"რეცეპტების შემოღება არ იქნება დაკავშირებული მოსახლეობისთვის დამატებით ბარიერებთან და რიგების, ფინანსური და დამატებითი გადასახადების კუთხით მოსახლეობას ბარიერებს არ შეუქმნის. ჩვენ სწორედ ამ რისკების გაწერას და მომზადებას მოვუნდით ნახევარი წელი, რომ ყველა ეს რისკი დასულიყო მინიმუმამდე. მე ვფიქრობ, ეს პროექტიც ისეთივე წარმატებული იქნება, როგორიც საყოველთაო ჯანდაცვა" _ განაცხადა ჯანდაცვის მინისტრმა დავით სერგეენკომ "გურია ნიუსთან" საუბრისას.
_ ბატონო დავით, რეცეპტების თემამ, რომელიც ძალაში უკვე პირველი სექტემბრიდან შევა, საკმაოდ დიდი აჟიოტაჟი გამოიწვია საზოგადოებაში და არაერთი პოლიტიკური განცხადებაც გაკეთდა. მიუხედავად იმისა, რომ რეცეპტების შემოღებასთან დაკავშირებით კანონი პარლამენტმა უმრავლესობით მიიღო და ამის შესახებ ყველამ იცოდა, კრიტიკულ მომენტში ჯანდაცვის სამინისტრო მარტო დარჩა მოსახლეობის და პოლიტიკური ოპონენტების წინაშეც. როგორ ახსნიდით ამ ყველაფერს?
_ მართალს, ბრძანებთ, ეს პარლამენტის გადაწყვეტილება იყო, რომელიც შარშან მიიღეს, თუმცა მაშინ საზოგადოების მხრიდან ასეთი რეაქცია არ მოყოლია. ვფიქრობ, ეს იმიტომ მოხდა, რომ საზოგადოება თემას კარგად არ იცნობდა. ჩვენ, ამ გარდამავალი პერიოდის განმავლობაში, რომელიც დავიწყეთ, ერთ-ერთ მთავარ ამოცანად გავიხადეთ, საზოგადოებისთვის კარგად აგვეხსნა ამ რეფორმის არსი.
საზოგადოების ინტერესი ლეგიტიმურია. მე ვერ ვიქნები ახლა აღფრთოვანებული იმ ნეგატივის ნიაღვრით, რაც პირადად ჩემზე და სამინისტროზე მოდის, მაგრამ ის რაც ადამიანებს აინტერესებთ, ყველაფერი მისაღებია ჩემთვის.
რატომ არ ეკითხებიან პარლამენტს და რატომ გვეკითხებიან ჩვენ? ამაზე მე ჩემი შეხედულება მაქვს. ჯანდაცვის სამინისტრო და ჯანდაცვის მინისტრი პასუხისმგებელია ნებისმიერ საკითხზე, რომელიც საქართველოს მოქალაქეების ჯანდაცვასთანაა დაკავშირებული. და მიუხედავად ამ ნეგატიური ტალღისა, მე მაინც მიხარია, რომ საკითხავად ჩემთან მოდიან.
_ ამ კანონის მიღების მთავარი მოტივაცია მაინც სააფთიაქო ნარკომანიის წინააღმდეგ ბრძოლა იყო?
_ ვერ ვიტყვი, რომ მხოლოდ სააფთიაქო ნარკომანია იყო, ამას ზედ ემატებოდა თვითმკურნალობით მიღებული ზიანი და ის, რაც ჰაერივით გვჭირდება, ჯანდაცვის ხარისხი. ახლა გვსაყვედურობენ ოპონენტები, ჯერ ჯანდაცვის ხარისხზე გეზრუნათ და მერე გეფიქრათ რეცეპტებზეო. ბუნებაში ასე არ ხდება, ამ თანმიმდევრობით. სწორედ რეცეპტია ერთ-ერთი უმძლავრესი ინსტრუმენტი ხარისხის კონტროლისთვის.
_ რეცეპტების გამოწერასთან დაკავშირებით პროტესტი გამოთქვეს ზოოვეტერინარებმაც. მათი განცხადებით, ცხოველების ჯანმრთელობას, ამით, შესაძლოა საფრთხე დაემუქროს.
_ ვეტერინარულ აქტივობებს არეგულირებს სოფლის მეურნეობის სამინისტრო და ჩვენ მათთან მჭიდრო კომუნიკაცია გვქონდა. ამ მხრივ არანაირი რისკები არ მოიაზრება. მთავარი ორი მიზეზი, რის გამოც ეს ადამიანებში დავიწყეთ, არის სააფთიაქო ნარკომანია და თვითმკურნალობა. სხვათაშორის, არცერთი ცხოველი არ ყოფილა შემჩნეული, შესაბამისად, მათ სხვა გამოწვევები აქვთ და რისკებიც შესაბამისად არ აქვთ.
