ეროსი კიწმარიშვილის გარდაცვალების საქმეში ახალი დეტალები იკვეთება. დღეს ჩატარებულმა ბალისტიკურმა ექსპერტიზამ ოჯახის ეჭვი, კიდევ უფრო გაამყარა. როგორც გარდაცვლილის ძმა ზურაბ კიწმარიშვილი „გურია ნიუსთან“ საუბრისას აცხადებს, ეროსი კიწმარიშვილის მიმართ იყო ფიზიკური კონტაქტი, ძალადობა და შემდეგ გასროლა.
ზურაბ კიწმარიშვილი: როდესაც ვადევნებდი თვალს ამ პროცესს, ყოველთვის ვამბობდი, რომ ეს იყო პირადი ანგარიშსწორებით ჩადენილი დანაშაული, ან შეკვეთილი მკვლელობა. ორივე შემთხვევაში თავიდანვე ვივარაუდე და დავუშვი, რომ მანქანაში მოხდა დანაშაული, რომელიც აუცილებლად მოხდებოდა გარეშე პირის მიერ. დღევანდელი ექსპერტიზა ამ ჩემს შინაგან რწმენას რამდენად აძლიერებს, ეს სხვა საკითხია. მინდა გითხრათ, რომ დღეს ჩატარებული ბალისტიკური ექსპერტიზის შედეგად მოხდა ტრაექტორიის და მდებარეობის განსაზღვრა. შერჩეულ იქნა გარდაცვლილის სიმაღლის პიროვნება, რომელსაც გაუკეთდა ნიშნები თავის არეში, დასვეს იმ ადგილზე, სადაც გარდაცვლილი იყო, იმავე პოზიციაში, რაც თავდაპირველად ვნახეთ, ამის შემდგომ მოიძებნა ის პოზიცია რომელიც სავარაუდოდ იყო გარდაცვალების მომენტში. ამ ყველაფერმა საკმაოდ დიდი დრო წაიღო. ექსპერტიზის შედეგად გამოჩნდა, რომ გარდაცვლილი თავის სკამზე იყო მიკრული და თავი უკან ძალიან მიჭერილი ჰქონდა. აქედან გამომდინარე, ჩემს ვერსიას კიდევ ერთი შემადგენელი დეტალი გაუჩნდა. ვფიქრობ, რომ მანქანაში იყო პიროვნება, რომელმაც გარდაცვლილი ამ მდგომარეობაში დაიჭირა. ამისთვის ან ღვედი გამოიყენა, ან ხელით მოხდა ეს ყველაფერი. ეს უკვე ვარაუდის თემაა. თუმცა, ვფიქრობ, რომ გარდაცვლილი თავისით ამ პოზიციას არავითარ შემთხვევაში არ აირჩევდა – არც თვითმკვლელობის და არც მანქანის დაძვრის შემთხვევაში. ვფიქრობ, აქ იყო ფიზიკური კონტაქტი, ძალადობა და შემდეგ გასროლა.
_ იზიარებს თუ არა გამოძიება თქვენს ვერსიას?
_ საერთოდ არ მქონია ამ საკითხზე საუბარი. მოვახდინეთ დაკვირვება, გამომძიებელმაც ექსპერტისგან მიიღო ეს ინფორმაცია, რაც ჩაინიშნა.
_ არის თუ არა თქვენთვის ცნობილი გამოძიების შედეგები, რა ეტაპზეა ის, დაკითხულები არიან თუ არა მოწმეები და ა.შ.?
_ ორშაბათს ვაპირებთ გამომძიებელთან შეხვედრას. ახალი საკანონმდებლო აქტით დაზარალებულ მხარეს უფლება გვეძლევა, რომ გავეცნოთ გამოძიების პროცესში მასალებს. დღეს დავსვი ეს საკითხი. ჯერ ამ საქმეში დაზარალებულად არავინ არ არის ცნობილი. ორშაბათს მოვითხოვთ დაზარალებულად ცნობას და კანონის ფარგლებში იმ მდგომარეობის გაცნობას, რა ეტაპზეც გამოძიებაა. აქამდეც თანამშრომლობის რეჟიმშიც ვიყავით, თუმცა, კანონი კრძალავდა ჩემთვის მასალების გაცნობას, ახლა ეს საკითხი სხვაგვარადაა და ვფიქრობ, არანაირი პრობლემა არ გვექნება გამოძიების მასალებს გავეცნოთ. ეს შეეხება ექსპერტიზის პასუხებს, დაკითხვების ოქმებს, ვიდეომასალებს და ა.შ. ამის შემდეგ შეგვეძლება იმაზე საუბარი, შესაძლებელია თუ არა გამოძიების მუხლის შეცვლა. ვფიქრობ, ორშაბათის შეხვედრის შემდეგ წინ წავიწევთ.
_ რაც შეეხება DNM-ის პასუხს, თუ არის თქვენთვის ცნობილი?
_ ექსპერტიზა რამდენიმე თვის წინ ჩატარდა, თუმცა, პასუხები ჯერჯერობით ჩვენთვის ცნობილი არ არის. არც ამ და არც სხვა ექსპერტიზების შესახებ არაფერი ვიცით რა შედეგი დადგა. ფაქტიურად, ყველა ექსპერტიზა, რომელიც გეგმიურად იყო ჩანიშნული ჩატარებულია. სწორედ ამიტომ გვინდა, პროცესში ჩავერთოთ. ახლა ვსაუბრობთ ვერსიებზე, თუმცა არის ფაქტობრივი გარემოებებიც, რომლის შესახებაც ჯერჯერობით არაფერი ვიცით. ცალკეული შედეგი შესაძლოა არ იყოს საქმის გასაღები, მაგრამ თითოეული მათგანი ძალიან საინტერესოა. ამას აუცილებლად მოვითხოვთ.
_ ასევე, უნდა ჩატარებულიყო ეროსი კიწმარიშვილის თანაგუნდელების ტანსაცმლის ექსპერტიზაც, რომლებმაც პირველად აღმოაჩინეს გარდაცვლილი. ჩატარდა თუ არა ეს ექსპერტიზა?
_ დიახ, ჩატარდა ეს ექსპერტიზა, მათი ტანსაცმელი გარდაცვლილის ტანსაცმელთან ერთად სამხარაულის საექსპერტო ბიუროში იყო, ვნახე და ვიცი, რომ ის ექსპერტიზა, რომელიც საჭირო იყო, ჩატარდა. ზუსტად არ ვიცი, მაგრამ იყო ბოჭკოების, დენთის კვალის მომენტი და ა.შ. როგორც მოითხოვს ამ შემთხვევაში პროცედურები, ყველაფერი ჩატარებულია და პასუხებიც უკვე არის.
_ საუბარი იყო საზღვარგარეთ სინჯების გადაგზავნაზე, აპირებთ თუ არა უცხოელი ექსპერტების ჩართვას გამოძიების პროცესში?
_ ვთვლი, რომ ეს ძალიან დიდი შეურაცხყოფა იქნება გამოძიების და პროკურატურის. დავუშვა, რომ მათ ჯეროვნად ვერ შეასრულეს თავისი სამუშაო. დღევანდელ სიტუაციაში, ძალიან მარტივია ამ ექსპერტიზების ჩატარება. მეორე, ნდობის საკითხია. რომელიც არასდროს დამიყენებია კითხვის ნიშნის ქვეშ. ამიტომ ახლა, არ ვფიქრობ, რომ მივიდე, მოვითხოვო სისხლის, ან სხვა ორგანული ნივთიერებების სინჯები, გავაგზავნო საზღვარგარეთ და შევამოწმო რამდენად სწორად აქვთ ეს ჩვენს ექსპერტებს შემოწმებული. ჩვენი აღჭურვილობით, მეთოდებით და პროფესიონალიზმით პასუხების დადება ძალიან მარტივია.
_ ხომ არ გაჭიანურდა გამოძიება?
_ პირველ რიგში, ეს ჩემთვის არის ძალიან მძიმე, როდესაც ვაკუუმში ვარ, არაფერი ხდება, ძალიან მოქმედებს. ვეხმიანები გამოძიებას და ყოველთვის ვიღებ არგუმენტირებულ პასუხს, რაზე მუშაობს ჯგუფი. ჩემგან ძალიან არაადეკვატური საქციელი იქნებოდა, რომ მომეთხოვა, შედეგები ერთ კვირაში დაედოთ. არსებობს გარემოებები, რომელიც ვერაფრით დამთავრდება იმ დროში, რომელიც მე ახლა, ამ წუთას მინდა. ამას ვითვალისწინებ და ვფიქრობ, რომ არ არის ის კატასტროფა, რომ ერთი თვე დაჭირდეს ამ საქმეზე კვალიფიციური დასკვნის დადებას. ჩემთვის მტავარი ეს არის. ვერ დავუშვებ იმას, რომ ეს პროცესი სამი, ხუთი ან 7 წელი გაგრძელდეს, მაგრამ ვფიქრობ, რომ ახალ წლამდე მაინც მოხდეს საბოლოო შედეგის შეჯერება. შესაძლოა, ერთ კვირაში კიდევ ახალი მიმართულება გაჩნდეს, ან ერთ თვეში დადგეს ეს საკითხი, მაგრამ, ვფიქრობ, საბოლოოდ ყველაფერი ამოწურვადია და საბოლოო დასკვნა უკვე წელს უნდა დაიდოს გამოძიებისგან. მეორე საკითხია, რამდენად იქნება ეს შედეგი ჩვენი მხრიდან გაზიარებული. რამდენად იქნება ყველაფერი ნათელი და არგუმენტირებული. ამიტომ ველოდები პროცესის წარმატებით დამთავრებას. ის, რომ პროცესი უკვე 2 თვეა მიდის, ამას როგორმე გადავიტანთ.
