ლანჩხუთის მუნიციპალიტეტის გამგებელს ზაზა ურუშაძეს სოფლებში ჯერ საკუთარი წარმომადგენელი არ დაუნიშნავს. მისი თქმით, ამ ეტაპზე მიმდინარეობს წარმომადგენლების კანდიდატურების განხილვა და ორშაბათს უკვე დაიწყება დანიშვნა.
_ ბატონო ზაზა, დაიწყო თუ არა გამგებლის წარმომადგენლების დანიშვნა სოფლებში და თუ არა, რა უშლის ხელს ამ პროცესს?
_ ჯერ მხოლოდ ქალაქ ლანჩხუთის წარმომადგენელი დავნიშნეთ. ამ ეტაპზე მიმდინარეობს CV-ების მიხედვით კადრების შერჩევა. ორშაბათს დავიწყებთ უკვე დანიშვნას და კვირის ბოლომდე ეს პროცესი დასრულდება.
_ საუბარი იყო, რომ საშტატო ერთეულების დამტკიცების შემდეგ მოხდებოდა კადრების დანიშვნა, მაგრამ ეს პროცესი გაჭიანურდა…
_ არ არის ეს პროცესი გაჭიანურებული. საკრებულოზე იყო საშტატო განრიგები დასამტკიცებელი, მანამდე ბიუროს სხდომაზე მოხდა განხილვა, 22 აგვისტოს უნდა გამოქვეყნებულიყო საშტატო განრიგი. რადგან ეს პროცესები დასრულდა, ახლა დავიწყებთ დანიშვნას.
_ თქვენთან ერთად ვინ მიიღებს მონაწილეობას კანდიდატების შერჩევის დროს?
_ გამგებლის წარმომადგენლის დანიშვნა გამგებლის პრეროგატივაა. ალბათ, იურიდიული სამსახურის წარმომადგენლებთან გავივლი რამდენიმე საკითხს. უპირატესობას მივანიჭებ ისეთ ადამიანებს, რომლებსაც სწავლა-განათლება აქვთ მიღებული და სამუშაო გამოცდილება გააჩნიათ. უმეტეს სოფელში დარჩებიან ძველი რწმუნებულები. არ მინდა, ახლა მოვლენებს გავუსწრო და თავის დროზე ყველასთვის ყველაფერი იქნება ცნობილი.
_ ჩვენთვის ცნობილი გახდა, რომ სოფელ ნინოშვილის მოსახლეობის ერთი ნაწილი ითხოვს გიორგი თავართქილაძის დანიშვნას. რას აპირებთ?
_ მოსახლეობა კი არა, ხანდახან ჩვენც ვიბნევით. უნდა იცოდეს მოსახლეობამ, ეს არის პირდაპირ გამგებლის წარმომადგენელი. მოსახლეობის ნაწილი იყო ჩამოსული. ითხოვენ ამ ადამიანის დანიშვნას, მაგრამ ამავე სოფელში მოსახლეობის მეორე ნაწილსაც ჰყავს თავისი კანდიდატი. ნინოშვილთან დაკავშირებით მალე მივიღებთ გადაწყვეტილებას და დავნიშნავთ ღირსეულს.
_ როგორ მოახერხებენ თქვენ მიერ დანიშნული წარმომადგენლები მოსახლეობასთან საქმიან ურთიერთობას და რა ევალებათ გამგებლის წარმომადგენლებს?
_ ეს არის რგოლი მოსახლეობასა და გამგებელს შორის. მათი ფუნქცია-მოვალეობა გაწერილი იქნება დებულებით. ყველა საკითხი, რომელიც მოსახლეობასთან არის დაკავშირებული, სწრაფად უნდა მოვიდეს ჩემთან და რეაგირებაც სწრაფი იქნება. ვიცი, რომ ძნელია ერთი კაცისთვის, მაგრამ ეს რგოლი აუცილებლად გაამართლებს. ლანჩხუთის მუნიციპალიტეტში არის თემები, რომლებიც ოთხ-ხუთ სოფელს აერთიანებს. ალბათ, იქ დროებით, ხელშეკრულებით ავიყვანთ ადამიანებს იმისთვის, რომ პრობლემა არ შეგვექმნას. ვფიქრობ, ვინც მოინდომებს, ის თავს გაართმევს.
_ საკრებულოს სხდომაზე ითქვა, რომ ერთი წარმომადგენელი სოფელში საქმეს თავს ვერ გაართმევს და დეპუტატების ერთ ნაწილი ითხოვს შტატის გაზრდას.
_ ეს ამბავი მახსენებს ერთ ანეკდოტს _ ჩემს მეზობელს ჰყავდა ღორი, რომელიც გოჭებს ელოდებოდა. მეზობელმა მეზობელს უთხრა: ბათოიე ლომაძის ღორი გოჭებს ელოდება და როცა გოჭები ეყოლება, შემდეგ ყანაში სიმინდს არ დაგვიტოვებსო. რა იცი, იქნებ, მოყაროს ის გოჭები და წინასწარ რას იკლავ თავსო, _ მიუგო გურულმა მეზობელს. ისეა ახლა ეს საქმე _ რა იციან, რომ ვერ გაართმევენ თავს?! არ არის ახლა სოფელში ისეთი დატვირთვა, საწარმოები არ არის და ვფიქრობ, დაკისრებულ მოვალეობას პირნათლად შეასრულებენ. ჩვენ ერთიანად, გუნდურად ვაპირებთ მუშაობას და არ იქნება არანაირი პრობლემა.
