პროკურატურის მიერ სააკაშვილის მიმართ სისხლისსამართლებრივი დევნის დაწყებას ნინო ბურჯანაძე გამოეხმაურა და განაცხადა:
"მიხეილ სააკაშვილის დანაშაულებრივი ქმედებების მოწმე და მსხვერპლი არის არამარტო საქართველოს მოსახლეობა, არამედ ამის მოწმეა საერთაშორისო თანამეგობრობაც. თუნდაც ტალიავინის დასკვნა არის საკმარისი იმისათვის, რომ სააკაშვილის ბრალეულობაზე ვისაუბროთ, თუნდაც იგივე "იმედთან" დაკავშირებით ძალიან ბევრი ინფორმაცია არის უცხოეთში გავრცელებული, რომელიც სააკაშვილის ბრალეულობას ადასტურებს.
რაც შეეხება ადვოკატის, ოთო კახიძის განცხადებებს, მესმის მათი, ვინაიდან არანაირი საშუალება არ აქვთ იმისათვის, რომ სამართლებრივად იმართლონ თავი, ამიტომ მათი ამოცანაა ეს საქმე გადაიყვანონ პოლიტიკურ ჭრილში.
ვურჩევ სააკაშვილს, პოლიტიკური განცხადებების კეთებისაგან მისმა ადვოკატმა თავი შეიკავოს და სამართლებრივი არგუმენტები იპოვოს.
რაც შეეხება იმ საკითხს, თუ როდის იქნა სააკაშვილის წინააღმდეგ საქმე აღძრული, იმედი მაქვს ამაზე პროკურატურა გასცემს პასუხს. ჩემი ინფორმაციით, საქმე აღძრულია 2012 წლის ოქტომბერში და სწორედ ამ დროიდან მიმდინარეობდა გამოძიება და ჩემს გარდა ძალიან ბევრი ადამიანია ვისაც ამ საკითხთან დაკავშირებით ჩვენება აქვს მიცემული. ასე რომ მათი განცხადებები არის დემაგოგია და სხვა არაფერი.
ერთი რაც შემიძლია გითხრათ, ნამდვილად ვადანაშაულებ ამ ხელისუფლებას იმაში, რომ წელიწადი და რვა თვის განმავლობაში არ გააკეთა არაფერი იმისათვის, რომ სააკაშვილისთვის წაეყენებინა ბრალი მანამ სანამ იგი აქ "ბრძანდებოდა". ეს არის ამ ხელისუფლების უუნარობის ბრალი, მაგრამ იმედი მინდა ვიქონიო ახლა მაინც გამოსწორდება ვითარება პროკურატურის მოქმედების შედეგად, თუმცა ამას სჭირდება გამოძიება არა მხოლოდ 7 ნოემბრის, არამედ 26 მაისის და აგვისტოს ომის მოვლენებისა".
ერთიანი ოპოზიციის ლიდერის თქმით, ის საქმეს არ გაცნობია, თუმცა აქვს ინფორმაცია, რომ საქმე არის 80 ტომიანი და არ ჰგონია, რომ მარტი თვითონ იყოდ ერთადერთი, მთავარი მოწმე, როგორც ამას ადვოკატი ამბობს. მისივე თქმით, რაც შეეხება სამართლებრივ პროცედურას, შეიძლება საქმე აღიძრას და შეიძლება მოწმეები დამატებით დაკითხონ. ბურჯანაძის განცხადებით ეს ჩვეულებრივი პრაქტიკაა და ამაზე იურისტები არც დაობენ.
"მე დარწმუნებული ვარ სააკაშვილს ბრალი უნდა დაუმძიმდეს 26 მაისის საქმეზეც, იმიტომ რომ 26 მაისი არის გაცილებით მძიმე მოვლენათა განვითარებისა და შედეგების თვალსაზრისით, ვიდრე 7 ნოემბერი და ამავდროულად სააკაშვილს ბრალი უნდა წარედგინოს 2008 წლის აგვისტოს მოვლენებთან დაკავშირებითაც", _ განაცხადა ბურჯანაძემ.
