გასულ დღეებში ჩოხატაურის მუნიციპალიტეტს სტიქიამ მნიშვნელოვანი ზიანი მიაყენა და მოსახლეობა დააზარალა, თუმცა, მუნიციპალიტეტის მაჟორიტარი დეპუტატი თემურ ჭკუასელი ჩოხატაურში არ გამოჩენილა. "სანთლით საძებნი" დეპუტატის ფოტო სოციალურ ქსელში 30 სექტემბერს გავრცელდა _ როგორც ირკვევა, ჭკუასელი პრემიერ-მინისტრს, ირაკლი ღარიბაშვილს ოზურგეთში დახვდა. ამ ფაქტს შეფასებებიც მოჰყვა. "აშკარად მხარი ექცა"; "მისამართი შეეშალა," _ წერდნენ ფეისბუქში.
"გურია ნიუსი" თემურ ჭკუასელს ტელეფონით დაუკავშირდა.
_ ბატონო თემურ, ალბათ, იცით, რომ სტიქიამ ჩოხატაურს მნიშვნელოვანი ზარალი მიაყენა, თქვენ კი აქ არ ჩამოსულხართ. სამაგიეროდ, ოზურგეთში თქვენი ყოფნის ფოტო გავრცელდა… ბევრს აინტერესებს, "მხარი ხომ არ გექცათ"?
_ მხარი არ მქცევია. ჩოხატაურში ჩამოვედი და რომ გავიგე, პრემიერი ჩამოდიოდა გურიაში, შემოქმედში წავედი, რადგან ჩოხატაურისთვის ის თანხა წამერთმია, რაც მჭირდებოდა და გავაკეთე კიდეც.
_ წაართვით?
_ კი.
_ რამდენი წაართვით?
_ რაც მითხრა გამგებელმა _ ნახევარი მილიონი წავართვი.
_ ბატონო თემურ, რატომ არ ჩამოდიხართ? დაგიშავეს რაიმე ჩოხატაურელებმა?
_ ჩამოვედი, ჩამოვალ და აწი კიდევ ჩამოვალ, მაგრამ ხომ იცით, რატომ არ ჩამოვდიოდი?!
_ ვიცით, თქვენი ოჯახური პრობლემის შესახებ, თუმცა, მას შემდეგ რამდენიმე ღონისძიებაზე გნახეთ. მათ შორის ბახმაროში, დოღზე. დიდი ხანია დეპუტატი ხართ, თუმცა მოსახლეობას არ ხვდებით, რაც მათ ბუნებრივ პრეტენზიებს იწვევს…
_ არა უშავს, იყოს პრეტენზიები.
_ ამომრჩეველს რომ თქვენს მიმართ პრეტენზიები აქვს, ეს პრობლემად არ მიგაჩნია?
_ არა, _ დააკონკრეტა ჭკუასელმა და დასძინა, რომ ამ დღეებში, მას შემდეგ, რაც ქუთაისში სასესიო სხდომები დასრულდება, ჩოხატაურს აუცილებლად ესტუმრება.
ჩვენ აუცილებლად შევხვდებით მაჟორიტარ დეპუტატს და მას იმ პრობლემების და მათი გადაწყვეტის გზების შესახებ ვესაუბრებით, რომლებიც მრავლად დაგროვდა ჩოხატაურში.
