“პაციენტები, უმეტეს შემთხვევაში, თვითმკურნალობას დიაგნოზის გარეშე ეწეოდნენ”

ორგანიზაციამ "ადამიანი კანონი თავისუფლება"  წამლის რეცეპტით გაცემის დაწესების გამომწვევ მიზეზებზე კვლევის შედეგები გამოაქვეყნა.  "ფარმაცევტული საქმიანობის რეგულირების სააგენტოსთან" ურთიერთთანამშრომლობის ფორმატში ორგანიზაციის მიერ დადგინდა, რომ რეცეპტის ინსტიტუტის შემოღებამდე არსებობდა თვითმკურნალობით გამოწვეული გვერდითი ეფექტების მაღალი რისკი. ფარმაცევტების მიერ მედიკამენტების არამიზნობრივად შერჩევა, დიაგნოზის გარეშე, მეზობლის, მეგობრის თუ ნათესავის რჩევით მედიკამენტების მიღება, ფსიქოტროპული მედიკამენტების უკონტროლო რეალიზაცია და სააფთიაქო ნარკომანიამ საშიშ ზღვარს მიაღწია.

ორგანიზაციის წევრებს მიაჩნიათ, რომ "სააფთიაქო ნარკომანიის" წინააღმდეგ ბრძოლა არის ქვეყნის სერიოზული სოციალური პრობლემის წინააღმდეგ ბრძოლა, რომლის მიზანია ახალგაზრდა თაობის ჯანმრთელობაზე ზრუნვა და ერის გენოფონდის შენარჩუნება. შესაბამისად, საზოგადოების ნაწილის მიერ ეს ღონისძიება არ უნდა იქნას აღქმული მათი "ნარკომანებისთვის შეწირვად".

"ადამიანი კანონი თავისუფლება" მიესალმება იმ ფაქტს, რომ ცვლილებამ საშუალება მისცა შესაბამის უწყებებს დაწესდეს მკაცრი მონიტორინგი ავადმოხმარებად სამკურნალო საშუალებებზე, რომელსაც ნარკოტიკული თრობის მისაღებად იყენებენ. ამ მიმართულებით გატარებული ყველა ღონისძიება ერთიანობაში საშუალებას იძლევა, დაიძლიოს  პრობლემა, რომელსაც სამკურნალო საშუალებების  ნარკოტიკული თრობისათვის ავადმოხმარება ჰქვია.

ფსიქოაქტიური ნივთიერებების ჯგუფების კრიმინალიზაციის საკითხთან დაკავშირებით, რეკლასიფიკაციის საფუძველზე ყველა ის მედიკამენტი რომელიც გამოიყენებოდა ნარკოტიკული თრობისთვის გადაყვანილია მეორე ჯგუფში და გაიცემა ფორმა N3 რეცეპტით, მათი გამოყენება მოხდება მხოლოდ ექიმის დანიშნულებით, რაც აისახება კანონმდებლობით დადგენილ სამედიცინო  დოკუმენტაციაში.

"უმთავრესი მიზეზი რეცეპტის ინსტიტუტის შემოღებისა არის არარაციონალური თვითმკურნალობის არსებული დონე. ჯანმრთელობის დაცვის ფუნდამენტურ ჯაჭვში ექიმი-პაციენტი-წამალი-ფარმაცევტი ამოვარდნილი იყო ექიმის რგოლი. პაციენტები, უმეტეს შემთხვევაში, თვითმკურნალობას ეწეოდნენ დიაგნოზის გარეშე, მეზობლის, მეგობრის თუ ნათესავის რჩევით, რაც უმეტესად არაეფექტური და საფრთხის შემცველია, იკარგებოდა მკურნალობისთვის საჭირო დრო. ამასთანავე უნდა აღინიშნოს ის ეკონომიური ხარჯიც, რაც დაკავშირებული იყო არასწორი მკურნალობისთვის საჭირო მედიკამენტების შეძენასთან და წამლისმიერი გართულებების სარეაბილიტაციო ხარჯებთან.

დაავადების მიმდინარეობის სურათი გარკვეული პერიოდის განმავლობაში იცვლება. ამ თვალსაზრისით პაციენტი საჭიროებს განმეორებით სამედიცინო გამოკვლევებს, განმეორებით დიაგნოსტირებას, რის საფუძველზეც საჭირო ხდება მედიკამენტოზურ მკურნალობაში კორექტივის შეტანა. ამიტომ, თუნდაც ქრონიკული დაავადების მქონე პაციენტის განმეორებითი ვიზიტი ექიმთან გარკვეული პერიოდულობით აუცილებელია და თავად პაციენტის ინტერესებში შედის. შესაბამისად ჩვენი შეხედულებით ხანგრძლივი მოქმედების რეცეპტისთვის კანონმდებლობით დადგენილი ერთწლიანი ვადა სრულიად რაციონალურია" – აცხადებს ნიკოლოზ მაღალდაძე.

ჯანდაცვის მინისტრის, დავით სერგეენკოს განცხადებით, რეცეპტების შემოღების მიზეზი მხოლოდ სააფთიაქო ნარკომანია არ იყო იყო: "ამას ზედ ემატებოდა თვითმკურნალობით მიღებული ზიანი და ის, რაც ჰაერივით გვჭირდება, ჯანდაცვის ხარისხი. ახლა გვსაყვედურობენ ოპონენტები, ჯერ ჯანდაცვის ხარისხზე გეზრუნათ და მერე გეფიქრათ რეცეპტებზეო. ბუნებაში ასე არ ხდება, ამ თანმიმდევრობით. სწორედ რეცეპტია ერთ-ერთი უმძლავრესი ინსტრუმენტი ხარისხის კონტროლისთვის."

 "გვინდა საზოგადოებას ვაცნობოთ, რომ ჯანდაცვის სამინისტროში ჩვენი შეხვედრისას ცნობილი გახდა, რომ გამოწვეული დისკომფორტისა და საზოგადოების შეშფოთების საფუძველზე გარკვეული დასახელების ყოველდღიურად მოხმარებადი მედიკამენტები, რომელთა რეცეპტის გარეშე გაცემა არ შეიცავს მაღალ რისკს, დაუბრუნდება ურეცეპტოდ გასაცემ მედიკამენტთა ნუსხას. ასევე ყველა ფარმაცევტულ დაწესებულებას დაევალება გადაუდებელი სააფთიაქო ჩანთის ქონა, საიდანაც აუცილებლობის შემთხვევაში გაიცემა მედიკამენტები გარკვეული რაოდენობით ურეცეპტოდ. აღნიშნული მედიკამენტების ნუსხა დამტკიცდება მინისტრის ბრძანებით" – განმარტავს მაღალდაძე

ორგანიზაცია მიმართავს საზოგადოებას დეტალურად გაეცნონ იმ სიახლეებს, რომელიც  განხორციელდა და მომავალში განხორციელდება, რათა არ მოხდეს მათი შეცდომაში შეყვანა. თავის მხრივ შრომის, ჯანმრთელობისა და სოციალური დაცვის სამინისტრომ ძალისხმევა არ უნდა დაიშუროს საზოგადოების სრულფასოვანი ინფორმირებისთვის.