შსს გურიის საპატრულო პოლიციაში საკადრო ცვლილებებია.
"გურია ნიუსის" წყაროს ინფორმაციით, ჯაპანა-ჩოლოქის ტრასის განყოფილების უფროსი, ნიკა ქარჩავა, თანამდებობიდან გაათავისუფლეს და მის ადგილზე, ამავე განყოფილების ოცეულის მეთაური, გიორგი ჩხაიძე დაინიშნება.
ნიკა ქარჩავა ურეკის პოლიციის უფროსად მუშაობდა. ის ივანიშვილთან დაახლოებული პირია. გურიაში, საპატრულო პოლიციის შექმნის დღიდან ჯაპანა-ჩოლოქის ტრასის განყოფილების უფროსად მუშაობდა.
ჩვენი წყაროს ინფორმაციით, ნიკა ქარჩავას სამსახურიდან დათხოვნის მიზეზი, გურიის საპატრულო პოლიციის უფროსთან, დავით ჭანტურიასთან სამსახურეობრივი გაუგებრობა, დაძაბულობა და მათ შორის პირადი უთანხმოება გახდა.
თუმცა, აღნიშნულ ინფორმაციას არც საპატრულოს უფროსი და არც გათავისუფლებული თანამშრომელი არ ადასტურებენ.
გურიის საპატრულო პოლიციაში, საკადრო ცვლილებების განხორციელება კვლავ იგეგმება.
"გურია ნიუსის" წყაროს ინფორმაციით, არ არის გამორიცხული, რომ სხვა ხელმძღვანელი პირების შეიცვალოს.
ნიკა ქარჩავა ამბობს, რომ სამსახურიდან საკუთარი განცხადების საფუძველზე წამოვიდა.
_ ხელმძღვანელობას შეგიძლიათ მიმართოთ, ისე, ჯერ დათხოვნილი არ ვარ, ყოველი შემთხვევისთვის.
_ ჩვენს გვაქვს ინფორმაცია, რომ დღეს დაიწერა ბრძანება თქვენი სამსახურიდან დათხოვნის შესახებ. იქნებ გვითხრათ, კონკრეტული მიზეზი რატომ გაგათავისუფლეს?
_ ჩემი პირადი პატაკის საფუძველზე წამოვედი, ოჯახური პირობების გამო.
_ დავით ჭანტურიასა და თქვენს შორის დაძაბული ურთიერთობა არ ყოფილა?
-არა… არა… უფრო, სხვა სამსახურში მინდა გადასვლა და იმიტომ წამოვედი.
ჯაპანა-ჩოლოქის ტრასის განყოფილების ოცეულის მეთაური გიორგი ჩხაიძე, "გურია ნიუსთან" აღნიშნავს, რომ ის განყოფილების უფროსად დანიშვნის მოლოდინშია.
"ჩემი დანიშვნა ხელმძღვანელების გადასაწყვეტია, ჯერჯერობით არ ვარ დანიშნული."
გურიის საპატრულო პოლიციის უფროსი დავით ჭანტურია უარყოფს თავის თანამშრომელთან პირად უთანხმოებას.
_ არავის არ გაუთავისუფლებია, ქარჩავა პირადი პატაკის საფუძველზე წავიდა სამსახურიდან.
_ ბატონო დავით, როგორც გავიგეთ, გურიის საპატრულოში საკადრო ცვლილებების განხორციელება იგეგმება…
_ არავითარი ცვლილებები.
