კონკურსში, რომელმაც ქალაქ ოზურგეთის #2 საჯარო სკოლის დირექტორი უნდა გამოავლინოს, სამი მოქალაქე იღებს მონაწილეობას _ #5 საჯარო სკოლის დირექტორი მერი საბაშვილი, #1 სკოლის ყოფილი დირექტორი, ახლა მანდატურის სამსახურის თანამშრომელი მარინა ვაშალომიძე და ოზურგეთის მუნიციპალიტეტის გამგეობის განათლების, ახალგაზრდულ საქმეთა და სოციალური დაცვის სამსახურის უფროსი მაიზერ ცელაძე.
#2 საჯარო სკოლაში დირექტორის მოადგილე ქალაქ ოზურგეთის მერის, ბეგი სიორიძის და _ ფატი სიორიძეა. "გურია ნიუსის" წყაროს ინფორმაციით, მაიზერ ცელაძესა და ქალაქ ოზურგეთის მერს შორის ერთგვარი გარიგება მოხდა _ მაიზერ ცელაძე უნდა გახდეს #2 საჯარო სკოლის დირექტორი, მერე კი, რამდენიმე დღეში უარს იტყვის თანამდებობაზე და დირექტორი ავტომატურად გახდება ფატი სიორიძე, ხოლო ცელაძე გამგეობაში თავის სამსახურს დაუბრუნდება.
ქალაქ ოზურგეთის მერი ბეგლარ სიორიძე ამბობს, რომ არანაირი საერთო არ აქვს განათლების სისტემასთან და გამორიცხავს მის ჩართულობას აღნიშნულ საკითხში.
ოზურგეთის მუნიციპალიტეტის გამგეობის განათლების, ახალგაზრდულ საქმეთა და სოციალური დაცვის სამსახურის უფროსი, მაიზერ ცელაძე "გურია ნიუსთან" საუბრისას ადასტურებს ინფორმაციას, რომ მას არ უნდა სკოლის დირექტორობა, უბრალოდ, მონაწილეობას იღებს კონკურსში, სამსახურში კი თავის უფლება-მოვალეობას ასრულებს.
მაიზერ ცელაძე წლების განმავლობაში ოზურგეთის რესურსცენტრის თანამშრომელი იყო. გიორგი ჩხაიძის გუბერნატორად დანიშვნის შემდეგ, გუბერნიაში ადმინისტრაციული სამსახურის უფროსის მოადგილე გახდა, ერთი თვეა განათლების, ახალგაზრდულ საქმეთა და სოციალური დაცვის სამსახურის უფროსად დაინიშნა. ახლა კი სკოლის დირექტორთა კონკურსში მონაწილეობას.
მაიზერ ცელაძე: _ არ ვადასტურებ ინფორმაციას ბატონ ბეგისთან და ქალბატონ ფატისთან შეთანხმების შესახებ. არ მქონია მაგ თემაზე არანაირი საუბარი.
_ ბატონო მაიზერ, თუ თქვენ გსურდათ, გამხდარიყავით სკოლის დირექტორი, მაშინ რატომ დაეთანხმეთ ოზურგეთის მუნიციპალიტეტის გამგებელს, გამხდარიყავით ერთ-ერთი სამსახურის უფროსი?
_ მე ვამბობ, მინდა სკოლის დირექტორობა-მეთქი? ვინ გითხრათ, რომ სკოლის დირექტორობა მინდა? ეს არის სკოლის დირექტორობის მოპოვების უფლება, რომ წარვდგე სამეურვეო საბჭოს წინაშე. შეიძლება სამინისტრომ უარი მითხრას კიდეც. მე, ჯერჯერობით, სამსახურში ვარ და ვმუშაობ ჩვეულებრივად.
_ ანუ, ჩვენი ინფორმაცია სიმართლეს შეესაბამება _ თქვენ არ აპირებთ სკოლის დირექტორობას და არ დატოვებთ სამსახურს?
_ ამ საკითხზე არ ვსაუბრობ. მე მივყვები დინებას ჩვეულებრივად და, უბრალოდ, ვმონაწილეობ კონკურსში.
ფატი სიორიძე ჩვენთან საუბარში ვინმესთან გარიგებასა და მოლაპარაკებას კატეგორიულად გამორიცხავს, იმის გამო, რომ ის არავის ენდობა.
ფატი სიორიძე: _ არ არის სიმართლე ეგ ინფორმაცია. აგერაა სამივე მათგანი. მათ აქვთ პროცედურები გასავლელი, აქვთ სერტიფიკატები. აჰა, ბურთი და მოედანი, რაზეა საუბარი?! რომელ გარიგებაზე ან ვისთან შეიძლება აწარმოო მოლაპარაკება, ვის ენდობი? ან მე ისეთი დონის ადამიანი ვარ, ვინმეს მაგაში გავურიგდე? გავიდეს ადამიანი გასაუბრებაზე, აირჩიოს საბჭომ. ვინმეს მერე რამეს გავუპირდე? რას ამბობთ _ მაგის გაფიქრებაც კი ზედმეტია.
ჩვენ დავინტერესდით, აუცილებელია თუ არა დირექტორობის სერტიფიკატის შესანარჩუნებლად კონკურსში მონაწილეობა და ამის გასარკვევად განათლებისა და მეცნიერების სამინისტროს დავუკავშირდით. როგორც სამინისტროში გვითხრეს, სერტიფიკატი ვალიდურია 7 წლის განმავალობაში:
_ სერტიფიკატის ვადა არ არის დამოკიდებული იმაზე, ადამიანი მუშაობს თუ არა სკოლაში. სერტიფიკატის ვადა 7 წელია და მის მფლობელს ამ პერიოდის განმავლობაში შეუძლია, დაბრუნდეს სისტემაში და მიიღოს მონაწილეობა კონკურსში, _ გვითხრეს განათლების სამინისტროში.
