მედიაკავშირ "ობიექტივი"-სა და გაზეთ "საქართველოს რესპუბლიკა"- ს კორესპონდენტი, ნინო მიქიაშვილი, რომელიც საყდრისის ერთ-ერთი მცველია, საყდრისის გადარჩენის კომიტეტს დაუპირისპირდა და დეზინფორმაციის გავრცელებაში დაადანაშაულა.
დღეს ჟურნალისტებთან განაცხადა, რომ საყდრისის გადარჩენის საზოგადოებრივი კომიტეტის წევრებმა საზოგადოება შეცდომაში შეუყვანეს. მიქიაშვილის თქმით, კომიტეტის წევრების განცხადება, მასთან არ ყოფილა შეთანხმებული. ასევე მისი თქმით საყდრისის მცველებს შეუერთდა პოლიტიკური პარტია "საქართველოს პატრიოტთა ალიანსის" წევრები.
"გურია ნიუსი" უცვლელად გთავაზობთ ნინო მიქიაშვილისა და ირაკლი ლომიძის განცხადებას:
"საინფორმაციო საშუალებები და საზოგადოება შეცდომაში შეიყვანეს, როცა 9 სექტემბერს გამართულ პრესკონფერენციაზე საყდრისის გადარჩენის საზოგადოებრივი კომიტეტის წევრებმა გამოაცხადეს, რომ საყდრისის გვერდითა ბორცვზე მიმდინარე კარვების აქცია იშლება. ეს დეზინფორმაციაა!!! საყდრისის დასაცავად კარვების აქცია არ იშლება. გრძელდება! ირაკლი ლომიძე და მე, ნინო მიქიაშვილი იქ ვრჩებით და საყდრისის დაცვას ვაგრძელებთ ისე, როგორც ამას აქამდე ვაკეთებდით.
უკლებლივ ყველა საინფორმაციო საშუალებას გთხოვთ, უზრუნველყოთ საზოგადოებისთვის სწორი ინფორმაციის მიწოდება. საყდრისის დასაცავად 14 აპრილს დაწყებული კარვების აქცია გრძელდება და მისი შეწყვეტა მონაწილეებს, ირაკლი ლომიძეს და მე ნინო მიქიაშვილს არ გვიფიქრია. საინფორმაციო საშუალებები საყდრისის გადარჩენის საზოგადოებრივი კომიტეტის წევრებმა არაერთხელ განაცხადეს, რომ კომიტეტს ფინანსები და სხვა რესურსები ამოეწურა და ამიტომ კარვების აქციას წყვეტენ. ესეც დეზინფორმაციაა.
გუშინ, 14 სექტემბერს კარვების აქციის დაწყებიდან 5 თვე შესრულდა. შემოწირულობის მორიგი ჩამონათვალი ჩემს პირად გვერდზეა გამოქვეყნებული. ეს შემოწირულობა ჩვენმა მეგობრებმა, ახლობლებმა, სრულიად უცნობმა ადამიანებმა გაიღეს საყდრისში მიმდინარე კარვების აქციისთვის. ჩვენ, მე და ირაკლი ლომიძე სწორედ ამ შემოწირულობით ვარსებობთ. ამ თანხას საერთო არაფერი აქვს საყდრისის გადარჩენის საზოგადოებრივი კომიტეტის ფინანსებთან და არც სხვა რომელიმე ორგანიზაციასთან.
რაც შეეხება კომიტეტის ფინანსებს მათ ცალკე ანგარიში აქვთ. რომელზეც ჩარიცხული და დარიცხული თანხის ირგვლივ მე და ირაკლი ლომიძემ ვიცით მხოლოდ შემდეგი: ზაფხულის დასაწყისში კარვების აქციისთვის მხოლოდ 2-ჯერ გამოგზავნეს რამდენიმე დღის საკვები. ერთხელ გადაიხადეს დენის ფული, დაახლოებით 30 ლარამდე, გამოგვიგზავნეს მაცივარი, რომელშიც 100 ლარი გადაიხადეს, მაგრამ ეს მაცივარი ვერ ავამუშავეთ, რადგან დენის მავთული რომელიც კომიტეტის მიერ არის შეძენილი იმდენად სუსტია, რომ მაცივარს ვერ ვრთავთ. ასევე კომიტეტმა ირაკლი ლომიძეს ტელეფონზე ჩაურიცხა 30 ლარი, ხოლო გაიოზ მეხვრიშვილს 10 ლარი.
შეგახსენებთ, რომ კარვების აქცია 14 აპრილს დაიწყო და მასშტაბური პროტესტი 5 მაისამდე გრძელდებოდა. 5 მაისიდან მოყოლებული საყდრისს ვიცავთ მე და ირაკლი ლომიძე. საყდრისში ხშირად არის გაიოზ მეხვრიშვილი. 21 აგვისტოდან ჩვენ აქციას შემოუერთდნენ და საყდრისს ჩვენთან ერთად ფიზიკურად იცავენ „პატრიოტთა ალიანსი“-ს ბოლნისის ორგანიზაციის ახალგაზრდული ფრთის წარმომადგენელები. თბილისში მყოფები, იქნებიან ისინი საყდრისის გადარჩენის საზოგადოებრივი კომიტეტის წევრები, თუ სხვა რომელიმე ორგანიზაციის ან გაერთიანების წარმომადგენლები, ვერ შეწყვეტენ კარვებში მიმდინარე აქციას ელემენტარული მიზეზის გამო. ისინი ამ აქციაში ფიზიკურად არ მონაწილეობენ.“
„გურია ნიუსის“ კითხვაზე, თქვენსა და საყდრისის გადარჩენის საზოგადოებრივი კომიტეტის წევრებს შორის განხეთქილება ხომ არ არის, თანხებზე გქონდათ საუბარი.
_ თანხების ირგვლივ მე არ მისაუბრია. მე განვმარტე რატომ ჩამოვაყალიბე. მათ თქვეს, რომ ფინანსები ამოგვეწურა და ამიტომ ვწყვეტთ. მათ ფინანსებს ჩვენთან საერთო არ აქვს.
_ რამდენიმე დღის საყდრისის გადარჩენის საზოგადოებრივმა კომიტეტმა იუნესკოდან მიიღო წერილის პასუხი. ისინი ამბობენ, რომ წერილში საყდრისი მოხსენიებულია, როგორც მსოფლიო მნიშვნელობის ძეგლი. თუმცა, წერილში ასეთი რამის არსებობას უარყოს კულტურული მემკვიდრეობის დაცვის ეროვნული სააგენტო. თქვენ რა შეფასებას მისცემთ წერილს?
_ მე წავიკითხე ის თარგმანი, რომელიც გამოქვეყნდა და გავრცელდა საინფორმაციო საშუალებებით. დედანს ვერ წავიკითხავდი, რადგან ინგლისური არ ვიცი. რაც წავიკითხე ეს არის ძალიან სასიამოვნო წერილი მიღებული "იუნესკოს" დირექტორის ხელმოწერით.
_ საყდრისის გადარჩენის საზოგადოებრივი კომიტეტის წევრებმა თქვენთან შეუთანხმებლად რატომ გაავრცელეს განცხადება. რატომ არ შეთანხმდით ორივე მხარე?
_ ჩვენ არანაირი მხარე არ ვართ! იცით რა, ჰკითხეთ თვითონ მათ! ჩვენ ვიყავით იქ! არ ვიცი ჩვენთან შეუთანხმებლად რატომ გააკეთეს.
