უმუშევრობა, მძიმე სოციალური ფონი, მოუწესრიგებელი წყლის სისტემა, გადაუხურავი საცხოვრებელი სახლები… _ "გურია ნიუსთან" ამ პრობლემებზე ქალაქ ოზურგეთში, შევარდნაძის ქუჩაზე მდებარე საერთო საცხოვრებლის მობინადრეები საუბრობენ.ამ ბინებში მცხოვრებთა უმეტესობა სოციალურად დაუცველის სტატუსს ატარებს. აქ ცხოვრობენ მარტოხელები, მრავალშვილიანი ოჯახები და შეზღუდული შესაძლებლობების მქონე ადამიანებიც. ამ სოციალურად მძიმე ფონს, მძიმე ყოფაც ემატება _ საცხოვრებელი ბინები ავარიულ მდგომარეობაშია, მოუწესრიგებელია წყლისა და კანალიზაციის სისტემა.
რამდენიმე წლის წინ, ბინების ნაწილს სახურავი გამოუცვალეს, თუმცა, ბინების სიმყარე არავის შეუმოწებია. არადა, კედლებს კარგა ხანია ბზარები გაუჩდა და, როგორც აქაურები ამბობენ, საცხოვრებლად უსაფრთხო არ არის.
_ ძალიან გაჭირვებულები ვართ, არც წყალი გვაქვს და არც კანალიზაცია. გზა ნახეთ, რა დღეშია _ ბავშვები კისრამდე ტალახში დადიან. გაწვიმდება და შეგეშინდება ღამის გათევის, ახლა წაიქცევა ბინა და შიგ მოვყვებითო. ქარი და წვიმა რომ იქნება, მაშინ მოდით. ხელისუფლების წარმომადგენლები თავიანთ ცოლებს აცხოვრებენ ასეთ მდგომარეობაში, მათი შვილები გაუძლებენ ასეთ პირობებს? _ გვიყვებიან ბინის მცხოვრებლები.
_ რამდენიმე წლის წინ, როგორც იქნა, მოვიდნენ გამგეობის თანამშრომლები და გვითხრეს, მხოლოდ ერთ ბინას გადაგიხურავთო. ერთი ბინა რატომ უნდა გადაეხურათ, სხვამ რა დააშავა?! სხვებს არ უნდა ნორმალურად ცხოვრება? ასე უყურადღებოდ ეს კუთხე და უბანი რომაა, არსად იქნება. არანაირი პირობები არ გვაქვს. არ გვაქვს კანალიზაცია. წარმოგიდგენიათ, რა მდგომარეობაში ვიქნებით?!" ათასჯერ მოვიდნენ, ათასჯერ გადაგვიღეს ფოტოები, მაგრამ ყურადღებას არავინ გვაქცევს. ჩვენთან მაშინ მოდიან, როცა არჩევნებია. დამთავრდება არჩევნები და არავის ვახსოვართ, არავის ვჭირდებით! პრემიებს ხომ იღებენ, კონცერტებს ხომ აწყობენ? _ საუბარში ერთვებიან სხვებიც და ცდილობენ, ყველა პრობლემა გაგვიზიარონ.
ეთერ ჯიბლაძე: "პრობლემის მეტი რაა, კანალიზაცია არაა, როგორც კი გაწვიმდება დაკეტილ ფანჯრებში შემოდის წყალი. აქ იცხოვრება? სიძველისგან კედლები სულ დაბზარულია. ჩვენ რომ შიგნიდან გავაკეთოთ, რა აზრი აქვს, წყალი სულ ჩამოდის".
ლალი გაგუა: "ნახეთ, რა მდგომარეობაში ვცხოვრობ, სახლში ასასვლელი კიბე სულ დამპალია. სოციალური დახმარებაც არ მაქვს".
ლარისა ცოკოლენკო: კანალიზაცია არაა, მოგვეხმარეთ რამე, ძალიან ცუდ მდგომარეობაში ვართ, საშინელი სიტუაციაა მაგ მხრივ.
ნარგიზ ჩუბინიძე: "არ იცხოვრება შიგნით, ისეთი ამბავი მაქვს. მარტო ვცხოვრობ. სულ ვირთხებით არის სახლი სავსე. ძალიან მძიმე მდგომარეობა მაქვს, ცუდ პირობებში ვარ. იქნებ მომაქციონ ყურადღება… წყალი რომ სახლში შემოვა, იქ იცხოვრება?"
"გურია ნიუსი" შეეცადა ამ პრობლემასთან დაკავშირებით ოზურგეთის მერიის პოზიცია გაეგო. სამშაბათს, დილით, მერიის საზოგადოებასთან ურთიერთობის განყოფილების ხელმძღვანელ იზა დარჩიას კომენტარის მოწოდება ვთხოვეთ.
კითხვაზე _ გაეწეოდა თუ არა დახმარება აღნიშნული ბინების მცხოვრებლებს და რა სახით, _ პასუხი რამდენიმე საათის განმავლობაში ვერ მივიღეთ. მოგვიანებით, დარჩიამ მერის მრჩეველთან, სოფო ჭანტურიასთან გადაგვამისამართა. თავის მხრივ, ჭანტურიამ კითხვაზე პასუხის გაცემის პირობა მოგვცა.
_"საქმეს ვაკეთებ, მოვრჩები და გიპასუხებთ", _ გვითხრა ჭანტურიამ, თუმცა, საქმე იმდენ ხანს გაუგრძელდა, რომ ხელმეორედ დაკავშირება მოგვიხდა:
_ კლუბ"მერცხალში" ვართ. სპორტსმენებს ვხვდებით და აქედან რომ მოვბრუნდებით, პასუხს მაშინ გაგცემთ ოფიციალურად, _ გვიპასუხა მერის მრჩეველმა, რომლის სამუშაო სფერო საზოგადოებასთან და მედიასთან ურთიერთობაა.
"გურია ნიუსი" პასუხს რამდენიმე საათი უშედეგოდ ელოდებოდა. თუკი მერის მრჩეველი ან სხვა პასუხისმგებელი პირი, შევარდნაძის ქუჩის მცხოვრებლებისთვის ამ უმნიშვნელოვანეს საკითხზე განმარტებას გააკეთებს, "გურია ნიუსი" მათ მოსაზრებას მკითხველს აუცილებლად გააცნობს.
