ოზურგეთის მერობის ყოფილმა კანდიდატმა, მეორე ტურის დასრულების შემდეგ განაცხადა, რომ "საქართველოს პატრიოტთა ალიანსმა" მოახერხა და სწორედ ისინი არიან რეგიონში მთავარი ოპოზიციური ძალა.
"დასრულდა ადგილობროვი თვითმმართველობის არჩევნები, რომელმაც ქართულ პოლიტიკურ სივრცეზე ახალი ეროვნული პოლიტიკური ორგანიზაცია "საქართველოს პატრიოტთა ალიანსი" შემოიყვანა.
ამ ეროვნული ძალისათვის მიღწეული შედეგი გამარჯვების ტოლფასია. მიუხედავად იმისა, რომ საქართველოს რაიონების დიდ ნაწილში საერთოდ არ ფუნქციონირებდა მათი არც ერთი ორგანიზაციული სტრუქტურა, მოხერხდა საარჩევნო ბარიერის გადალახვა და კვალიფიციური პოლიტიკური სუბიექტის სტატუსის მიღება. ამაში განუზომელია გურიაში მცხოვრები ამომრჩევლის დამსახურება. განსაკუთრებით ოზურგეთში, სადაც "საქართველოს პატრიოტთა ალიანსი" მეორე ადგილზე გავიდა და ამჟამად სწორედ ის გახლავთ ძირითადი ოპოზიციური ძალა.
მათ ჰყავთ წარმომადგენლები გურიის სამივე თემსა და ქ. ოზურგეთის საკრებულოებში. ეს მართლაც დიდი გამარჯვებაა ახალი პოლიტიკური ძალისათვის", _ თქვა მედიის წარმომადგენლებთან შოთა გოგიბერიძემ.
"ერთიანი ნაციონალური მოძრაობის" ერთ-ერთი ლიდერი და ოზურგეთის ახალარჩეული საკრებულოს დეპუტატი, პაატა მანჯგალაძე, შოთა გოგიბერიძის განცხადებასთან დაკავშირებით ჩვენთან საუბრის დროს ასეთ კომენტარს აკეთებს:
"მას, რა თქმა უნდა, შეუძლია მსგავსი განცხადებების გაკეთება. თუმცა, რეალობაში ამის საფუძველი არ გააჩნია, რადგან, როგორც არჩევნების შედეგები ისე მისი და მისი გუნდის ხელისუფლებასთან დამოკიდებულება საწინააღმდეგოს ამტკიცებს. დავიწყოთ არჩევნების შედეგებით, მაგალითად: ოზურგეთის საარჩევნო ოლქის 62 უბნიდან მისმა "ალიანსმა "ნაციონალურ მოძრაობაზე უკეთესი შედეგი მხოლოდ 14 საარჩევნო უბანზე აჩვენა და პროცენტულადაც დაახლოებით 7% ით ნაკლები აიღო ვიდრე ნაციონალურმა მოძრაობამ. ახლა რაც შეეხება მისი და მისი პარტიის მთავარ ოპოზიციონერობას ეს კიდევ უფრო აბსურდულია, რადგან ის გახლავთ პიროვნება რომელიც ოპოზიციონერი (ბრჭყალებში) მხოლოდ იმიტომ არის რომ ვერ აისრულა მისი სანუკვარი ოცნება და ვერ გახდა ქართული ოცნების მერობის კანდიდატი ოზურგეთში. ხოლო ე. წ "პატრიოტთა ალიანსი" წარმოადგენს უცხო ქვეყნის ინტერესების გამტარებელ ძალას ქვეყანაში, რომელიც ოპონირების რეჟიმში არა ხელისუფლებასთან, არამედ "ნაციონალურ მოძრაობასთან" იმყოფება."
_ ბატონო პაატა, ოთხი დეპუტატი ოზურგეთის მუნიციპალიტეტის საკრებულოში და ერთი დეპუტატი ქალაქ ოზურგეთში საკრებულოში – არის თუ არა ეს ის შედეგი, რომელსაც ელოდებოდით?
_ რადიკალურად განსხვავებულს ნამდვილად არ ველოდით. საერთოდ საქართველოში დამკვიდრებულია სტერეოტიპი რომ წარუმატებლობას ძირითადად ყოველთვის სხვებს აბრალებენ. თუმცა ისიც ფაქტია რომ ხელისუფლება ქვეყნის მასშტაბით ახორციელებდა ზეწოლებს ყველა მეტნაკლებად რეიტინგის მქონე კანდიდატის მიმართ, დააკავეს მოგების მაღალი შანსის მქონე რამდენიმე მუნიციპალიტეტის გამგებლობის კანდიდატი, ხოლო სხვა კანდიდატების წინააღმდეგ მიმდინარეობდა არნახული ცილისმწამებლური კამპანია და ამ ფონზე მაინც უნდა ვაღიაროთ რომ ეს არ ყოფილა ის ძირითადი ფაქტორები რის გამოც ნაციონალურმა მოძრაობამ წარმატებას ვერ მიაღწია. ჩვენ ვერ შევძელით ხალხისთვის იმის რწმენის დაბრუნება რომ ჩვენ შევიცვალეთ და რომ ჩვენ უნიათოებზე უარესები არ ვართ.
_ თქვენ ხელმძღვანელობდით გურიაში ნაციონალური მოძრაობის საარჩევნო შტაბს იმის თქმა გინდათ რომ წარუმატებლობა თქვენი მიზეზებით იყო განპირობებული.
_ ჩვენ რა თქმა უნდა არ გავურბივარ ჩვენ წილ პასუხისმგებლობას, მაგრამ ისიც უნდა ვაღიაროთ რომ დღეს ნაციონალური მოძრაობის პარტიულ რეიტინგთან დაკავშირებული პრობლემები რაიონის, თუნდაც რეგიონის დონეზე ვერ გადაწყდება.
მხოლოდ იმის მტკიცება პარტიამ წარუმატებლობა იმიტომ განიცადა რომ "ქართული ოცნება'' ხალხს მიწიერ სამოთხეს დაჰპირდა ან ოლიგარქს ბევრი ფული აქვს და მას კრიმინალური ავტორიტეტები ანდა საქართველოში რუსეთის მეხუთე კოლონა ეხმარებოდა არაფრის მომცემია.
თანაც ეს ყველაფერი მხოლოდ პრობლემის ნაწილობრივი ახსნაა და არ წარმოადგენს იმ ფაქტორებს რაზეც გავლენის მოხდენა ოპოზიაციაში მყოფ ძალას შეუძლია.
ჩვენთვის უმთავრესი გამოწვევა ხალხის ნდობის დაბრუნებაა, რაც უპირველესად მათი პრობლემების, საჭიროებების გათავისებასა და გადაწყვეტის გზებზე გადის.
