საუკუნეებს გამოვლილი მეღვინეობის ტრადიციები, ქართული მარანი, ღვინის ტექნოლოგია და მივიწყებული ვაზის ჯიშების გაცოცხლება _ ახლა, ამ ყველაფერს საფუძველი მაღალმთიან აჭარაში ჩაეყარა.
"კახური ტრადიციული მეღვინეობის" კიდევ ერთი პროექტი, რომელიც ქედაში ღვინის ქარხნის მშენებლობას ითვალისწინებს, ადგილობრივ მევენახეებს უახლოეს მომავალში მოსავლის დაბინავების პრობლემას მთლიანად მოუხსნის.
ქედის ქარხანაში ღვინოს დაამზადებენ როგორც ტრადიციული, ისე თანამედროვე ტექნოლოგიებით. საწარმოს მშენებლობაში კომპანია 1 მლნ აშშ დოლარის ინვესტიციას განახორციელებს. ინვესტორი ქედაში ხილის ქარხნის მშენებლობასაც გეგმავს.
კომპანია KTW ჯგუფის დამფუძნებელი ზურაბ ჩხაიძე-ასკანელი "გურია ნიუსთან" საუბრისას აცხადებს, რომ ახალი საწარმო საკმაოდ წინგადადგმული ნაბიჯი იქნება მუნიციპალიტეტის ეკონომიკური განვითარების თვალსაზრისით და რაც მთავარია, მოსახლეობას უამრავ პრობლემას გადაუჭრის:
ზურაბ ჩხაიძე: "ახალი საწარმო ფერმერებისაგან სხვადასხვა ჯიშის ყურძნის შესყიდვასა და გადამუშავებას უზრუნველყოფს. ჩვენ ასევე ინტენსიურად ჩავერთვებით იმაშიც, რომ მაღალმთიან აჭარაში რაც შეიძლება მეტი ისეთი ჯიშის ვენახი გაშენდეს, რომელიც ჩვენს მიერ მოთხოვნადი იქნება."
სწორედ ამ პროექტის შემადგენელი ნაწილი გახლდათ კიდევ ერთი აქცია _ KTW ჯგუფის ინიციატივით მაღალმთიან აჭარაში ვაზის იშვიათი ჯიშის ნერგები დარიგდა.
ქედაში ფერმერებმა ვაზის ნერგები უფასოდ მიიღეს. დაბა ქედის, მერსისისა და სოფელ ოქტომბრის მოსახლეობას 2000- მდე ნერგი აჭარის სოფლის მეურნეობის მინისტრმა გადასცა.
აქცია კახური ტრადიციული მეღვინეობის დირექტორის ზურაბ ჩხაიძის ინიციატივით და დაფინანსებით ჩატარდა.
ზურაბ ჩხაიძის თქმით, პირველ ეტაპზე ჩხავერის 8 500 – მდე ნერგი მუნიციპალიტეტის ყველა სოფელში დარიგდა, მოსავალს კი ქედის ღვინის ქარხანაში ჩაიბარებენ, რომლის მშენებლობაც რამდენიმე თვეში დასრულდება.
" წელს, ჩვენ მივიღეთ გადაწყვეტილება, რომ აგროფერმერებისთვის დაგვერიგებინა იშვიათი, მივიწყებული ვაზის ჯიშები, როგორიცაა ჩხავერი, ცოლიკაური, ბუტკო და კიდევ რამდენიმე სხვა ჯიში… იმედი გვაქვს, რომ სამი წლის შემდეგ გვექნება მოსავალიც და კარგი ღვინოც.
სიმბოლურია ისიც, რომ ჩვენ აქ ქარხანას ვაშენებთ, რომელიც შემოდგომაზე გაიხსნება და ადგილობრივ მევენახეებს ყველა იმ პრობლემას მოუხსნის, რაც დღეც აწუხებთ."
ნერგების დარიგების პროცესს აჭარის სოფლის მეურნეობის მინისტრი ზაურ ფუტკარაძეც დაესწრო:
"მოგეხსენებათ ქედის მუნიციპალიტეტში მალე გაიხსნება ღვინის ქარხანა და რა თქმა უნდა, ქარხანას ჭირდება ნედლეული. ქედელ მევენახე ფერმერებს უფასოდ დაურიგდათ ჩხავერის ვაზის ნერგი. აღნიშნული აქცია არ იქნება ერთჯერადი და ის მომავალშიც გაგრძელდება". განაცხადა- ზაურ ფუტკარაძემ.
მოსახლეობა აცხადებს, რომ ნერგების მიღებაზე მათგან ძალიან დიდი მოთხოვნა იყო და ისინი მადლობლები არიან "კახური ტრადიციული მეღვინეობის", რომელმაც გაითვალისწინა მათი სურვილი.
"ზოგადად, KTW ჯგუფმა ვიცით, რა გვინდა, რა ჭირდებათ მევენახეებს და რა სახის პროდუქტი უნდა შევქმნათ სამომავლოდ. ჩვენ პროდუქციას რამდენიმე ქვეყანაში წარმატებულად ვყიდით. მთავარია ის, რომ ინვესტირების შიში გაქრა და ახლა იმაზე უნდა ვიზრუნოთ, რომ გურია-აჭარისა და მთლიანად დასავლეთის რეგიონში რაც შეიძლება მეტი საწარმო შეიქმნას და ადგილობრივები დასაქმდნენ.
ნებისმიერ საქმეში, რაც არ უნდა წამოვიწყოთ, მთავარ პრინციპს _ მხოლოდ უმაღლესი ხარისხის პროდუქცია! _ ჩვენ არ ვღალატობთ. ასე გავაგრძელებთ მომავალშიც…" _ აცხადებს ზურაბ ჩხაიძე.
(R)
