ჩოხატაურის მუნიციპალიტეტის სოფელ გოგოლესუბნის მოსახლეობის ნაწილმა, 18 აგვისტოს აქცია გამართა და ძველი გამგებლის, ზოია თოხაძის თანამდებობაზე აღდგენა მოითხოვა:
_ ეს ქალბატონი სოფლისთვის ყველაფერს აკეთებდა, თითოეული ჩვენგანის გვერდით იდგა. "ქართულ ოცნებას’ მხარში ედგა და ისე გაათავისუფლეს, რომ ჩვენ არაფერი გვკითხეს. მიზეზი მაინც გვითხრან, რა დააშავა, _ აღნიშნეს აქციის მონაწილეებმა.
მათივე თქმით, აქციაზე მოსვლა სოფლის დეპუტატს, აკაკი ყაჭეიშვილსაც სთხოვეს, თუმცა არ მოვიდა:
_ ხალხის რჩეულმა ისიც კი არ იკადრა, რომ აქ მოსულიყო. გაყალბებული არჩევნების შედეგად გახდა დეპუტატი. მასზე ახლანდელი გამგებელი, ირაკლი კუჭავა მუშაობდა, ამიტომაც მოხდა, რომ "ოცნების" კანდიდატი ვერ გავიდა და დღეს, სოფელს "ნაციონალი" დეპუტატი ჰყავს (ყაჭეიშვილი გოგოლესუბნის დამოუკიდებელი დეპუტატია, ავტ.), რომელსაც ხალხის ბედი არ ადარდებს. ხალხი არც კუჭავას ადარდებს და ყაჭეიშვილთან შეთანხმებით ნიშნავს ახალ გამგებელს, რომელსაც სოფელი არც კი იცნობს, _ განაცხადეს აქციაზე მყოფებმა. რომელთა თქმით, ამ ყველაფერზე პასუხი კუჭავამ უნდა აგოს:
_ მობრძანდეს და გაგვცეს პასუხი, რატომ არ ითვალისწინებს ჩვენს აზრს. არ დავუშვებთ, რომ სოფელში "ნაციონალებმა" იბატონონ, _ აღნიშნეს აქციაზე და ამის დასტურად რწმუნებულის კაბინეტის კარიც აჭედეს.
_ არ ვიცი, რატომ გამათავისუფლა, რა არ მოსწონდა ჩემი. ალბათ, იმის გამო გაბრაზდა, რომ ამ სოფელში 50% ვერ აიღო ხმების. თავად ყაჭეიშვილის გასამარჯვებლად მუშაობდა და არა "ოცნების" კანდიდატზე. ყაჭეიშვილი, დეპუტატი გაყალბების შემდეგად გახდა, _ განაცხადა ყოფილმა რწმუნებულმა, ზოია თოხაძემ, რომელსაც "ქართული ოცნების" კოორდინატორიც დაეთანხმა.
ჩვენს კითხვაზე, თუკი არჩევნები გაყალბდა, რატომ ამ დრომდე არ თქვა, თოხაძემ ასე გვიპასუხა:
_ ეს ყველამ იცოდა, არასდროს დამიმალავს.
_ ქალბატონო ზოია, ამას ხმამაღლა ამბობთ ახლა, როცა გაგათავისუფლეს. თუ იცოდით, რომ უკანონობა მოხდა _ არჩევნები გააყალბეს და ამ ყველაფერში დიდი როლი ირაკლი კუჭავას მიუძღოდა, რატომ ამ დრომდე არ გვითხარით?
_ რომ მეთქვა, ვერ დავამტკიცებდი.
_ ახლა შეგიძლიათ დაამტკიცოთ?
_ ახლაც არა, მაგრამ ეს რომ ასეა, ყველამ იცის, _ დააზუსტა თოხაძემ.
აქციაზე მალევე მოვიდნენ ირაკლი კუჭავა და საკრებულოს დეპუტატები. კუჭავას თქმით, მისთვის არავის უთქვამს, რომ ხალხს მასთან შეხვედრა სურდა:
_ ჩემთვის არავის უთქვამს, რომ აქციას მართავდით და ჩემთან შეხვედრა გსურდათ. როცა დამირეკეთ, თათბირი მქონდა, მოვრჩი და მოვედი. მზად ვარ, ყველა კითხვაზე გიპასუხოთ.
არასოდეს გავექცევი თქვენთან შეხვედრას, რადგან ეს ჩემი მოვალეობაა. აქ მოსვლამდე აკაკი ყაჭეიშვილსაც ვესაუბრე და მითხრა, რომ აქციის შესახებ მანაც ახლახან გაიგო და ვერ მოახერხა მოსვლა, რადგან რაიონში არ იმყოფებოდა, _ აღნიშნა კუჭავამ.
მისივე თქმით, თოხაძე მას არ გაუთავისუფლებია:
_ მე არ გამიშვია რწმუნებული. კანონმა გაათავისუფლა. ახალი კანონის თანახმად, რწმუნებულის ინსტიტუტი გაუქმდა და დაინიშნა გამგებლის წარმომადგენელი. კანონი არ მავალდებულებს, რომ წარმომადგენლის კანდიდატურა ვინმესთან ერთად შევარჩიო. თუმცა, ყველგან, სადაც შევცვალე, სოფლის დეპუტატების აზრი მოვისმინე. რაც შეეხება ამ სოფელში დანიშნულ წარმომადგენელს _ ზურაბ რამიშვილს, ის არის პერსპექტიული ახალგაზრდა, რამდენიმე წელი გერმანიაში ცხოვრობდა და მუშაობდა. ეს არის "ახალი სისხლი", რომელიც მე მჭირდება. დავნიშნე გამოსაცდელი ვადით. თუ ვერ შეასრულებს დაკისრებულ მოვალეობას, წავა სახლში, _ განაცხადა კუჭავამ, რომლის განმარტებით, ზოია თოხაძემ, სამსახურიდან გათავისუფლების გამო სამი თვის კომპენსაციაც მიიღო.
"გურია ნიუსის" კითხვაზე, უჭერდა თუ არა არჩევნების დროს მხარს დამოუკიდებელ კანდიდატს და მუშაობდა თუ არა "ოცნების" კანდიდატის წინააღმდეგ, კუჭავამ ასე გვიპასუხა:
_ ეს არის აბსურდი. გარდა იმისა, რომ მე ვიყავი საარჩევნო შტაბში, მე ვიყავი კანდიდატიც და ვთანამშრომლობდი ყველასთან, გარდა კონკურენტი პარტიების წარმომადგენლებისა. რაც შეეხება ამ კონკრეტულ ფაქტს, სამწუხაროდ, ჩვენი კანდიდატი, რომელიც "მრეწველების" კვოტით იყო, გვიან ჩაება საარჩევნო მარათონში და ვფიქრობ, რომ ეს შეცდომა იყო. სოფელმა არჩევანი თავად გააკეთა და გაყალბება რომ მომხდარიყო, ვინ-ვინ და თქვენ მაინც გაიგებდით. ეგ ნამდვილად არ გამოგეპარებოდათ. სოფელმა ხმათა უმრავლესობით აკაკი ყაჭეიშვილი აირჩია და ეს მათი არჩევანია, _ აღნიშნა კუჭავამ.
აქციაზე კომენტარი საკრებულოს დეპუტატებმაც გააკეთეს:
_ ქალბატონი ზოია ჩვენი მხარდამჭერი იყო. როცა მე ვიყავი საარჩევნო შტაბის ხელმძღვანელი, ის ჩვენ გვერდით იდგა და თავდადებით მუშაობდა, თუმცა, დღეს, ამ აქციაზე ისეთი ხალხი დგას, რომელიც იმ პერიოდში ჩვენ გვებრძოდა და ამ გადასახედიდან სათქმელი ბევრი არაფერია, _ განაცხადა ფრაქცია "ქართული ოცნება-რესპუბლიკელების" თავმჯდომარემ გოჩა ჯიქიამ.
აქციაზე, აქტიურობით სოფლის მაჟორიტარობის ერთ-ერთი კანდიდატი, შუქრი სიხარულიძე გამოირჩეოდა (სიხარულიძე რამდენიმე წლის წინ "ნაციონალური მოძრაობის" აქტიური მხარდამჭერი და საკრებულოს წევრი იყო ამავე პარტიიდან, წლევანდელ არჩევნებზე დამოუკიდებლად იყრიდა კენჭს ავტ.).
_ ყაჭეიშვილი, გაყალბების შედეგად გახდა დეპუტატი. ახლა უნდა, რომ ყველაფერი მართოს და სოფელს არაფერი ჰკითხოს. აქაც კი ვერ მოვიდა, ხალხს ვერ გაესაუბრა. "ოცნება" რომ მისი გამარჯვებისთვის ყველაფერს აკეთებდა, ეს ახალი არავისთვის არის. მმართველის პარტიის კოორდინატორები სწორედ ყაჭეიშვილზე მუშაობდნენ, ამიტომაც მოხდა, რომ ოცნების კანდიდატმა მხოლოდ 40 ხმა აიღო, არადა, იმ კაცის სანათესაო მაინც იქნება 80 ადამიანი, _ გვითხრა სიხარულიძემ.
სიხარულიძის ამ განცხადებას დაპირისპირება მოჰყვა. საკრებულოს დეპუტატებმა სიხარულიძეს პოლიტიკური წარსული და "ნაციონალურ მოძრაობასთან" აქტიური თანამშრომლობა შეახსენეს.
დაძაბული სიტუაცია ისევ ხალხის ჩარევით განიმუხტა, რომლებიც შეხვედრით უკმაყოფილოები დარჩნენ და აღნიშნეს, რომ ამ ქვეყანაში არაფერი შეცვლილა და გადაწყვეტილებები ისევ ერთპიროვნულად მიიღება.
შეხვედრის ბოლოს, ზოია თოხაძემ ირაკლი კუჭავას გამგებლის აჭედილი ოთახის გასაღები გადასცა და პირობა მისცა, რომ ამ დღეებში ყველა დოკუმენტაციას გადააბარებს.
