“გურია ნიუსისთვის” ცნობილი გახდა, რომ ძველი აგრარული ბაზრის ტერიტორიაზე მოვაჭრეებს სამი დღე მიეცათ იმისთვის, რომ სხვა ადგილი ნახონ, სადაც გაყიდიან პროდუქტს.
როგორც ოზურგეთის მუნიციპალიტეტის გამგეობაში გვითხრეს, ძველი აგრარული ბაზარი აღარ არსებობს და ის სავაჭრო ცენტრია. ამის გამო, მოსალოდნელია ყველა თვითნებურად განლაგებული დახლის აღება. მოვაჭრეები ხელისუფლების გადაწყვეტილებას კვლავ აპროტესტებენ: _ ორშაბათს აღარ უნდა ვიყოთ ძველ ბაზარში, თორემ გვაჯარიმებენ. ხუთასი ლარით აპირებენ თითოეულის დაჯარიმებას. რისთვის გვაჯარიმებენ, რის საფუძველზე? 500 ლარის მთლიანად “ტავარი” არ მაქვს. ტუბდისპანსერის ნაგავი რომ დაგვიყარეს ბაზარში, მაშინ რატომ არავინ არაფერი თქვა? სად გვიშვებენ, ისიც არ ვიცით. აიჩემეს ეს ახალი აგრარული ბაზარი და ამის გამო ყველაფერს აკეთებენ. ხალხის ბედი არავის ანაღვლებს, _ ამბობენ მოვაჭრეები.
ოზურგეთის მუნიციპალიტეტის გამგეობის ზედამხედველობის სამსახურის უფროსის შუქრი გაბრიჩიძის თქმით, ხელისუფლება კარგა ხანია აფრთხილებს მოვაჭრეებს, რომ თვითნებურად დადგმულ დახლებზე არ შეიძლება პროდუქტის გაყიდვა:
_ ეს უკვე აღარ არის საკოლმეურნეო ბაზარი. საკრებულოს გადაწყვეტილებით სავაჭრო ცენტრი გახდა. ამ ტერიტორიაზე მხოლოდ მაღაზიები დარჩება და იქ, ვისაც სურვილი აქვს, გაყიდის სხვადასხვა სახის პროდუქციას. ჩვენ უკვე დავურიგეთ ოქმები მოვაჭრეებს _ თუ ისინი არ დაემორჩილებიან კანონს, ყველა დაჯარიმდება.
უკვე დაჯარიმდა ერთ-ერთი მოვაჭრე, რომელიც ერთ თვეზე მეტია, ძველი აგრარული ბაზრის მიმდებარე ტერიტორიაზე საზამთროთი და ნესვით ვაჭრობდა. ქალბატონ მანანა ფ.-იას თქმით, მასთან ოზურგეთის ზედამხედველობის სამსახურის მთავარი სპეციალისტი, კახა კვაჭანტირაძე მივიდა და უთხრა, რომ საზამთრო, რომელსაც ყიდდა, თვითნებურად ნაკეთებ დახლზე ელაგა.
_ გამომიწერეს 500-ლარიანი ჯარიმის ბარათი, რომელზეც ხელი არ მომიწერია. მითხრეს, ნუ ვაჭრობთ გარეთო, ანუ ძველი აგრარული ბაზრის ტერიტორიის წინ. არანაირი სხვა შემოსავალი არ მაქვს, ავადმყოფი ქმარი მყავს, ოჯახში, ჩემ გარდა არავინ მუშაობს, არც პენსიონერი მყავს, ძლივს ვარჩენ ოჯახს. 6 ოქტომბერს ჩემს მაგიდასთან დამხვდა დაჯარიმების ბარათი. მაინტერესებს, საიდან, რა ხერხით ამოიღო ჩემი პირადობის მოწმობის ნომერი, რომელიც მისთვის არ მითქვამს? წინასწარ გაფრთხილების ფურცელი ჩემთვის მას არ მოუცია. რომც მოეცა, არაფერი არ დამირღვევია, _ გვითხრა ქალბატონმა მანანამ.
ზედამხედველობის სამსახურის მთავარი სპეციალისტი ამ საკითხთან დაკავშირებით ამბობს, რომ ხსენებულ ქალბატონზე დაჯარიმების ოქმი ამოწერეს, რადგან ის და მისი მეუღლე თვითნებურად ყიდდნენ საზამთროს. თუმცა, როდის და სად, ამის შესახებ კვაჭანტირაძე კომენტარს არ აკეთებს:
_ მე არ ვარ უფლებამოსილი პირი, რომ კომენტარი გავაკეთო, ამიტომ მიმართეთ პრესსამსახურს, _ გვითხრა ერთ დროს ოპოზიციაში მყოფმა კვაჭანტირაძემ, რომელიც ახლა საჯარო მოხელეა.
