“ვარწმუნებ მოსახლეობას, რომ არავითარი ბარიერი და შეზღუდვა მათ არ ექნებათ”

დღეს, ოზურგეთში, ჯანდაცვის მინისტრი დავით სერგეენკო, დემოკრატიული ჩართულობის ცენტრში სამედიცინო სფეროს წარმომადგენლებს, ოჯახის ექიმებს შეხვდა და მიმდინარე რეფორმებთან დაკავშირებით ისაუბრა.

მან  წამლების რეცეპტით გაცემაზეც გააკეთა კომენტარი.

_ რეცეპტების აღდგენის წინა, მოსამზადებელი პერიოდი თითქმის წელიწადია, რაც დაიწყო, პარლამენტმა ეს დადგენილება შარშან ივლისში მიიღო, დღევანდელი ჩემი შეხვედრა არის ერთერთი ნაწილი იმ რეგიონის შეხვედრების, რომელსაც ვატარებ მე სამედიცინოსა  და  ასევე სოციალური სამსახურის წარმომადგენლებთან, ვცდილობთ,  მოსახლეობა მაქსიმალურად იყო ჩართული და ინფორმირებული. ვარწმუნებ  მოსახლეობას, რომ არავითარი ბარიერი და შეზღუდვა მათ არ ექნებათ, არავითარი პრობლემები არ შეექმნებათ და ეს ყველაფერი მიძღვნილია იმისთვის, რომ მათ ჰქონდეთ უკეთესი ხარისხის სამედიცინო მომსახურება.

_ ბატონო დავით, პენსიორებში,  რეცეპტების შემოღებამ უკმაყოფილება  და უიმედობა უკვე გამოიწვია, მათ აინტერესებთ,  იქნება თუ არა მრავალჯერადი რეცეპტი?

_ მედიკამენტების კატეგორიზაცია არის ცალსახა ლოგიკას დაფუძნებული, თავისუფალ გაყიდვაში არის 3000 -ზე ბევრად მეტი წამალი, მათ შორის ტკივილგამაყუჩებელი, რომლის ურეცეპტოდ მიღებამ უფრო მეტი სარგებელი უნდა მოუტანოს  პაციენტს, ვიდრე საფრთხე და მეორე ჯგუფში არის პირიქით, რომლის ურეცეპტოდ მიცემა ბევრად დიდ საფრთხეს წარმოადგენს. შემოსულია ქრონიკული დაავადებებისათვის მრავალჯერადი, ერთწლიანი მოქმედების რეცეპტი , რომელსაც ერთხელ აღების შემთხვევაში მთელი წლის განმავლობაში შეუზღუდავად შეუძლიათ შეიძინონ ექიმთან მისვლის გარეშეც.