სასჯელაღსრულების მე-12 დაწესებულებაში ორი პატიმარი ვიქტორ გელაშვილი და გიორგი ნიკოლაშვილი უკვე მე-4 დღეა შიმშილობს.
დღეს "გურია ნიუსს" ერთ-ერთი მათგანი ვიქტორ გელაშვილი დაუკავშირდა, რომელმაც ჩვენთან სატელეფონო საუბრისას განაცხადა, რომ მიუხედავად ოთხდღიანი შიმშილობისა, მათი არცერთი მოთხოვნა არ დაკმაყოფილდა.
პატიმრები მათი საქმეების გადახედვას ითხოვენ, ასევე შეხვედრას სახალხო დამცველთან უჩა ნანუაშვილთან, პარლამენტის ადამიანის უფლებათა დაცვის კომიტეტის თავმჯდომარესთან ეკა ბესელიასთან და ამავე კომიტეტის წევრთან გედევან ფოფხაძესთან.
"გურია ნიუსმა" ვითარების გარკვევა ყველა მათგან სცადა. ეკა ბესელიას და გედევან ფოფხაძეს კუთვნილი მობილური ტელეფონები გამორთული აქვთ და მათი პოზიციის გარკვევა ამ მიზეზით ვერ მოვახერხეთ. რაც შეეხება სახალხო დამცველის აპარატს, საზოგადოებასთან ურთიერთობის სამსახურის წარმომადგენელმა ჩვენთან საუბრისას განაცხადა, რომ აღნიშნულის შესახებ საქმის კურსში არიან, თუმცა როდის შეხვდება მოშიმშილე პატიმრებს სახალხო დამცველი, ზუსტად არ იციან. მისი თქმით, შეხვედრა უახლოეს დღეებში მოხდება.
რაც შეეხება თავად სასჯელაღსრულების სამინისტროს, "გურია ნიუსი" მასმედიასთან ურთიერთობის სამმართველოს ხელმძღვანელ თაია მახარაშვილს დაუკავშირდა, რომელმაც განგვიცხადა, რომ შიმშილობის შესახებ სამინისტრო საქმის კურსშია პირველსავე დღიდან და პატიმრები სამედიცინო პერსონალის მეთვალყურეობის ქვეშ იმყოფებიან. პროცესში ჩართულები არიან ფსიქოლოგებიც და ამ ეტაპზე მათი მდგომარეობა სტაბილურია.
" საქმის გადახედვა ჩვენი პრეროგატივა არ არის. მათ თუ მიმართეს წერილობით სახალხო დამცველს და პარლამენტის ადამიანის უფლებათა დაცვის კომიტეტს, რა თქმა უნდა, კორესპონდენციები გაეგზავნებოდათ. ჩვენი მხრიდან შიმშილობის პროცესში ჩართულია სამედიცინო დეპარტამენტი, რომელიც სიტუაციას აკონტროლებს.
შეგახსენებთ, რომ აღნიშნულ დაწესებულებაში პატიმრები ორი თვის წინაც აპირებდნენ შიმშილობის დაწყებას. მაშინ, შიმშილობის მიზეზი არასათანადო პირობები და მედიკამენტების არარსებობა გახლდათ.
მოთხოვნათა ჩამონათვალი ასეთი იყო: საქმეების გადახედვა გრძელვადიანი პაემნები ინტერნეტპაემნები, სამედიცინო დახმარება.
" საერთოდ არ არის მედიკამენტები პირადი ჰიგიენის ნივთები არ გვაქვს, საკვების რაციონი საზიზღარია, უდოს და შეწყალებას არავის უყენებენ. დიდი ხანია ვითხოვთ შეხვედრას სახალხო დამცველის წარმომადგენელთან და ქალბატონ ეკა ბესელიასთან, მაგრამ ხმა ვერანაირად ვერ მივაწვდინეთ" _ განაცხადეს მათ ჩვენთან საუბრისას.
მაშინ ეკა ბესელიამ ჩვენთან საუბრისას განაცხადა, რომ აღნიშნულ დაწესებულებაში პრობლემები ნამდვილად იყო:
"ჩვენ რამდენიმე წერილი მივიღეთ, ეს იყო დაახლოებით წინა თვეში და იმის წინა თვეშიც. მე-12 -დან ნამდვილად შემოვიდა წერილი მედიკამენტებთან და სამედიცინო მომსახურებასთან დაკავშირებით, რაზედაც მოვახდინე რეაგირება და გავუგზავნე მინისტრს რამდენიმე წერილი, რათა დახმარება აღმოეჩინათ. იქ იყვნენ კონკრეტული ადამიანები, რომლებიც წერდნენ თავიანთი პრობლემების შესახებ და პირდაპირ მინისტრთან გადავაგზავნე რეკომენდაცია, რათა ყურადღება მიექციათ მათთვის. რაც შეეხება შეხვედრას, მზად ვარ შევხვდე ამ პატიმრებს და პირადად მოვისმინო მათგან რაც აწუხებთ."
რაც შეეხება კონკრეტულ საქმეს, რომლის გადახედვასაც პატიმარი ვიქტორ გელაშვილი ითხოვს, "გურია ნიუსი" მოგვიანებით შემოგთავაზებთ.
პატიმრები შიმშილობის შეწყვეტას მანამდე გააგრძელებენ, სანამ მათ სახალხო დამცველი არ შეხვდება.
