(გურია ნიუსი, ლანჩხუთი) _ ლანჩხუთის “ევგრაფი შევარდნაძეზე” კვირას გამართული შეხვედრა ისტორიაში შევა, როგორც გურიაში გამართული პირველი მეგრული დერბი! კოლხებმა ლანჩხუთის არენა უკვე მეორედ დასცადეს ცუდად _ წინა შემთხვევაშიც (“დილასთან”) 0:1 წააგეს. როგორც ჩანს, ფოთელებს ნეიტრალური მოედნის კომპლექსი შეეყარათ _ წაგებას ვინ ამბობს, გუნდი სანახაობრივ ფეხბურთსაც ვერ თამაშობს. წინა ლანჩხუთური შეხვედრისგან ერთი უპირატესობა ის გახლდათ, რომ ამჯერად გაშვებული გოლის შემდეგ მაინც გააქტიურდნენ და რამდენიმე ხიფათიც შექმნეს მარტვილელთა კართან, თუმცა, მატჩის გადარჩენა ვერც ამჯერად მოახერხეს.
მართალია, გულშემატკივრები არც “მერანის” თამაშს გაუკვირვებია და ისიც უნდა ითქვას, რომ “კოლხეთს” თითქმის მთელი მატჩის მანძილზე ჰქონდა ტერიტორიული უპირატესობა, მაგრამ მალხაზ ჟვანიას გუნდის თამაშმა გურულ ქომაგებში მეტი სიმპათია დაიმსახურა. პირველ ტაიმში აშკარა საგოლე მომენტი არც შექმნილა, ერთადერთხელ თუ შეიძლებოდა ანგარიშის გახსნა და მაშინაც ამის გაკეთება მარტვილელებს შეეძლოთ. მათ ეს მაინც მოახერხეს მეორე ტაიმში _ შეცვლაზე შესულმა სამადაშვილმა კოლხთა დაცვა გააბითურა, ერთი შეხებით საჯარიმოში გრიგალივით შეჭრილ ელგუჯა გრიგალაშვილს უპასა და ამ უკანასკნელმაც მინდია ბობღიაშვილი უშანსოდ დატოვა _ 1:0. კოლხები ლაინსმენს თამაშგარის დაფიქსირებას თხოვდნენ, მაგრამ ამაოდ.
ამის შემდეგ “კოლხეთმა” შეტევა კი გააძლიერა, მაგრამ “მერანის” კართან ხიფათების რა გითხრათ და რამდენჯერმე კინაღამ “სტუმრებმა” კონტრშეტევაზე გამოიჭირეს. გამოცდილმა სოსო ფილიამ შეცვლებითაც სცადა ვითარების გამოსწორება, მაგრამ მერანელები ბოლო წუთებამდე თავს საიმედოდ იცავდნენ.
მატჩის დამატებულ პირველ წუთზე მარტვილელთა მცველმა საჯარიმოში ხელით ითამაშა. მეტად საჩოთირო ეპიზოდს კარგად ვერ ხედავდა მატჩის არბიტრი _ ლევან კვარაცხელია და კომპანია გადამცემმა მოწყობილობამაც დააღალატა, რის გამოც ლაინსმენის ნიშანი გვიან მიიღო და პენალტისკენ ხელიც ნაგვიანევად ამიტომ გაიშვირა. “კოლხეთს” მატჩის გადარჩენის შანსი მიეცა, მაგრამ ლაშა ქებაძის დარტყმული მეკარის გავლით მოხვდა ძელს, იქიდან გამოვარდნილს ქებაძემ ამჯერად თავით დაჰკრა, მაგრამ პენალტზე უფრო უხეიროდ და ჯონი შეროზიას მატჩის გმირად ქცევის შანსი მისცა _ კოლხ მობურთალს პენალტზე უკეთესი სიტუაციიდან გატანა კი მართებდა, მაგრამ არც მერანელთა კიპერის შესაშური რეაქცია უნდა დავივიწყოთ.
აქვე გეტყვით, რომ “კოლხეთისთვის” ჯონი შეროზია ბოლო წლებში პირველად არ გახდა გადაულახავი ზღუდე _ ორიოდ წლის წინ “მერანის” მეკარემ “ფაზისზე” გამართულ სათასო მეოთხედფინალში სასწაულები აკეთა, გადამწყვეტ მომენტში პენალტიც (მაშინაც ბოლო წუთებში) მოიგერია და თავისიანები კლუბის, ხოლო პირველლიგელი კლუბი ქართული ფეხბურთის ისტორიაში ნახევარფინალში პირველად გაიყვანა.
