ქალაქ ოზურგეთის საკრებულოს მორიგ სხდომაზე ათი საკითხი განიხილეს. ყველაზე მეტი დებატები მეორე საკითხის _ "საკრებულოს წევრის მიერ უფლებამოსილების შესრულებასთან დაკავშირებული ხარჯების ყოველთვიური ლიმიტის" განხილვას მოჰყვა.
საკრებულოს დეპუტატმა გოჩა ძიმისტარიშვილმა ჯერ დეპუტატებს აუხსნა, რომ საკრებულოს რეგლამენტში უნდა შესულიყო ცვლილება საკრებულოს წევრის მოვალეობების შესრულებასთან დაკავშირებული ხარჯების ანაზღაურების წესთან დაკავშირებით:
_ დოკუმენტში არ იყო დეტალებში გაწერილი ანაზღაურების წესი, თუ რა შემთხვევაში მიეცემა დეპუტატს ანაზღაურება. ამიტომ, შემოვდივარ წინადადებით, რეგლამენტში შევიდეს ცვლილება. ბიუროს სხდომაზე გამოითქვა მოსაზრება და თანამდებობის პირებმა გამოთქვეს სურვილი, რომ ამ ეტაპზე, სადეპუტატო ხარჯები არ აიღონ. მოგეხსენებათ, ბიუჯეტში არის პრობლემები, ეს ყველამ კარგად ვიცით. უჭირს ბიუჯეტს და ეს ქმედება თანამდებობის პირების მხრიდან კანონში ჯდება.
ნათია შარაშენიძე, საკრებულოს დეპუტატი: _ ჩემთვის, როგორც დეპუტატისთვის, ნამდვილად შეურაცხმყოფელია ამომრჩეველთა გასვლითი შეხვედრისთვის და ადმინისტრაციულ შენობაში მოქალაქეების მიღებისთვის თანხა ავიღო. ეს მოვალეობაა. ძალიან სამარცხვინო ჩანაწერია _ თურმე, მსგავსი შეხვედრები 50-50 ლარად არის შეფასებული.
გელა კობალაძე, ქალაქ ოზურგეთის საკრებულოს თავმჯდომარე:_ ეს ეხება იმათ, ვინც ხელფასს არ იღებს საკრებულოში.
ნათია შარაშენიძე: _ გასაგებია, რომ არ ვიღებ ხელფასს საკრებულოში, მაგრამ ეს ძალიან შეურაცხმყოფელია ჩემთვის.
_ იქნებ, ყოველ მესამე დღეს ვხვდები ჩემს ამომრჩეველს და ამ შემთხვევაში რა მოხდება? _ იკითხა საკრებულოს დეპუტატმა ირინა საჯაიამ.
გელა კობალაძემ უპასუხა, რომ ასეთი შემთხვევების გამორიცხვის მიზნით, ლიმიტია დაწესებული.
ირინა საჯაია თვლის, რომ ანაზღაურების ეს წესი, პირდაპირ გადმოკოპირებულია ოზურგეთის თემების საკრებულოს რეგლამენტიდან და სასურველია, ქალაქის საკრებულომ სხვა ფორმა გამოძებნოს.
დეპუტატი თემურ სალუქვაძე დაეთანხმა ნათია შარაშენიძეს და თვლის, რომ დეპუტატის უფლებამოსილების გახორციელებისათვის თანხის მიღება სირცხვილია:
_ არ მგონია რომელიმე დეპუტატს სწორად მიაჩნდეს, რომ დეპუტატის უფლებამოსილების გახორციელებისთვის, მოსახლეობასთან შეხვედრისათვის ანაზღაურება მიიღოს.
გოჩა მგელაძე, საკრებულოს დეპუტატი: _ აქ ოთხი დეპუტატი მოიაზრება და ერთ-ერთი მეც ვარ მათ შორის. ჩვენ გვაქვს ვალდებულება, რომ ამომრჩეველს ერთხელ შევხვდეთ. დეპუტატს იმის საშუალება უნდა მიეცეს, რომ უფრო მეტჯერ შეხვდეს ამომრჩეველს. არ ავიღებ ფულს საკრებულოს სხდომაში მონაწილეობისთვის _ ეს ჩემი პირდაპირი ვალდებულებაა; არ მიმიღია არჩევნებში მონაწილეობა იმისთვის, რომ 50 ლარი ამეღო.
გელა კობალაძე: _ დადგენილების პროექტში წერია, რისთვის უნდა მიეცეს ანაზღაურება დეპუტატს და რა ხარჯების გაღება შეუძლია საკრებულოს. აქედან გამომდინარე, თქვენ შეგიძლიათ ამას დაარქვათ მოსახლეობასთან შეხვედრა, გინდ _ კომისიებში მუშაობა და ა. შ.
ცხარე დებატების შემდეგ გადაწყდა, რომ დადგენილებაში ცვლილება შევა და საკრებულოს წევრის მიერ მოვალეობების შესრულებასთან დაკავშირებული ხარჯები ანაზღაურდება. ამ ხარჯების დეტალებზე, საკრებულოს მიერ შესაბამისი დოკუმენტის მომზადების შემდეგ მოვუთხრობთ მკითხველს.
