მარჯანიშვილის 9 ნომერში მდებარე კომპანია "საქწიგნის" კუთვნილი ფართი, საქართველოს ეკონომიკის სამინისტროს დაქვემდებარებულმა უწყებამ, ქონების ეროვნულმა სააგენტომ გაასხვისა.
წიგნების სადისტრიბუციო კომპანიის კუთვნილი ინვენტარის და თანამშრომლების გადაყვანა სხვაგან იგეგმება. თუმცა, როგორც "საქწიგნის" დირექტორის მოადგილე ლია მეტრეველი ამბობს, რადიოლოგიის კვლევის ლაბორატორია, რომელიც მათი სამსახურის განთავსების ადგილად მოიაზრება, ჯერ "საქწიგნს" ოფიციალურად არ გადასცემია.
ამასთან, არ არსებობს შენობის რადიაციული ფონის ანალიზი და იქ წიგნების და თანამშრომლების ყოფნაც სახიფათოა.
"გურია ნიუსმა" ლია მეტრეველთან "საქწიგნის" ბედის შესახებ ინტერვიუ ჩაწერა.
_ ქალბატონო ლია, დეტალურად მოგვიყევით რა პრობლემების წინაშე დგას "საქწიგნი".
_ გვაძალებენ, რომ სასწრაფოდ დავცალოთ შენობა. ქონების ეროვნული სააგენტოდან სიტყვიერი გაფრთხილება გვქონდა. ოფიციალური წერილი არ მიგვიღია. 83 წიგნის მაღაზიიდან ერთი ეს მაღაზია და უფანჯრო საწყობი დაგვრჩა თაბუკაშვილზე.
იქ, ისედაც უამრავი წიგნია. გავშალეთ თაროები და იქ უნდა მოვათავსოთ, აქ რა წიგნებიც გვაქვს. ჯერ სულ არ წაგვიღია. სად გვიშვებენ, ზუსტად არ ვიცით. დირექტორს ეუბნებიან, რომ ის რადიაციულად დაბინძურებული შენობა, რომელიც გადმოგვცეს, გარემონტდება. ჩემს დირექტორს ვუთხარი, თუ არ მოიტანთ იმ შენობის რადიაციული ფონის ანალიზს – შეიძლება თუ არა იქ ადამიანების შეშვება – არ გადავალ-მეთქი. ფანჯარა არ იღება საერთოდ. იქ ადამიანები რომ მუშაობდნენ, ალბათ, მიდიოდნენ ნახევარი საათი. ცოტა ხანს აწარმოებდნენ დაკვირვებას. ჩვენ კი მთელი დღე როგორ უნდა გავძლოთ? არ არის გამორიცხული, თანამშრომლები უხელფასო შვებულებაში წავიდნენ.
ჩემი თანამშრომლები მეუბნებიან, ზედმეტად ნუ ხმაურობო, ეშინიათ. დირექტორსაც ეშინია, პროტესტს არ გამოთქვამს. იურიდიული მისამართი უნდა შევიცვალოთ. ხომ უნდა დავრეგისტრირდეთ? არაფერი არ არის გათვალსწინებული.
"საქწიგნი" იყო ერთადერთი წიგნის სადისტრიბუციო ორგანიზაცია, რომელიც შედიოდა დიდ საგამომცემლო სახლში. ჩვენ მათი დისტრიბუტორები ვიყავით. მესმის, რომ არ იყო 83 წიგნის მაღაზია საჭირო, მაგრამ სულ რომ მოშალეს, შეიძლება? ჩემი შვილი ციურიხში ცხოვრობს. იქ რომ ჩავდიოდი, პირველი რასაც ვაკეთებდი, წიგნის მაღაზიებს ვათვალიერებდი. ყოველ ფეხის ნაბიჯზეა პატარ-პატარა წიგნის მაღაზიები. ე.ი. საჭიროა. ჩვენ რატომ არ გვჭირდება? ახლა გაიხსნა, ღვთის წყალობით, ახალი წიგნის მაღაზიები. მაგრამ სახელმწიფო მაღაზიაც ხომ საჭიროა?
_ როგორ მოხდა, "საქწიგნის" კუთვნილი მაღაზიების ნელ-ნელა გასხვისება?
_ "საქწიგნში" 1983 წლიდან ვმუშაობ. ყოველთვის ვიყავი რაღაც თანამდებობაზე. რომ არ ვყოფილიყავი, რამდენჯერ ვიქნებოდი დაჭერილი, ვინ იცის. ფინანსური პოლიცია ჩემს სახელზე გზავნიდა წერილებს.
ვაპროტესტებდი, რომ გვისხვისებდნენ ქონებას. კახა დამენია რომ მოვიდა სახელმწიფო ქონების ეროვნულ სააგენტოში, მივიტანეთ პროკურატურაში საბუთები და პროცესი მოვიგეთ. მანამდეც არაერთხელ მოგვიგია პროცესი. ჩვენი ინტერესების დამცველი ადვოკატი ნინო ენუქიძე იყო. ამდენი ხალხი მოწმედ მივდიოდით, მიგვქონდა დოკუმენტები, მაგრამ იმარჯვებდა ფული. ნინო ენუქიძემ წაგვაგებინა პროცესი და უცებ აღმოჩნდა, რომ რამდენიმე ოთახი მისცეს საკუთარი ადვოკატურისთვის, უზნაძის 18 ნომერში, რომელიც ასევე "საქწიგნს" ეკუთვნოდა და რომელზეც ვდაობდით.
მიშა როდესაც საკრებულოს თავმჯდომარე იყო, ერთი თვის განმავლობაში დავყავდი სხდომებზე. ჩვენთანაც მოვიდა. უნდა მეჩვენებინა, 14 ათასი კვადრატული ფართი 35 ათას დოლარად რომ გაიყიდა. ფაქტობრივად, გააჩუქეს. "რამდენად გაიყიდაო?". 35 ათას დოლარად მეთქი. დაფიქრდა, "მე თქვენი გულისთვის მოსამართლეებს არ გადავიმტერებო". რატომ ჩემი გულისთვის? სახელმწიფო ქონება იყო.
2 თვეში პრეზიდენტი გახდა. ის უკვე აღარ იყო ჩემი პრეზიდენტი. ვთქვათ, მართალი ვარ და ვიჩაგრები, არ უნდა დაინტერესდეს? იმ დღეს დამთავრდა ჩემთვის მიშა სააკაშვილი.
_ ამბობთ, რომ არანაირი ოფიციალური წერილი არ მიგიღიათ ქონების მართვის სააგენტოდან. მაშინ რა გაძლევთ იმის თქმის საფუძველს, რომ კომპანია "საქწიგნის" კუთვნილი ფართი მარჯანიშვილის #9-ში გასხვისებულია და შენობა უნდა დაცალოთ?
_ მე-13-ე პოლიკლინიკიდან რომ გამოყარეს ექიმები, აი, ეგ ქალები მოვიდნენ და მოგვიტანეს მთავრობის განკარგულება. სადაც წერია, რომ ეს შენობა ჩვენ აღარ გვეკუთვნის, რომ ეს ტერიტორია ეკონომიკის სამინისტრომ მათ შპს-ს, "სამედიცინო ცენტრ მედიმედს", იჯარით გადასცა. ადრეც იყვნენ მოსულები. ვუთხარით, პრობლემები შეექმნებოდათ. ვთხოვეთ, 80 კვადრატი მოეცათ ჩვენთვის. დაგვთანხმდნენ, მაგრამ მერე უცებ მოიტანეს ეს განკარგულება. აუქციონზე რომ გაეყიდათ, ვერ მივედავებოდით.
ჩვენც მივიდოდით და ვიყიდდით. მე ნამდვილად არ მაქვს მაგდენი თანხა, მაგრამ თანამშრომლები შევაგროვებდით და გამოვისყიდდით. მერე საპროტესტო რაღა გვქონდა. სახელმწიფოს ასეც უნდა ექნა, აუქციონი გამოეცხადებინა. ვიღაცას რომ აძლევს, ეს რა დამოკიდებულებაა? აქ ამდენი ხანი ვმუშაობ. დილით მე ვაღებ კარს, საღამოს გავდივარ და მე ვკეტავ. შემოჭრების პერიოდი რომ იყო, პოლიციელებივით ვიდექით, რამე რომ არ წაეღოთ. ვდარაჯობდით და ასე გვექცევიან ახლა.
ფაქტობრივად, 539.29 კვ.მ ფართს ჩუქნიან "სამედიცინო ცენტრ მედიმედს". უფლებას აძლევენ ეტაპობრივად გადაიხადონ ქირა. იჯარის ვადის გასვლის შემდეგ 607 ათას ლარად პირდაპირი მიყიდვის წესით აძლევენ. კი ბატონო, მათაც სჭირდებათ, მაგრამ ჩვენ, რომლებიც ამდენი ხანია ამ დაწესებულებაში ვმუშაობთ, რატომ არ გვეკითხებიან, იქნებ ამ პირობებით ჩვენც ვყიდულობდით?
_ თუ მიმართეთ ვინმეს დახმარებისთვის?
_ დეპეშა გავუგზავნე ღარიბაშვილს. კიდევ ვაპირებ მიკითხვას. ეკონომიკის სამინისტროსაც ჩავაბარე განცხადება. ფორმალური მხარე დავიცავი. ჯერ-ჯერობით არავინ გამომხმაურებია. პარლამენტარი გოგი ქავთარაძე მეუბნებოდა, ციურიხში რომ ვიყავი, რატომ არ იღებთ ხმას მანდ მყოფი ქართველები, ქვეყანაში მიმდინარე მოვლენებზეო. ვიღებდით კი არა, ჩვენ რომ არ ვყოფილიყავით, შეეკრიბათ, აბა, ხალხი მიტინგებზე! ახლა კი ჩვენს პრობლემაზე როცა მივმართეთ, თვითონ რატომ არ იღებენ ხმას?
"გურია ნიუსი" შეეცადა ქონების ეროვნულ სააგენტოსთან დაკავშირებას, მაგრამ სააგენტოში ჩვენს ზარებს არ უპასუხეს.
