რამდენიმე წუთის წინ, კურორტ ბახმაროში მოვარდნილმა ნიაღვარმა, გზები დააზიანა და ავტომანქანა გაიტაცა.
როგორც კურორტის ხელმძღვანელმა, დავით საჯაიამ გვითხრა, ამ წუთებში გაწმენდითი სამუშაოები მიმდინარეობს.
"ძალიან ძლიერი წვიმა, პრინციპში ღვარცოფი იყო, რამაც დააზიანა გზები. ასევე, იყო შემთხვევა, როცა მანქანა გაიტაცა რამდენიმე მეტრით. საბედნიეროდ მსხვერპლი არ გვაქვს.
ამ ეტაპზე ვერ გეტყვით დაზუსტებულ ინფორმაციას არის თუ არა კიდევ სხვა უბნებში დაზიანებები.
მიუხედავად იმისა, რომ ღამეა. შესაბამისი სამსახურები მუშაობენ რათა დილით დამსვენებელს პრობლემები აღმოფხვრილი დახვდეს", _ გვითხრა საჯაიამ.
ბახმაროში იმყოფება ჩოხატაურის მუნიციპალიტეტის საკრებულოს თავმჯდომარე ზაალ მამალაძე, რომლის თქმითაც, სტიქიისგან მიყენებული ზარალის ოდენობა ჯერჯერობით უცნობია. ყველაზე მთავარი კი ისაა, რომ სტიქიას მსხვერპლი არ მოჰყოლია.
შეგახსენებთ, რომ დღეს ბახმაროში ფერიცვალების დღესასწაული აღნიშნეს. ტრადიციულ დოღს და სხვადასხვა სპორტულ და კულტურულ ღონისძიებებს ასობით სტუმარი დაესწრო, მათ შორის ჩოხატაურის მაჟორიტარი დეპუტატი თემურ ჭკუასელი, გია ვოლსკი, ლტოლვილთა და განსახლების მინისტრი სოზარ სუბარი, სხვადასხვა მხარის გუბერნატორები, მერები და პოლიციის მაღალჩინოსნები.
