ოზურგეთის მუნიციპალიტეტის გამგეობაში 9 სამსახურია. შესაბამისად, დანიშნულია 9 უფროსი, რომლებზეც ჩვენს მიერ გამოთხოვილი ოფიციალური დოკუმენტების საფუძველზე, ბრძანება 4 აგვისტოსაა დაწერილი.
"გურია ნიუსის" წყაროს ინფორმაციით, ოზურგეთის მუნიციპალიტეტის გამგეობის სამსახურის უფროსებს, სამსახურის დაწყების თაობაზე განცხადებები დაწერილი არ აქვთ. აღნიშნულ ინფორმაციას ჩვენთან საუბარში გამგეობის იურიდიული სამსახურის უფროსი, ლაშა თავაძე ადასტურებს.
"სამსახურის უფროსს განცხადების დაწერა არ სჭირდება, ის არის თანამდებობის პირი და მას გამგებელი თავად წარადგენს. ანუ განცხადება სჭირდება ისეთ პირებს, ვისზედაც ვრცელდება საჯარო სამსახურის შესახებ კანონი. სამსახურის უფროსებზე და მოადგილეებზე არ ვრცელდება ეს და განცხადების დაწერა არაა სავალდებულო. საჯარო სამსახურის შესახებ კანონი არ ვრცელდება სამსახურის უფროსებზე და მოადგლეებზე", _ გვითხრა თავაძემ.
ასე არ ფიქრობენ არასამთავრობო ორგანიზაციების იურისტები. მათ მიაჩნიათ, რომ განცხადების არ არსებობის შემთხვევაში, არ შეიძლება დაიწეროს ბრძანება და პირი დაინიშნოს თანამდებობაზე.
"საქართველოს დემოკრატიული განვითარების კავშირის" იურისტი, ირაკლი პაპავა აღნიშნულთან დაკავშირებით ასეთ კომენტარს აკეთებს:
"აღსანიშნავია, რომ საქართველოს ორგანულმა კანონმა "ადგილობრივი თვითმმართველობის კოდექსმა" გამგებლის სტატუსი შეცვალა და 2014 წლის ადგილობრივი თვითმმართველობის არჩევნების შედეგების ოფიციალურად გამოცხადების დღიდან იგი მუნიციპალიტეტის აღმასრულებელ ორგანოდ და მუნიციპალიტეტის უმაღლეს თანამდებობის პირად ითვლება თვითმმართველ თემში. ამასთან, ორგანულმა კანონმა სწორედ მას მიანიჭა მუნიციპალიტეტის გამგეობის თანამდებობის პირების (მათ შორის გამგეობის სტრუქტურული ერთეულების ხელმძღვანელთა) თანამდებობაზე დანიშვნისა და თანამდებობიდან გათავისუფლების ერთპიროვნული უფლება.
ახლა კი რაც შეეხება საკითხს იმის თაობაზე, უნდა დაეწერათ თუ არა გამგეობის სამსახურების უფროსებს განცხადებები სამსახურში მიღების თხოვნის შესახებ.
დავიწყოთ იმით, რომ "საჯარო სამსახურის შესახებ" კანონის (იხ. მუხ. 11, პუნ. 1 და 11) თანახმად, მუნიციპალიტეტის გამგებელზე/მერზე, გამგებლის/მერის მოადგილეზე, გამგეობის/მერიის სტრუქტურული ერთეულების ხელმძღვანელებზე არ ვრცელდება "საჯარო სამსახურის შესახებ" კანონის მოქმედება (გარდა ამ უკანასკნელის ცალკეული, კანონში ზუსტად მითითებული 12 კონკრეტული მუხლისა), მათ შორის არც მოხელის სამსახურში მიღების მარეგულირებელი მუხლების მოქმედება. თუმცა ამ შემთხვევაში გამოყენებული უნდა იქნას საქართველოს ზოგადი ადმინისტრაციული კოდექსით დადგენილი წესები. კერძოდ, იქიდან გამომდინარე, რომ მუნიციპალიტეტის გამგებელი (ზოგადი ადმინისტრაციული კოდექსის მე-2 მუხლის პირველი პუნქტის "ა" ქვეპუნქტის გათვალისწინებით) ადმინისტრაციულ ორგანოს წარმოადგენს, მიმაჩნია, რომ მის მიერ შესაბამისი ადმინისტრაციულ-სამართლებრივი აქტის (მოცემულ შემთხვევაში – ბრძანების) გამოცემის მიმართ დაცული უნდა იქნას ზოგადი ადმინისტრაციული კოდექსით დადგენილი ადმინისტრაციული წარმოების მოთხოვნები, ანუ ადმინისტრაციულ ორგანოში წარდგენილი ან ადმინისტრაციული ორგანოს მიერ მოთხოვნილი უნდა იქნას ყველა ის აუცილებელი დოკუმენტი (მათ შორის წერილობითი განცხადებაც შესაბამისი თხოვნის/მოთხოვნის ან თანხმობის შესახებ), რაც ადმინისტრაციული ორგანოს მიერ შესაბამისი ადმინისტრაციულ-სამართლებრივი აქტის (ჩვენს კონკრეტულ შემთხვევაში – მუნიციპალიტეტის გამგებლის ბრძანება) გამოსაცემადაა საჭირო", _ აღნიშნავს იურისტი ირაკლი პაპავა.
იურისტი ლევან ალაფიშვილი "გურია ნიუსთან" ამბობს, რომ სამსახურის უფროსებმა განცხადებები აუცილებლად უნდა დაწერონ.
"რა თქმა უნდა, უნდა დაეწერათ, რადგან იმ ჩამონათვალში, რასაც ითვალისწინებს საჯარო სამსახურში დასაქმების სავალდებულო დოკუმენტები, აუცილებლად უნდა იდოს პირის განცხადებაც, რასაკვირველია.
განცხადების არარსებობის პირობებშიც კი არ შეიძლება დაიწეროს ბრძანება და პირი დაინიშნოს თანამდებობაზე, ეს არის დარღვევა. განცხადება ნასამართლეობისა და ნარკოლოგიურის ცნობები, ეს ყველაფერი კანონის წესის დაცვით უნდა მოხდეს. ეს ის ჩამონათვალია, რომელიც არის საფუძველი სამსახურის დაწყებაზე. ამ დოკუმენტების საფუძველზე მიიღება პირი სამსახურში და გამოიცემა ბრძანება, დოკუმენტების წარუდგენლობა უნდა გახდეს საჯარო მოხელის განთავისუფლების საფუძველი. აი ეს არის ე.წ. "თეთრი ლაქა" , რომლითაც მანიპულირებენ დღეს საჯარო სამსახურები", _ ამბობს ალაფიშვილი.
ფაქტზე კი, რომლის თანახმადაც, "გურია ნიუსს", ოზურგეთის მუნიციპალიტეტის გამგეობამ და მერიამ არ მიაწოდა შემდეგი ინფორმაცია – აქ დასაქმებული პირების პირადი განცხადებების ქსეროასლები სამსახურის დაწყების თაობაზე, სვ –ები და დიპლომის დედანთან დამოწმებული ასლები, რადგან ჩამოთვლილი საბუთები პერსონალურ ინფორმაციას შეიცავდა, იურისტი ამბობს, რომ კონკრეტულად, მაინდიტიფიცირებელი პირადი ნომერი შეიძლება რომელიმე დოკუმენტში იყოს, მაგრამ შესაძლებელია ნომრის დაფარვა და მოთხოვნილი დოკუმენტების ამ სახით მოწოდება.
"ის, რომ უპირობოდ იყოს შეზღუდული ინფორმაციის მიწოდება, იგივე განათლების დამადასტურებელი დოკუმენტი, განცხადებები დასაქმების თაობაზე, ასევე ნასამართლეობისა და ნარკოლოგიურის ცნობები, ეს კანონდარღვევაა, აღნიშნული ინფორმაციები არის საჯარო და თქვენთვის არმოწოდება არის უკანონობა. ასე, რომ უარი რომ გეთქვათ, უპირობოდ, განცხადებების მოწოდებაზე, ეს არის დარღვევა ზოგადი ადმინისტრაციული კოდექსით", _ აღნიშნავს ალაფიშვილი.
შესაძლოა თუ არა, აღნიშნული დოკუმენტების არმოწოდების მიზეზი ყოფილიყო ჩვენი წყაროს ინფორმაცია, რომ უკვე დასაქმებულ და დანიშნულ საჯარო მოხელეებს არ აქვთ ყველა საბუთი მიტანილი, იურისტი ამბობს, რომ შესაძლებელია ეს იყოს ერთ-ერთი მიზეზი, თუმცა კანონში არსებული ჩანაწერის მიხედვით, ეს შესაძლოა პირის განთავისუფლების საფუძველი გახდეს.
"დოკუმენტების წარუდგენლობა, შეიძლება, გახდეს პირის განთავისუფლების საფუძველი. ამით ადრეც, ყოველთვის, შემდგომაც და როგორც ჩანს, ახლაც მანიპულირებენ ადმინისტრაციული ორგანოები. რაც სავალდებულო წარსადგენი დოკუმენტებია საჯარო სამსახურში პირის დასანიშნად, რომელიმე დოკუმენტის წარუდგენლობის შემთხვევაში, ეს არის უპირობო საფუძველი და ვალდებულება, რომ არ მიიღონ პირი სამსახურში. თუ ყველა სავალდებულო დოკუმენტი პირს არ ექნება სამსახურის დაწყებამდე წარდგენილი, ის არის პირის განთავისუფლების საფუძველი", _ უთხრა "გურია ნიუსს" ალაფიშვილმა.
