გურიაში, 5 ივნისს, ძლიერი ქარის შედეგად, ოზურგეთის მუნიციპალიტეტის მოსახლეობას თხილის მოსავალი გაუნადგურდა.
სტიქიასთან დაკავშირებით ოზურგეთის მუნიციპალიტეტის რამდენიმე სოფელში _ ბახვში, ცხემლისხიდში, ბაღდადში, ლიხაურში მოსახლეობამ აქციებიც გამართა. ისინი ხელისუფლების მხრიდან ყურადღებას და ზარალის ანაზღაურებას მოითხოვდნენ.
ადგილობრივი ხელისუფლების, კონკრეტულად, სოფლის მეურნეობის საკონსულტაციო ცენტრის წარმომადგენლების დავალებით, სოფლის რწმუნებულებისა და თანაშემწეების მიერ მოხდა ზარალის პირობითი აღწერა.
მანამდე კი, 9 ივნისს, საღამოს 9 საათზე, ოზურგეთის მუნიციპალიტეტის გამგეობის ინფრასტრუქტურის სამსახურში, საგანგებო თათბირი ჩატარდა. უკვე ყოფილმა ხელმძღვანელმა პირებმა _ ოზურგეთის მუნიციპალიტეტის გამგებლის მოვალეობის შემსრულებელმა კონსტანტინე შარაშენიძემ, გამგებლის მოადგილე ირაკლი სირაძემ და ინფრასტრუქტურის სამსახურის უფროსმა თემურ გიორგაძემ გურიის გუბერნატორს გიორგი ჩხაიძეს 5 ივნისს, ოზურგეთის მუნიციპალიტეტში მომხდარი სტიქიის შედეგების იმ დროისთვის არსებული ვითარება გააცნეს. ითქვა, რომ ზარალის ოდენობა უახლოეს პერიოდში გახდებოდა ცნობილი, რის შემდეგაც ინფორმაცია რეგიონული განვითარებისა და ინფრასტრუქტურის სამინისტროს გადაეგზავნებოდა.
გუბერნატორმა თათბირზე სტიქიისგან მიყენებული ზარალის ანაზღაურებაზეც ისაუბრა და აღნიშნა, რომ ზარალის დათვლა აუცილებლად მოხდებოდა, ხოლო რა სახით გაეწეოდა დახმარება მოსახლეობას, ამას უკვე შესაბამისი სამინისტრო გადაწყვეტდა.
სტიქიის შემდეგ 2 თვე გავიდა, მოსახლეობა კი დახმარებას ამაოდ ელის.
_ წინასაარჩევნოდ მოგვატყუეს, ვითომ ზარალს აგვინაზღაურებდნენ, _ ამ სიტყვებს თითქმის ყველა სოფელში მცხოვრები მოქალაქისგან გაიგონებთ.
"გურია ნიუსი" რამდენიმე სოფლის რწმუნებულს დაუკავშირდა.
ბესიკ ლომინაძე, ოზურგეთის მუნიციპალიტეტის სოფელ შემოქმედის რწმუნებული: _ პირველი მე დავიწყე მოსახლეობაში ზარალის აღწერა, ყველაფერი რეალურად მაქვს გაკეთებული.
_ ბატონო ბესიკ, გაქვთ თუ არა ინფორმაცია, რომ მოსახლეობას დაეხმარებიან?
_ ველოდებით. აუცილებლად დაეხმარებიან. სოფლის მეურნეობის სააგენტოდან დაგვავალეს, რომ მომხდარიყო აღწერა. უნდა გვცოდნოდა, თითოეულმა ოჯახმა რა რაოდენობის ზარალი ნახა. ხალხს ძალიან დიდი იმედი აქვს, რომ კომპენსაციას მიიღებს, თან თხილის მოსავალი წელს ნაკლებია. ძალიან დაზარალდა მოსახლეობა, _ გვითხრა ბესიკ ლომინაძემ.
დავით ჭანუყვაძე, სოფელ ცხემლისხიდის რწმუნებული: _ ჩვენ აღვწერეთ ზარალი _ ეს დაგვავალა მუნიციპალიტეტმა; ახლა არანაირ ინფორმაციას არ ვფლობ კომპენსაციასთან დაკავშირებით.
სოფლის მეურნეობის სამინისტროს ოზურგეთის რაიონული საინფორმაციო-საკონსულტაციო სამსახურის უფროსი გიორგი ჭყონია "გურია ნიუსთან" ამბობს, რომ მოსახლეობას დახმარებას არავინ არ შეჰპირებია:
_ საინტერესოა, ვინ შეჰპირდა მოსახლეობას კომპენსაციას მოგცემო? აღწერას აკეთებდნენ, მართალია, მაგრამ ეს იმას არ ნიშნავს, რომ ვინმე დახმარებას და კომპენსაციას მისცემდა. თუ ვინმემ გაავრცელა ეს ინფორმაცია, ძალიან ცუდი. უბრალოდ, მოხდა ზარალის შეფასება. არც ახლა მაქვს რაიმე სახის ინფორმაცია ამაზე.
_ ბატონო გიორგი, რა მიზანი ჰქონდა ზარალის აღწერას და დათვლას?
_ ვერ გეტყვით, რა მიზანი ჰქონდა. უბრალოდ, ხომ უნდა შეფასებულიყო. ეს იყოს და ეს, _ გვითხრა გიორგი ჭყონიამ.
თინა თოდრია, სოფელ დვაბზუს მცხოვრები: _ სოფელ დვაბზუში თხილია ჩვენი შემოსავალი, მეტი რა გვაქვს. არავის არაფერი კომპენსაცია არ მოუცია, მოგვატყუეს. გავიგეთ, თხილს მაღალი ფასი აქვსო და მაგას დაკმაყოფილდითო. ჩვენ ველოდებით დახმარებას, არ მოგვცემენ? იქნებ, თქვენ იცით, გვითხარით!
ნანი ბაკურიძე-ლომინაძე, სოფელ ბაღდადის მკვიდრი: _ აქციები რომ მოვაწყვეთ, მერე გამოიფხიკეს ყურები, შეშინდნენ, წინასაარჩევნო პერიოდი იყო; მოვიდნენ გამგეობიდან, აღწერეს, მაგრამ მერე არავის არაფერი ამბავი არ უკითხავს. დამთავრდა არჩევნები, ვიღას ვახსოვართ ახლა ჩვენ?! თურმე თხილს მაღალი ფასი აქვს და ამიტომ არ გაძლევთ დახმარებასო, ასე მოვისმინე ტელევიზორში.
ლია მუმლაძე, ცხემლისხდის მცხოვრები: _ მოსავლის 100 პროცენტიდან 70 პროცენტი მაინც განადგურებულია. მთელი სოფლის სახელით შემიძლია გითხრათ, რომ ამბავიც აღარავის უკითხავს. უკიდურესს ზღვრამდე მივა გურია ძალიან მალე. ზამთარში შიმშილით დაიხოცებიან. ყველას ბანკის ვალი აქვს.
ციალა ბერძენიშვილი: _ იმედი გვაქვს, რომ ცოტას მაინც მოგვცემენ კომპენსაციის სახით. მე, პირადად, ამის იმედი მაქვს.
დავით მჟავანაძე, ოზურგეთს მუნიციპალიტეტის სოფელ ჭანიეთის ახალი მოწვევის საკრებულოს მაჟორიტარი დეპუტატი და ყოფილი რწმუნებული: _ წინასაარჩევნო პერიოდში ამოვარდნილი ძლიერი ქარი პოლიტიკურად მომგებიანი აღმოჩნდა კოალიცია "ქართული ოცნებისთვის", რაც იმაში გამოიხატა, რომ აღნიშნული შემთხვევა წინასაარჩევნო კამპანიის ნაწილად იქცა. მოლოდინის შექმნის მიზნით, ვითომ დაიწყო წინასაარჩევნო პერიოდში ზარალის აღწერა, რაშიც ჩართული იყვნენ სოფლის რწმუნებულები და თანაშემწეები. 24 საათის განმავლობაში ისინი გულმოდგინედ დადიოდნენ ოჯახ-ოჯახ და აღწერდნენ ზარალს, თუმცა, არჩევნები დამთავრდა და გლეხის გასაჭირი ყველას დაავიწყდა. ამ ეტაპზე სრული პასუხისმგებლობით ვაცხადებ, რომ ოზურგეთის მუნიციპალიტეტში არც ერთ გლეხს არავითარი დახმარება არ მიუღია. მეტიც, ამასთან დაკავშირებით არანაირი ინფორმაცია არ არსებობს _ ხელისუფლება აღნიშნულ საკითხთან დაკავშირებით დუმს.
"გურია ნიუსმა" გურიის გუბერნატორთან გიორგი ჩხაიძესთან დაკავშირება ვერ მოახერხა, გურიის გუბერნატორის პრესსამსახურის უფროსმა ნინო ლომჯარიამ კი აღნიშნულთან დაკავშირებით ასეთი ინფორმაცია მოგვაწოდა:"სტიქიის მიერ მიყენებული ზარალი შეისწავლა სპეციალურმა კომისიამ და მოხდა დაზარალებული მოსახლეობის სრული აღწერა, ასევე, დადგინდა მიყენებული ზარალი. კომისიას რომ სრულად შეესწავლა სტიქიის მიერ ზარალის ოდენობა საკმაო დრო დასჭირდა. ამჟამად საკითხი საბოლოოდ შესწავლილია და ველოდებით ზემდგომი ორგანოებისგან რეაგირებას".
