმმართველობის არჩევნების მეორე ტურში ხმათა 54.12% მიიღო.
არჩევნებიდან ხუთ დღეში, მუნიციპალიტეტში რეორგანიზაცია დაიწყო _ პირველად სოფლის რწმუნებულები გათავისუფლდნენ. ზაზა ურუშაძის კაბინეტთან პარასკევს თითქმის ყველა სოფლის რწმუნებული და მათი აპარატის თანამშრომლები იყვნენ მისულები.
თუ რა გადაწყვეტილების მიღებას აპირებს ახალარჩეული გამგებელი, მოხდება თუ არა პოლიტიკური ნიშნით კადრების შერჩევა და ხდებოდა თუ არა არჩევნების დროს ადმინისტრაციული რესურსის გამოყენება, ამ კითხვებზე პასუხს თავად ზაზა ურუშაძე გვპასუხობს.
_ ბატონო ზაზა, უკვე დაიწყო რეორგანიზაცია, რასაც დიდი ხმაური მოჰყვა. ჩვენი ინფორმაციით, დიდი შემცირება იგეგმება.
_ იმ მუნიციპალიტეტებში, სადაც მეორე ტური არ ჩატარებულა, ცოტა სწრაფად წავიდა ეს პროცესები. ჩვენ ორი დღის წინ დავიწყეთ რეორგანიზაცია, ეს ასე უნდა მომხდარიყო კანონმდებლობით _ იურისტებთან გავიარეთ კონსულტაციები. ამ ეტაპზე, სოფლის რწმუნებულები გადაყენებულები არიან თანამდებობიდან. ეს არ ნიშნავს იმას, რომ ვინც ღირსეულია, სახლში გავუშვათ. მინდა გითხრათ, სოფლებს რწმუნებულები აღარ ეყოლებათ _ იქ იქნებიან გამგებლის წარმომადგენლები.
_ რა წესით მოხდება გამგებლის წარმომადგენლების დანიშვნა?
_ გამგებლის წარმომადგენლების დანიშვნას მოსახლეობასთან შეთანხმებით ვაპირებ. სოფელში შევხვდები ხალხს და ისე მოხდება ღირსეული კანდიდატის არჩევა.
_ ხომ შეიძლება ამ პროცესებმა დიდი დრო წაიღოს? მოსახლეობაში კანდიდატებთან დაკავშირებით აზრთა სხვადასხვაობა იქნება.
_ გამგებლის წარმომადგენელი გამგებელმა უნდა დანიშნოს, მაგრამ მიმაჩნია, რომ მოსახლეობის დაუკითხავად ეს პროცესი არ უნდა განხორციელდეს. დაახლოებით, 5-6 სოფელში შერჩეული მყავს ახალი კადრები, რამდენიმე სოფელში კი, არ არის გამორიცხული, ძველი კადრი დარჩეს. იმ სოფელში, სადაც რწმუნებულმა ვერ გაამართლა და მოსახლეობას აქვს პრეტენზიები, აუცილებლად შეიცვლება. ეს ცვლილებები ნამდვილად არ უკავშირდება არჩევნებს _ ამას იმიტომ ვამბობ, რომ ყველა ცვლილებას არჩევნებს უკავშირებენ.
_ რომელ სოფელში არის შერჩეული გამგებლის წარმომადგენელი?
_ ხუთ დღეში უკვე ყველაფერი მეცოდინება.
_ ბატონო ზაზა, რატომ არ მოხდა სოფლის რწმუნებულების გაფრთხილება გათავისუფლების შესახებ ადრე? ჩვენს მიერ მოპოვებული ინფორმაციით, განკარგულება რეორგანიზაციის შესახებ 3 ივლისს ჩამოვიდა, გათავისუფლების ბრძანება კი 17 ივლისს გაეგზავნათ სოფლის რწმუნებულებს.
_მე საარჩევნო ბატალიებში ვიყავი მაგ დროს ჩართული და არ ვიცი, როდის მოვიდა განკარგულება.
_ თქვენ კი აცხადებთ, რომ ცვლილებასთან დაკავშირებით არჩევნები არაფერ შუაშია, მაგრამ სამსახურიდან გათავისუფლებულებმა, შეიძლება თქვან, რომ თქვენ არ დაგიჭირათ მხარი არჩევნებზე და ამიტომ გაათავისუფლეთ ან იმას დაპირდით ეს თანამდებობა, ვინც თქვენი მომხრე იყო.
_ არავისთვის არაფერი მითქვამს და არავის ვპირდებოდი, რომ სადმე დავნიშნავდი. ვერც ერთი ადამიანი ვერ იტყვის იმას, რომ მე თანამდებობას დავპირდი. მაგრამ, ადამიანი იყოს "ქართული ოცნების" წევრი და სხვა პარტიას ეხმარებოდეს, არ არის კარგი საქციელი. აქ რწმუნებულებს არ ვგულისხმობ. თუმცა, ეს იმას არ ნიშნავს, ჩვენ პარტიული ნიშნით დავიწყებთ დანიშვნებს.
_ ამ განცხადებაში ხომ არ გულისხმობთ გურიის გუბერნატორს, გიორგი ჩხაიძეს? "გურია ნიუსი" წერდა თქვენს და გიორგი ჩხაიძის შორის დაპირისპირების შესახებ.
_ არა, ნამდვილად არ მიგულისხმია გურიის გუბერნატორი. აქ არის საუბარი "ქართული ოცნების" ადგილობრივ სახეებზე.
_ გავრცელებული ინფორმაციით, გიორგი ჩხაიძე თქვენ არ გიჭერდათ მხარს.
_ არანაირი გაუგებრობა ჩვენს შორის არ ყოფილა. იყო შეხვედრა, მაგრამ იქ არანაირი დაპირისპირებას ადგილი არ ჰქონია. მე ვამბობ სიმართლეს.
_ თქვენ ახსენეთ, რომ "ქართული ოცნების" წევრები არ გიჭერდათ მხარს.
_ კი, იყო ასეთი ფაქტები.
_ კონკრეტულად?
_ მაგალითად, პარტიის სათაო ოფისში გადავეცით 7 პირის საქმე, რომელიც უნდა გარიცხულიყო პარტიიდან. რამდენიმე დღეში მოვიწვევთ პარტიის ყრილობას და იქ დეტალურად ვისაუბრებთ, თუ რა მოხდა.
_ ბატონო ზაზა, თქვენმა კონკურენტმა მედიის საშუალებით გამარჯვება მოგილოცათ. მანვე განაცხადა, რომ მეორე ტურში ადმინისტრაციული რესურსის გამოყენებას ჰქონდა ადგილი. კონკრეტულად, თურქეთიდან და საქართველოს სხვადასხვა ქალაქიდან მიკროავტობუსებით ჩამოიყვანეთ ამომრჩევლები.
_ მე არ უარვყოფ, რომ თბილისიდან ჩამოვიყვანეთ ხალხი. მაგალითად მამათში, ჩემი ძმის ორგანიზებით ჩამოვიდნენ თბილისიდან ლანჩხუთელები და გააკეთეს თავისი არჩევანი. ამაში დანაშაული არაფერია. თურქეთის შესახებ კი ვერაფერს გეტყვით, არ ვიცი.
_ ბატონო ზაზა, რატომ გახდა საჭირო მეორე ტური?
_ საარჩევნო კამპანიის ორგანიზება ვერ მოვახდინეთ ისე, როგორც საჭირო იყო. ეს, ნაწილობრივ შტაბის ბრალია, ნაწილობრივ _ ჩემი. ზოგიერთმა რწმუნებულმა არ დაგვიჭირა მხარი და მეორე მხარეს გადავიდა. რწმუნებულის ვალდებულება არ იყო მხარე დაეჭირა ზაზა ურუშაძისთვის, მაგრამ არც მეორე მხარის სასარგებლოდ არ უნდა ემუშავა. მე მგონი, ამაში მართალი ვარ.
_ რომელი სოფლის რწმუნებული უჭერდა მხარს ბორის ჭყონიას?
_ ეს იყო შუხუთის რწმუნებული.
_ როდესაც შუხუთში თქვენი წარმომადგენლის დანიშვნის დრო მოვა, მოსახლეობამ თუ მოითხოვა ძველი რწმუნებულის დატოვება, თქვენ რას გააკეთებთ?
_ მოსახლეობის აზრს აუცილებლად გავითვალისწინებ. ჩვენი ამოცანაა, რაიონისთვის გუნდურად ვაკეთოთ კარგი საქმეები. თუ ერთიანი გუნდი არ იქნება, ყველგან გვექნება პრობლემები.
_ ანუ იძლევით იმის პირობას, რომ კადრების შერჩევა და დანიშვნა პოლიტიკური ნიშნით არ მოხდება?
_ რა თქმა უნდა, აქ არაფერ შუაშია პოლიტიკური ნიშნით ადამიანების გათავისუფლება. თუ ვინმემ ისე ვერ გააკეთა საქმე, როგორც საჭირო იყო და გავათავისუფლეთ, ამას ნუ დავარქმევთ პოლიტიკურ გადაწყვეტილებას.
_ ბატონო ზაზა, ლანჩხუთში ამბობენ, არჩევნების დროს რამდენიმე სოფელში პურის ფქვილი და არაორგანული სასუქი დაარიგეთ, რამდენად შეესაბამება ეს ინფორმაცია სიმართლეს?
_ ეს არის აბსურდი და ტყუილი. ერთ ფაქტი მაინც დადონ, როდესაც ასეთ ინფორმაციას ავრცელებენ.
