წინა კვირას ცნობილი გახდა რომ საქართველოს ეროვნული გუნდისა და მოსკოვის "სპარტაკის" ნახევარმცველი ჯანო ანანიძე რუსული "სახალხო გუნდის" ხელმძღვანელობამ კლუბის სათადარიგოთა შემადგენლობაში გადაიყვანა.
ამ გადაწყვეტილების მიზეზი თავად ფეხბურთელის მოქმედებაში უნდა ვეძიოთ. რუსეთის თასის ერთ-ერთ შეხვედრაში "სპარტაკი" სტუმრად, ქალაქ კომსომოლსკი ამურის "სმენას" უნდა დაპირისპირებოდა. ეს დასახლებული პუნქტი ჩვენი ყოფილი დიადი სამშობლოს უკიდურეს აღმოსავლეთში მდებარეობს.
საქართველოს ეროვნული გუნდის ახალგაზრდა ნახევარმცველმა თვითმფრინავით ათსაათიან მგზავრობაზე სასტიკი უარი განაცხადა. რუსული გუნდის ხელმძღვანელობამ ქართველი მოთამაშის "საპროტესტო დემარში" უყურადღებოდ არ დატოვა და ფეხბურთელი "სპარტაკის" ძირითად შემადგენლობას გაურკვეველი ვადით ჩამოაშორა.
ჯანო ანანიძე პოპულარულ ფეხბურთელთა კატეგორიას განეკუთვნება. მისი დისკვალიფიკაციის ამბავი შეუმჩნეველი არ დარჩენილა და რუსულმა სპორტულმა მას-მედიამ ამ თემას რამდენიმე საინტერესო ინფორმაცია მიუძღვნა.
ალბათ გახსოვთ წინა საუკუნის საბჭოთა გამოცემა "სოვეტსკი სპორტი". ეს პატივსაცემი ბეჭდვითი ორგანო ფუნქციონირებას დღესაც აგრძელებს. ამ გაზეთმა გუშინ ჯანო ანანიძის თემას ერთი საინტერესო პუბლიკაცია მიუძღვნა.
"სოვეტსკი სპორტის" საფეხბურთო მიმომხილველი ვალერი რეინგოლდი ანანიძის საკითხს გუშინ განსაკუთრებით შეეხო და ქართველს არც მეტი და არც ნაკლები, მოსკოვში მდებარე რომელიმე ქარხანაში უბრალო მუშად მუშაობის დაწყება ურჩია.
"ამხანაგ ანანიძეს დიდ პატივს ვცემ. ის ჩინებული მოთამაშეა, მაგრამ გასულ წელს ჩატარებული წარმატებული სეზონის შემდეგ პოპულარობა თავში აუვარდა. მოსკოვის "სპარტაკთან" გაფორმებულ ხელშეკრულებაზე არაერთი კარგი ფეხბურთელი ოცნებობს. ამხანაგმა ჯანომ საწადელს კი მიაღწია, მაგრამ შემდეგ ე.წ. "ვარსკვლავური ავადმყოფობა" შეეყარა.
ჯანო ანანიძეს კლუბთან ოფიციალური ხელშეკრულება აკავშირებს. ის ვალდებულია "სპარტაკის" ყველა ოფიციალურ შეხვედრაში მონაწილეობა მიიღოს. სამწუხაროდ ბატონმა ჯანომ რუსეთის შორეულ აღმოსავლეთში თვითმფრინავით გაფრენა იუარა.
"სპარტაკის" ხელმძღვანელობის გადაწყვეტილებას სავსებით ვეთანხმები. უფრო მეტიც. გაგიკვირდებათ და მსურს რომ ანანიძემ დროებით, მოსკოვის ერთ-ერთ ქარხანაში საქმიანობა შავი მუშის თანამდებობაზე დაიწყოს. ამით "ჭირვეული" ფეხბურთელი ალბათ გონს მოეგება და ამ ცხოვრებაზეც სერიოზულად ჩაფიქრდება. არ უნდოდა თვითმფრინავით მგზავრობა, კეთილი ინებოს და ცოტა ხნით მძიმე ფიზიკური შრომით დაკავდეს. იმედი მაქვს, "სპარტაკის" დირექტორატის წევრები ჩემს იდეას აიტაცებენ და ურჩ ფეხბურთელს ჭკუას ასწავლიან", – განაცხადა ბატონმა ვალერი რეინგოლდმა.
