“გვინდა გავიგოთ, რა ბედი გველის“

ქალაქ ოზურგეთში, ყოფილი საავადმყოფოს შენობაში თვითნებურად შესახლებული მოსახლეობა ადგილობრივ ხელისუფლებას წინასაარჩევნო დაპირებას ახსენებს და დახმარებას ითხოვს.

ნანული სასანია: _ 45 წელია, ოზურგეთში ვცხოვრობ, წარმოშობით ფოთიდან ვარ. 12 წლის განმავლობაში ვცხოვრობდი სხვადასხვა ადგილზე. ექვსი წლის წინ დამეღუპა 32 წლის შვილი. სად არ მიცხოვრია და ბოლოს გავიგე, რომ ყოფილი საავადმყოფოს შენობაში შევიდნენ უსახლკაროები. ძალიან მძიმე პირობები გვაქვს _ შუქი არ არის, გვაქვს წყლის პრობლემაც. ეზოში ჭა არის და  მესამე სართულზე ხელით ამოგვაქვს წყალი, _ გვითხრა ნანული სასანიამ.

სოფიკო პაპუნაშვილი: _ ძალიან მძიმე მდგომარეობაა. კანალიზაცია არ არის. არჩევნების დროს მოვიდნენ და გვითხრეს, რომ ის პრობლემები, რომელიც არის ყოფილი საავადმყოფოს შენობაში, მოაგვარებდნენ. იმედია, რომ ეს დაპირება დაპირებად არ დარჩება.

მაყვალა ბურკანაძე: _ ადგილობრივი ხელისუფლებისგან გვინდა გავიგოთ, რა ბედი გველის. იქნებ, არ გვაჩერებენ ამ შენობაში და ხვალ ისევ ბინის გარეშე დავრჩეთ? ძალიან გვიჭირს და აქ იმიტომ შემოვედი. ყველასგან ვითხოვთ დახმარებას.

ამ საკითხთან დაკავშირებით "გურია ნიუსთან“ კომენტარი გააკეთა ქალაქ ოზურგეთის მერმა ბეგლარ სიორიძემ: _ ჩვენ, წინასაარჩევნო პერიოდში, რამდენჯერმე გახლდით ყოფილი საავადმყოფოს შენობაში. ვიცი, იქ რა სიტუაციაცაა. ამ ეტაპზე ეს შენობა არის ეკონომიკის სამინისტროს ბალანსზე და როგორც კი გადმოეცემა ქალაქ ოზურგეთს, აუცილებლად, სწრაფ ტემპში იქ გატარდება მთელი რიგი ღონისძიებები. სანამ ეს მოხდება, ვფიქრობ, როგორ მოვაგვარო შუქის პრობლემა. ძალიან გაუსაძლის მდგომარეობაში ცხოვრობენ. ასევე, მინდა გითხრათ, რომ ჩემი ინფორმაციით, იქ ცხოვრობს რამდენიმე ადამიანი, რომლებსაც სოფლებში აქვთ სახლი. პირველ რიგში, მოხდება საკითხის შესწავლა, თუ ვინ არის იქ შესახლებული. უნდა შეიქმნას ახალი ბაზა. სანამ ეს ბაზა შეიქმნება, მანამდე აუცილებლად უნდა დავეხმაროთ ამ ხალხს, _ გვითხრა ბეგლარ სიორიძემ.