ზაფხულის სიცხეში, კონდიციონერის გარეშე მუშაობა და საერთოდ, არსებობა შეუძლებელი ხდება. თუმცა, ძალიან ცოტამ თუ იცის, რომ ოფისებსა და სახლებში დამონტაჟებული კონდიციონერი სიცოცხლისთვის საშიში შეიძლება აღმოჩნდეს.
აკაკი წერეთლის სახელობის სახელმწიფო უნივერსიტეტის პროფესორი და სამაცივრე დარგის სპეციალისტი თემურ გორდელაძე ამბობს, რომ ოჯახში რაც უფრო ძველია კონდიციონერი, მით მეტია იქ მცხოვრები ადამიანების ჯანმრთელობის დაზიანების საფრთხე.
"ე.წ. საბჭოური ტიპის კონდიციონერების შიგნით უამრავი ნაგავია თავმოყრილი. არის მუტაციური ბაქტერიები, ჩნდება სოკოვანი დაავადებები. როდესაც ამ კონდიციონერებს ვრთავთ, იქიდან ეს ყველაფერი პირდაპირ ჩვენს ოთახებში იფრქვევა. იმისთვის რომ კონდიციონერმა, რაც შეიძლება ნაკლები ბაქტერია გააფრქვიოს სახლში, აუცილებელია მისი გაწმენდა-დეზინფექცია წელიწადში ორჯერ, სეზონის დაწყების და დამთავრების შემდეგ. საქართველოში კი გაწმენდის მომსახურება არ არსებობს. ჰგონიათ, თუ მარტო ფილტრს გაასუფთავებენ ჩვრით, საკმარისია. ერთია, მექანიკური გაწმენდა და მეორე – ზეთით დამუშავება. გამწმენდი ნივთიერებებიც უნდა იყოს სწორად შერჩეული", _ აცხადებს თემურ გორდელაძე.
გორდელაძის თქმით, სხვა ქვეყნებში, ევროპასა და ახლა უკვე რუსეთშიც აქტიურად მიმდინარეობს კონდიციონერების გაწმენდა. განსაკუთრებით ავტომობილების კონდიციონერების. საქართველოში კი არც მათი გაწმენდის პრაქტიკა არ არსებობს.
"მეცნიერებს ბოლომდე შესწავლილი არ აქვს, რა საფრთხის შემცველია ავტომობილის კონდიციონერები. მექანიკურად შეიძლება ტექნიკოსმა დაინახოს, რა ხდება მანქანის კონდიციონერში. მინახავს, 10 წლის ნახმარი ავტომობილის ფილტრი რა მდგომარეობაში ყოფილა. მტვრით და ათასი რაღაცით სავსე, რომელიც პირდაპირ მანქანის სალონში შედის. შეიძლება ბაქტერიების არსებობა მანქანაში გაფრქვეული არასასიამოვნო სუნით შეატყოთ. ზამთარში ღუმელი როდესაც ირთვება, სუნი უფრო საგრძნობი ხდება".
თემურ გორდელაძე მსგავსი სიტუაციების თავიდან ასაცილებლად მომხმარებელს ურჩევს, გამწმენდ-სპეციალისტს მოთხოვოს, კონდიციონერს ხუფი მოხსნას, მექანიკურად გაასუფთაოს, თუ მადეზინფიცირებელ საშუალება არ ექნება, ძირითადი მტვერი მაინც მოაშოროს.
"არ მინდა ანტირეკლამა გამომივიდეს, მაგრამ არ არის სასურველი, მოძველებული მოდელის კონდიციონერის ყიდვა. ის მალე ამოვა ხმარებიდან და მისი მომსახურება ძვირი დაჯდება, იმიტომ რომ, შესაძლოა მისი შემცვლელი აგრეგატი ხვალ დეფიციტური აღმოჩნდეს და საერთოდ ვეღარ შეკეთდეს. თან ეს მოდელი ყველაზე მეტად შეცავს ოზონდამშლელ ნივთიერებას (ე. წ. ფრეონი). თუ გაფუჭდება მსგავსი კონდიციონერი, ნივთიერებამ შეიძლება გაჟონოს და ოზონის შრისთვის საშიში აღმოჩნდეს", _ამბობს გორდელაძე.
გარემოს დაცვისა და ბუნებრივი რესურსების სამინისტრო "ატმოსფერული ჰაერის შესახებ კანონში" ცვლილებებს და მემაცივრე- ტექნიკოსების გადამზადებას გეგმავს.
როგორც გარემოს დაცვის სამინისტროს ოზონის ეროვნული ჯგუფის ხელმძღვანელი ნოე მეგრელიშვილი აცხადებს, აუცილებელია სამაცივრე დარგის სპეციალისტებმა გადამზადების კურსი გაიარონ, რომ მათ იცოდნენ მაცივრებში გამოყენებულ ოზონდამშლელ ნივთიერებებთან მოპყრობა და ასევე ტექნიკის სწორი გაწმენდა.
"სექტემბერში შევიტანთ კანონპროექტს საქართველოს პარლამენტში, რომელიც მემაცივრე ტექნიკოსთა სერტიფიცირებასაც ითვალისწინებს. მას კარგად ეცოდინება მაცივარ-აგენტების (ოზონდამშლელი ნივთიერებების) გავლენა გარემოზე. ძველი მემაცივრე ტექნიკოსისთვის სასაცილო იქნებოდა, ფრეონის შენახვა გაწმენდისას, ისე რომ არ გაეფრქვიათ გარემოში. ახლა კი ამაზე სანქციები და ჯარიმები იქნება", _ ამბობს მეგრელიშვილი.
