ადგილობრივი თვითმმართველობის არჩევნების შემდეგ, ახლადარჩეულმა საკრებულოებმა, მუნიციპალიტეტებს შორის ქონების გადანაწილება დაიწყეს.
გასაუქმებელ მუნიციპალიტეტებში, განხორციელდა ქონების ინვენტარიზაცია და საკრებულოების დროებითმა სამუშაო ჯგუფებმა, ქონების გამიჯვნის განკარგულებათა პროექტების მოსამზადებლად შესაბამისი სამუშაოები ჩაატარეს.
აღნიშნული სამუშაოების ფარგლებში, ტერიტორიული პრინციპით, თანაბრად გაიყო მუნიციპალიტეტების საკუთრებაში არსებული უძრავი ქონება, ავტოსატრანსპორტო საშუალებები, ინვენტარი და სხვა ქონება.
ოზურგეთის მუნიციპალიტეტში შექმნილი იყო საინვენტარიზაციო კომისია, რომელსაც დავალებული ჰქონდა აღერიცხა მუნიციპალიტეტის ძირითადი ქონება.
აღნიშნული ჯგუფი დაკომპლექტებული იყო საკრებულოს 9 წევრით. კომისიას, საკრებულოს ყოფილი თავმჯდომარე, ავთანდილ სურგულაძე ხელმძღვანელობდა.
"გურია ნიუსის" წყაროს ინფორმაციით, ოზურგეთის მუნიციპალიტეტის გამგეობაში კომპიუტერები და ტელეფონებია დაკარგული. თუმცა, აღნიშნული ინფორმაციას არ ადასტურებენ კომპეტენტური პირები.
ოზურგეთის მუნიციპალიტეტის გამგებლის, მერაბ ჭანუყვაძის მოადგილე არჩილ ყაზაიშვილი, "გურია ნიუსთან" ამბობს, რომ სანამ შესაბამისი დასკვნა არ დაიწერება და არ წარედგინება გამგებელს, მანამდე ოფიციალურ კომენტარს აღნიშნულ საკითხზე ვერ გააკეთებს.
_ გამგეობაში იქმნება სამუშაო ჯგუფი, სანამ ეს სამუშაო ჯგუფი არ იმუშავებს, რეკომენდაციებს არ დადებს და საბოლოო დასკვნას არ წარუდგენს გამგებელს, მანამდე არაფრის თქმა არ შემიძლია, შესაბამისად შემდგომ შეგვეძლება შეფასებების გაკეთება.
_ ბატონო არჩილ, ქონების აღწერას გამგეობაში შექმნილი სალიკვიდაციო კომისია ახდენდა, არ შეასრულეს მათ თავისი საქმიანობა კანონის შესაბამისად?
_ სალიკვიდაციო კომისიამ განახორციელა თავისი საქმიანობა, კანონმდებლობის შესაბამისად, ამის შემდეგ უკვე გამგეობამ ამ ქონების მიღება–ჩაბარება უნდა უზრუნველყოს, რა თქმა უნდა, გამგებელი ამ საკითხს შესწავლის გარეშე ხელს ნამდვილად არ მოაწერს, ამან განაპირობა, რომ შეიქმნა შესაბამისი სამუშაო ჯგუფი, რომელიც შეისწავლის ამ საკითხს და შესაბამისს რეკომენდაციას მოუმზადებს გამგებელს.
"გურია ნიუსი" ინვენტარიზაციის კომისიის თავმჯდომარის მოადგილე, ავთანდილ მექვაბიშვილს დაუკავშირდა. მისი თქმით, საინვენტარიზაციო კომისიამ ქონება შეამოწმა, შეისწავლა, აღნუსხა და ჩააბარებს.
_ თუ ვინმეს აქვს რაიმე წაღებული, უკან დააბრუნებს. მე არ ვიცი, რა არის დაკარგული და რა არა, არ ვარ საქმის კურსში, თუ დამიძახებენ ამასთან დაკავშირებით მივალ.
_ ბატონო ავთო, თქვენ ხომ აღწერეთ ეს ქონება?
_ კი ავღწერეთ, მაგრამ იყო ოთახებში, ჩაბარებით არ ჩაგვიბარებია ჯერჯერობით. სალიკვიდაციო კომისია იმუშავებს კიდევ ორ თვეს, ამიტომ თუ კი ვინმეს რაიმე აქვს წაღებული, კომპიუტერი თუ ტელეფონი მიატანინებენ, მე პირადად ჩემი ოთახის ყველაფერი ჩავაბარე ბატონ არჩილ ყაზაიშვილს.
ოზურგეთის მუნიციპალიტეტის საკრებულოს ყოფილი თავმჯდომარე, ინვენტარიზაციისა და სამუშაო ჯგუფის თავმჯდომარე, სალიკვიდაციო კომისიის თავმჯდომარე, ავთანდილ სურგულაძე ამბობს, რომ ოზურგეთის მუნიციპალიტეტის გამგეობაში, არცერთი ლარის ღირებულების ქონება არ არის დაკარგული.
_ რაც ინვენტარიზაციით გავაკეთეთ, აბსოლუტურად ყველა ნივთი არის ადგილზე და ყველაფერი განაწილებულია ქალაქისა და თემის მიხედვით, რომლის გადაცემაც მოხდება მიღება–ჩაბარების აქტის ხელმოწერის დროს. ეს არის მცდარი ინფორმაცია.
_ ბატონო ავთანდილ, ინფორმაცია, იმის შესახებ რომ მუნიციპალიტეტის გამგეობაში კომპიუტერებია დაკარგული, სიმართლეს არ შეესაბამება?
_ საიდან ეს ზღაპრები?! ვინ თქვა, არ არის მართალი, მე ვარ სალიკვიდაციო კომისიის თავმჯდომარე, ეს ქონება მე უნდა გადავაბარო პირველ პირებს, გამგებელ მერაბ ჭანუყვაძეს და მერ ბეგი სიორიძეს, მიღება-ჩაბარების აქტით. აბსოლუტურად მთელი ქონება, რაც ბალანსზე არის, გავყავით, ელექტრონული ვერსიებიც გაკეთებულია, ოთახებიც გადანაწილებულია და პირადი ნივთებიც – მობილურები, კომპიუტერებიც განაწილებულია. ყველაფერი ადგილზეა, დაარქივებულია და დაკეტილია. კომისიას აბარია გასაღები. ყველაფერი ადგილზეა. ეს არის მცდარი ინფორმაცია.
