გუშინ, მესტიაში, ადგილობრივი მოსახლეობამ საპროტესტო აქცია გამართა. მრევლი 2 დღის წინ მესტიისა და სვანეთის ეპარქიაში, საეკლესიო კრებაზე მიღებულ გადაწყვეტილებას აპროტესტებს. როგორც "გურია ნიუსისთვის" გახდა ცნობილი, საეკლესიო კრების დადგენილებით, მესტიაში წმიდა გიორგის ტაძრის წინამძღვარი, მამა გიორგი (ჩართოლანი) ეპარქიიდან გამოუშვეს.
2014 წლის 12 და 13 ივნისს "გურია ნიუსში" გამოქვეყნდა სტატია სათაურით: "მესტიაში, მამა გიორგის ეპარქიიდან გადაყვანის გამო, საპროტესტო აქციებს იწყებენ" და "რა ხდება სვანეთში, მეუფე ილარიონის ეპარქიაში?!", სადაც საუბარი იყო მესტიისა და სვანეთის ეპარქიის, მეუფე ილარიონისა და მესტიაში, წმიდა გიორგის სახელობის ეკლესიის წინამძღვრის, მამა გიორგის (ჩართოლანი) დაპირისპირებაზე, რის გამოც, მეუფე ილარიონმა მამა გიორგი ეპარქიიდან თბილისში გაუშვა. ამ ფაქტს კი სვანეთში მრევლსა და მეუფეს შორის დაპირისპირება მოჰყვა.
13 ივნისს, წმიდა გიორგის სახელობის ტაძრის ეზოში, მრევლის მიერ გამართულ საპროტესტო აქციაზე, ეპარქიის სხვადასხვა სასულიერო პირებთან ერთად, პარლამენტის წევრი, ვიტალი ჯაფარიძე და მესტიის მუნიციპალიტეტის გამგებელი, კაპიტონ ჟორჟოლიანიც იყო, რომლებიც მრევლს ეუბნებოდნენ, რომ მეუფე ილარიონისა და მამა გიორგის შორის დაპირისპირება ნამდვილად იყო. რის გამოც მამა გიორგი დროებით თბილისში, სიონის საკათედრო ტაძარში წავიდა. ამ საკითხში კი, მრევლის ჩარევა არ იყო საჭირო, რადგან მეუფე ილარიონი და მამა გიორგი თავად მოაგვარებდნენ.
მიუხედავად ამისა, მრევლი დაჟინებით ითხოვდა მესტიისა და სვანეთის ეპარქიაში, მამა გიორგის დაბრუნებას. საპროტესტო აქციის ჩატარების შემდეგ, რამდენიმე კვირაში მამა გიორგი (ჩართოლანი) მესტიაში დაბრუნდა.
როგორც "გურია ნიუსისთვის" გახდა ცნობილი, 2 დღის წინ, მეუფე ილარიონმა, ეპარქიაში საეკლესიო კრება მოიწვია, სადაც მამა გიორგიმ (ჩართოლანი) მესტიისა და სვანეთის ეპარქიის დატოვების შესახებ მიიღო გადაწყვეტილება.
"გურია ნიუსის" რესპოდენტი, რომლის ვინაობასაც მისივე უსაფრთხოებიდან გამომდინარე არ დავასახელებთ, აცხადებს, რომ მამა გიორგიმ მრევლს განუცხადა: მივიღე გადაწყვეტილება და ვტოვებ ეპარქიას.
"მიუხედავად იმისა, რომ პატრიარქმა გადაწყვიტა ერთმანეთში მორიგდით, მეუფე ილარიონმა, გუშინ მოიწვია საეკლესიო კრება, სადაც მამაოს იძულებით ათქმევინეს, მე ვტოვებ ამ ეპარქიას.
მამა გიორგიმ მრევლს თვითონ განუცხადა: "მე ვტოვებ ეპარქიას და წავალ სვანეთიდან. ამ ამბავმა ჩვენი, მრევლის ხმაური გამოიწვია. მერე თქვა, რომ ეს, ჩემი გადაწყვეტილებაა და თქვენ ამაზე ნუ ნერვიულობთო, მაგრამ სვანეთის საზოგადოებისთვის კარგად არის ცნობილი და გასაგები, რაც ხდება მესტიისა და სვანეთის ეპარქიაში, რა უნდა მეუფე ილარიონს. გუშინ საღამოს, მესტიის ცენტრში მცხოვრები მოსახლეობა შევიკრიბეთ და მივიღეთ გადაწყვეტილება. დღეს ვიწყებთ სერიოზულ ბრძოლას.
ჩვენი მოთხოვნები არის შემდეგი. აქ არ დგას ერთი პიროვნების, მამა გიორგის საკითხი, როგორ თვითონ ეპარქიას სურს წარმოაჩინოს. რატომღაც ეპარქიამ გადაწყვიტა, სვანეთის ძირძველი ტრადიციებისა და მისი კულტურული მემკვიდრეობის წაშლა. ამასთან, კი ბრძოლა უკვე გაჩაღებულია. სვანეთი დადგა ტრადიციების წაშლის, მიწისა და პირისა აღგვის საშიშროების წინაშე. სვანეთის მოსახლეობა ამის წინააღმდეგია.
საუკუნეებ გამოვლილი სვანური საგალობლები, ტრადიციული, სახალხო თუ რელიგიური დღესასწაულები, ფაქტიურად, ფეხქვეშ არის გათელილი. მრევლთან მიდის მუშაობა, რომ ეს არის წარმართული და სისულელე. ცოტა მეტი მწიგნობრობა გმართებთ სასულიერო პირებს. იმიტომ ,რომ ბიბლია ორი ნაწილისგან შედგება: ძველი და ახალი აღთქმისაგან. ძველი აღთქმა იყო ფუნდამენტი, რაზედაც დაშენდა შემდგომი პროცესი. როცა გაუნათლებელი ზის და ამის განმარტებას ვეღარ აკეთებს, ამბობს, არ შეიძლება ამის მიღება. ეს ნიშნავს, რომ წინაპრების მერ საუკუნეების მანძილზე მოტანილი ეს ყველაფერი ფეხქვეშ ითელება . ხალხი ამის სასტიკი წინააღმდეგია. სვანეთის ყველა კუთხე–კუნჭუულს სოფელ–სოფელ ჩამოვითვლით,ხალხი გამოვა და იტყვის: არა ამ სვანური ტრადიციების განადგურებას! არა ამ პროცესს!
თქვენ ძალიან კარგად იცით, უშგულის ლამარიეს ტაძარში რაც ხდებოდა. ჩოგბურთის მაგიდა ედგათ. შემდეგ სასტუმროდ გადააკეთეს, ევრორემონტი ჩაატარეს. კანალიზაციის მილი არ გაიყვანეს და ფეკალური მასა ფერდობზე გაუშვეს, მთელი ეს სიბინძურე იმ ძირძველ წმიდა ადგილას ტაძარში მიედინებოდა. დღეს ვიკრიბებით იმისთვის, რომ ამას საბოლოო წერტილი დაესვას .
ვითხოვთ: სვანობის არ წაშლას! ჩვენი ტრადიციების პატივისცემას! მაინტერესებს, როგორ დაიცვა სვანებმა ამდენი ტაძარი, სიწმინდეები, რა მართლმადიდებლობის წინააღმდეგი იყო?!
მრევლს გვქონდა მცდელობა, შევხვედროდით მეუფე ილარიონს და საპროტესტო აქციის ფორმა არ მისცემოდა,მაგრამ კატეგორიული უარით გაგვისტუმრეს".
"გურია ნიუსი" ეცადა მეუფე ილარიონს დაკავშირებოდა, თუმცა მეუფე ჩვენს სატელეფონო ზარებს არ პასუხობს.
